ھیرکاریں مردماں ماں بلوچستان ءَ گدا پلورینی کنگ ءَ انت

میارجل ءِ بنجاھی ھالرسانی ، پہ چاگرد ءِ دود ءُ روبیدگی بامردانی پجارینگ ءَ ، گپ ءُ ترانے ءَ گوں واجہ تارک جاشوئی ءَ کہ یک چاگردی جھدکارے انت برجم داشتگ ، 

جست : دزبندی کناں وتی پجار ءَ بہ کن ءُ اگاں ھم لوٹ ئے ، وتی چاگردی ، روبیدگی ءُ زانشتی پژدر ءِ بارو ءَ گپ کن .

پسو : من تارک جاشوئی اں ، زانشتی ءُ "معارف اسلامی" ءِ "لیسانس" ءُ چاگرد ءِ دود ءُ روبیدگی جھدکارے ءُ لیردپ ءِ شھر ءَ زندمانی چاگرد ءِ راجی جھدکارانی گلّ ءِ کارمستر اں.

ج : چہ بلوچستان ءِ چاگرد ءُ ٹوہ تریں روبیدگی جلّ ءُ بنی بستارانی بارو ءَ چے زان ئے ، اے پڑ ءَ کمّو سرپدی بہ دئے .

پ : بلوچستان ءِ مردم چہ سساہ ءُ مارشتانی ھساب ءَ بے دروریں مردم انت ءُ ھمے منانک اوں اے دمگ ءِ دود ءُ روبیدگی بستارانی پدّر کنوک انت ءُ اے رد ءَ ، زالبولانی سوچن دوچکی ، تگرد گواپی ، کپلی کونزگ ءُ جاگاہ ءِ ساچارگ ءِ ازم ءُ دگہ لھتے ھنر اں ، وت اے گپّ ءُ مدھا ءِ منانک انت ، اے دمگ ءِ لھتے دگہ ازمگری اں دنینگت ءَ پدّر کنگ نہ بوتگ انت . اگاں ما بہ لوٹ ایں بلوچ راج ءِ پھنام بوتگیں ازم ءُ روبیدگان ءَ کتار بہ کن ایں ، راج ءِ میارجلّی ، مھمان دوستی ، ھشر ءُ مدت ، بجّار دیگ ءُ بجّاری لوٹگ ءُ دگہ لھتے کرد ءُ کاراں چہ ھمے رد ءَ انت چمشکا مردمانی دستی ازم ءُ ھنر ءُ دربرجاہ ءُ دربروکانی سر ءَ دلوش گور دیگ ، چہ بلوچ راج ءِ زلورتان انت .

ج : بلوچستان ءِ چاگرد ءُ دود ءُ روبیدگانی گیشتریں گُزِند ءُ مونجائی انیگیں دور ءِ تہ ءَ چے انت ءُ ما را اے پڑ اں چے کنگ لوٹ ایت ؟

 پ : ھما گُزند کہ انیگیں وھد ءَ مئے چاگرد ءِ تہ ءَ گیشتر زاھر بیگ ءَ انت اشی انت کہ مئے بلوچ راج ءِ بازیں ٹکّے وت ءَ را مونڈ ءُ نیزگاریں مردم پیش دارگ لوٹ انت ءُ مدام دگرانی چمداری ءَ کن انت . یک درورے دیاں ; مئے چاگرد ءَ ، اگاں یک دری ءُ درانچکیں ھیرکارے بئیت ، لس مھلوک ءِ درھیں گلّ ءُ ٹولی اں چہ ٹوہ ءُ گونڈ ، پیر ءُ ورنا ، جنین ءُ مردیں وت ءَ را بزگیں مردمے ءِ دروشم ءَ زاھر کن انت ءُ چہ آئی ءَ کمک ءُ مدت لوٹ انٹ . چوشیں کرد ءُ رپتاراں چہ اے ھاتر ءَ انت کہ مئے راجماں ءِ مردماں ، چہ سساہ ءُ مارشتانی ھساب ءَ انت ءَ وتی بود ءُ بَرَش ءِ ٹلک ءُ چیدگ ءَ سر نہ بوتگ انت . اے بد ءُ ردیں کردے کہ مئے راج ءِ درھیں ٹکّ ءُ ٹولی ان وت ءَ را مجتی وھداں مونڈ ءُ مھتاجیں مردم پیش بہ دار ایت ءُ دگرانی کمک ءُ مدت ءِ چمداری ءَ بہ کنت . 

مئے راجمان ءِ دگہ مونجائی ءُ گُزندے کہ مدام بلوچستان ءِ چاگرد ءَ وتی بیم ءُ پاترپانی آماچ کتگ ، ھمے زھی زھی ءُ زاتی زُرّیاتی پگر ءُ جنگ ءُ مڑ ءِ ترندیں مارشتانی پلورینگ ءُ آھانی ردوم گِرگ انت ، چوشیں مارشتاں سوب بنت کہ لھتے مردماں وتی کئوم ءُ کٹم ءُ بُرز بہ لیک انت ءُ آ دگہ بے وس ءُ نابودیں کئوم ءُ کٹمان ءَ کہ چہ انسانی ءِ ابرمی ھساب ءَ گوں آھاں یک ءُ بروبر انت ایر بہ جن انت . چوشیں زات ءُ زُریات دوستی ءِ مارشتاں گیشتریں وھداں چہ لوگمان ءِ ردیں ردومی ءِ رھبنداں بندات کنگ بنت . اے مردماں گوتی وتی کوھن ءُ پیستگ ایں مارشتاں ، راجمان ءِ بیگواھی ءِ سوب بنت .

 دگہ گُزندے ماں بلوچ چاگرد ءَ ، ورنائیں گلّانی ترندی ءُ گرم سری انت کہ باز براں پہ گونڈیں گپے ءَ ھژم بنت ءُ وتی زریاتی ھساب ءَ برانز گِر انت ءُ پہ جنگ ءُ مڑ ءَ چِست بنت ، انچوش ڈیزل بروکی ، نشئی سامان ءِ سوداگری ءُ سلیھ ءُ توپک بڈوکی ءُ کتاربندی ءُ اے ڈولیں ندارگانی اکس کَشّی ءُ ماں روائی دگنیا ءِ رسانکدرانی تہ ءِ شنگ ءُ شانگی انت . 

بلوچ راج ءَ وتی اے ناوشّیں دودانی سلّھگ ءُ شَرّیں روبیدگانی گّھماری ھژدری انت ، وت ءَ وت کمک ءُ مدت بہ کن این ءُ دگرانی چم دار مہ بَہ ایں . اے رھدر مئے راج ءِ گِھبودی ءُ روبیدگانی تچکی ءِ سَوَب بنت . 

ج : تئے چاگردی ءُ روبیدگی ءِ لیکہ ءُ رھدر پہ بلوچ راج ءِ سر بیگ ءَ ، دیم پہ وتی اسلی ایں جاگہ ءُ بستار ، ماں ملک ءَ چے انت . 

پ : اے پڑ ءَ ما را وتی واھگ ءُ مرادانی ٹلک ءِ سر بیگ ءَ ، دگران ءُ سرکار ءِ چمداری نہ لوٹ ایت . بژنی گپ اش انت کہ چہ اے دِگِری زانگ ءُ وتیگی ءُ درامدی مارشتاں کہ لھتے جاہ ءَ پدّر انت یا کہ چہ لھتے زمہ وارانی کولہ روگ ءِ کارپداں پہ اے وتیگی ءُ درامد چاری ءِ گار ءُ گمسار کنگ ءِ ھاتر ءَ ، بلوچ راج ءَ را پہ ارزانی ءُ اشتاپی ءَ وتی اسلی ایں جاگہ ءُ بستار ءِ موہ دست نہ کپ ایت ، منی ٹوہ تریں رھدر ءُ لیکہ اے پڑ ءَ اش انت کہ بلوچستان ءِ سوھو ءُ وانندہ ایں مردمان ءَ ، ملک ءِ درھیں تک ءُ پھناتانی تہ ءَ ھور ءُ آھانی وس ءُ واک ءَ کارمرز بہ کن انت ءُ وت ءَ چہ وتیگ ءُ درامد زانتی ءَ مارشتان بہ پھریز انت ءُ ما را انچوش کہ ایران ءِ دگہ راجاں ، یک چمے ءَ سر ءَ بہ چار انت . چوشیں ردیں مارشتاں ھاسکار ماں آموزش ءُ پرورش ءَ باز بوتگ ءُ چہ اے وڑیں پگرانی کارپداں ، اے کارگس لُچی ءِ اوشت ءِ آماچ انت . اے بارو ءَ منی سوگہ ، درھیں راج ءُ ملک ءِ زمہ وارارانی مارشتانی سلّہ ساچی ءُ ھکّ لوٹی رھدر انت .

ج : بلوچ راج ءِ سوھویں مردمانی اگدہ ماں بلوچستان ءِ چاگردی ءُ روبیدگی تک ءُ پھناتانی انیگیں جاورھالاں چے انت ؟ 

پ : وتی چاگرد ءَ چہ ھما سلّ ءُ بدیں دوداں کہ راجمان ءَ بیمباہ دنت ، پلگارگ لوٹ ایت ، زاتی ءُ زریاتی ءُ زھی زھی مارشتان ءَ وش ساچی ، چہ ترندی ءُ جیڑہ ءُ جن ءُ چوپاں وت ءَ پھریزگ ، شراری ءُ نشئہ ای گزاز ءُ سامانی بھابریدی بلوچ راج نام ءِ سر ءَ ردین ءُ بدیں کِرد ءُ کارپد انت . وتی دودانی شَر ساچی ، ھک واھی ءِ مارشتانی پیلو کنگ ءُ راجمان ءِ شَرّیں اگدہ ءُ زمہ انی کوپگ زیری ءِ منّارینگ ما را ھژدری انت .

ج : رسانکدرانی زمہ پہ بلوچستان ءِ راجمان ءِ دیمروی چے انت ؟ اے پڑ ءَ چے زان ئے ؟ 

پ : بژن ءِ سر ءَ گوشاں کہ یک ھاسیں رسانکدرے ءِ کھت ءُ کمّی پہ بلوچ راج ءِ دود ءُ روبیدگانی دیمروی ءَ ، مئے چاگرد ءِ یک ٹوھیں گزندے انت بلے انیگ ءِ نوکیں جاو ھالانی تہ ءَ کہ روائی دگنیا ءِ رسانکدراں گیش بوان انت پہ راج ءَ یک موہ ءُ ٹوھیں نیامتے بلے بژنی گپ ءُ ھبر اش انت کہ ھمے روائی دگنیا ءِ رسانکدرانی تہ ءَ ، نوکیں روبیدگ ساچی ءِ بدل ءَ لھتے جاھاں ترندی ءُ جنگ ءُ چوپ ءِ مارشتاں شنگ ءُ شانگ بیگ ءَ انت پمیشکا ما را بد ءُ سلّیں دودانی جاہ ءَ روبیدگانی سلّھگ ءُ دربرگی ءِ شَرّیں دودانی ردوم دیگ وتی ماتی زبان ءِ سر ءَ ، جھد کنگی انت دانکہ مئے راج چہ وتی اسلی ایں دود ءُ روبیدگاں سھیگ ءُ سرپد کنگ بہ بنت . اے پڑ ءَ ما را پہ گونڈ ءُ ٹوھیں دربرگی تامرانی ساچارگ ءُ وتی ھاسیں رسانکدرانی شوھازگ ءَ بازیں جھدے کنگ لوٹ ایت .

ج : اگاں دگہ پشت کپتگیں گپے ھست بہ گوش .

پ : واھگ انت کہ مئے بلوچ راج کہ دگرانی آیگ ءُ کمک ءُ مدتانی چم دار انت وتی واب ءَ چہ بُست کنت ، واھگ انت کہ منی سوگہ ءُ لیکہ پہ راج ءِ سوبمند بہ بنت .

رجانک : میرجلال