ھلاکہ دار ءِ آباٹگری بھرگ ءِ جھمنند ءِ نگدکنگ چہ سیستان ءُ بلوچستان ءِ لھتے شھردارانی کرد ءُ کرتوت.

چہ میارجل ءِ بنجاھی ھالرسانی ءِ ھالانی رد ءَ: واجہ عطاءاللہ اکبری سیستان ءُ بلوچستان ھلاکہ داری ءِ اباتگری بھرگ ءِ جھمنند، ھلاکہ ءِ شھرداران ءُ شورجاھانی کماش ءُ مسترانی مراگہ ءُ نیاد ءِ رد ءَ، چہ اے بنمالانی ھرچ ءُ درچ ءِ جاورھال ءَ نگد کت. اے واجہ گوں اے گپ ءِ درشانی کہ ھلاکہ ءِ لھتے چہ شھرداراں چہ وتی شھرداری انی ھال ءُ روچ ءَ بیھال ءُ بے تران بوتگ انت، گوشت: لھتے چہ شھرداراں اے زر ءُ بنمالان ءَ ایوک ءَ وتی کارندہ ھانی پگار ءُ آھانی گیشیں داد ءُ دھشانی ھرچ ءُ درچ کن انت، اے کار ھما جاورانی بارو انت کہ اے زری بنمالاں باید انت پہ راج ءُ مھلوک ءِ اسرمندیں کار ءُ باراں گیشینگ بہ بنت. اکبری بید ءِ اشی کہ چوشیں شھرداری انی نام ءَ بہ گیپت، مالی ھرچ ءُ درچان ءِ ٹک ءُ زاھری ءِ بارو ءَ کڈن کت ءُ گوشت : پیشی سال ءَ چہ شھرداری اں لوٹگ بوت کہ کارمرز بوتگیں تھر ءُ کاروائیان ءُ آھانی بارو ءَ مالی ھرچ ءُ درچانی سرجمیں سوج ءُ سرپدی ان ءَ گیش ءُ گیوار بہ کن انت بلے لھتے جاھاں ھچ وڑیں پدریں پسو ئے دیگ نہ بوت ءُ انی ءَ اوں ھلاکہ ءِ درھیں شھرداری انی کرد ءُ کارپداں سند ساچی بیگ اںت. ھلاکہ داری ءِ آباتگری کار ءُ باران ءِ جھمنند گوں مالی ءُ زری پلامرزان ءِ اشارت ءَ جار جت : گیش چہ 4000 ملیارد تومن ءِ بنمال ءُ 15 ھزار تن گیل ءُ ڈامبر کہ سیستان ءُ بلوچستان ءِ شھرداری ان ءَ دیگ بوتگ، پیش گندی بیت کہ داں امبری سال ءِ گڈی روجاں، گیش چہ 6000 تون ءِ ڈامبر، ھلاکہ ءِ شھرداری ان ءَ دیگ بہ بیت. اے واجہ ءَ کیش کت: نوکیں بنمالاں ھلاکہ ءِ 55 شھرانی نیام ءَ بھر ءُ بانگ بوتگ، بلے اے پلامرزی ان ءِ برجمدارگ ءَ گوں، لھتے شھرانی تہ ءَ چم دیستیں ٹگل ءُ بودے چوشیں شھرانی دگ ءُ یادگ روان ءُ سوز ساچیں جاورانی تہ ءَ گندگ نہ بیت. واجہ اکبری سوز ساچیں جاوراں، چاگرد ءِ گھبودی ءُ شھری "مبلمان" ءُ یادگ روانی گوم ءُ گیگ ءَ شھرداری ان 3 اسلی ایں مول ءُ مراداں زانگ ءُ لیکگ بنت، آئی ءَ زاھر ءُ پَدّریں تھر ءُ کاروائیان، گوں آھانی روژنائیں ھساب کتابانی لوٹوک بوت. اے واجہ گوں لھتے نگیانی اشارت چوشکہ لوگ بندگی گنش ءُ گونشانی زیادھی کہ یادگ راھانی سر ءَ یلو بیتگ انت یا کہ پرشٹگیں جدولان ءُ... کڈن کت کہ شھرداری اں باید انت چہ وتی گرانیں موٹل ءُرمکینہ ھاں، وتی شھران ءِ گھبودی ءِ ھاتر ءَ سوب بہ گر انت. ھلاکہ داری ءِ آباٹگری بھرگ ءِ جھمنند ءَ انچوش پہ "پسماند" انی الکاپیں کارمستری ءُ ماڑی ساچی ءِ رھبندانی کارمرز کنگ ءُ شھر ءِ مردمانی ھمراھداری ءِ بارو ءَ پہ شھرانی گوم ءُ گیگ دیگ ءَ کڈن کت .. . واجہ اکبری وتی گپانی گڈی بھر ءَ، گوں اے گپ ءِ درشانی کہ بنمالانی گرگ ءُ شوھازگ ایوک ءَ کٹ ءُ بروردے شمار نہ بیت گوشت: اسلی مول ءُ مراد شھرداری ان ءِ کرد ءُ کرتوت ءُ راج ءُ مردمانی رزامندی ءِ کچ ءُ کساس ءُ آباتگری کار ءُ بارانی آسرال پہ مردمانی چاگرد ءُ زندمان انت. رجانکار : میرجلال.