چہ پلیس ءِ پد ءُ لنگی ءُ پلپٹ والایانی تَچَگ ، یک بے گناھیں نوک ورنائے بیران بوت | اکسانی رد ءِ سر ءَ

چہ میارجل ءِ بنجاھی ھالرسانی ءِ ھالانی رد ءَ کہ مرچی سھب ءَ ( گوستگیں شپ ءِ بانداتگیں روچ ) پٹّ ءُ پول کتگ اے ھال پدّر انت کہ پنوچ ءِ شھر ءَ یک کوراسیں جاورھالے برجاہ انت . ھالکار ءَ گُوَش ایت ، شھر ءِ توک ءَ کہ مان بئے درھیں تک ءُ پھنات ءَ ترھگانی ءُ سُدُّرگ ءِ جاورھاے گِندئے بلے پانگِس ءِ واک اں دگانی ھمک کُنڈ ءَ گَشت ءُ گول ءَ انت ءُ بے بیسہ ای ءِ کوراسی اں گندگ بیت چُشکہ ژیمبیں گرند ءُ گورکے ءِ پد ( کہ یک بے گناھیں مردمے ءِ بیرانی ءِ سوب بوتگ ) ملک ءِ جاورھال ترھتگ . 

سمیر گردھانی بے گناہ ات 

ھال ءِ رندگیری ءَ پد ، گوشگ بوتگ کہ سمیر گردھانی ءِ یکے چہ سیاد ءُ وارسان ءَ در گیجان ءُ چہ آئی ءَ جست کناں ، سمیر ءِ وارسیں مردم گوش ایت ; گوستگیں شپ ءِ درگتاں ، پنوچ ءِ شھر ءَ ٹوھیں جنجٹے برجاہ بوت ءُ شھر ءِ لس مھلوک چہ اے تپاک ءِ تورشتاں سکّ مونج ءُ پدرد بوت انت ، سمیر واکی ءَ بے گناہ ات .

اے واجہ دیمتر ءَ گوش ایت کہ سمیر پلپٹانی سر ءَ سوار نہ بوتگ ، آ ، گیشتریں روچاں وتی کار ءُ چلوپگ ءَ چانک بوتگ ءُ وتی لوگمان ءِ نان کَٹّے ات ، سمیر ءَ ۱۶ سال ءِ اُمر اٹ ، آئی ءِ پت جان ءِ نزوریں مردمے ءُ باز وھد انت کہ لوگ ءِ گَندلانی میار انت ، اے واجہ کہ سمیر ءِ ناکوگ ءِ چُکّ انت ، وتی گپانی رندگیری ءَ گوش ایت ; اے دگ وئیل ءِ رد ءَ سمیر یادگ ءَ چہ کار ءُ چلوپگ ءِ سر ءَ دیم پہ وتی لوگ ءَ آیگ ءَ بوتگ ، پلپٹاں یکادگر ءِ گوم ءَ جنگ وارتگ ءُ اے نیام ءَ بزگیں سمیر بیران بوتگ . 

یک دگہ مردمے ءَ کہ اے دگ وئیل ءِ چم دیستیں گُوَھدار انت تران کت ; گوستگیں شپ ءَ یک پلپٹ سوارے وتی پلپٹ ءِ سر ءَ یک لنگی ( تک چرخ ) روگ ءَ بوتگ ، پانگس ءِ پلیس ءَ آئی ءِ رند ءَ کپتگ ، پلپٹی لوٹتگ کہ چہ پلیس ءِ دیم ءَ بہ تچ ایت پمیشکا چہ پلیس ءِ پد ءُ لنگے ءِ تچگ ءِ ھاتر ءُ اے مَنّ ءِ سر ءَ کہ پلیس منی ڈول ءَ ردیں کارے نہ کنت ءُ چہ منی دمب ءَ سِد ایت ایت ، ماں دگ ءِ چَپّیں نیمگ ءَ ماں پُتِرتَگ ، بلے ھبکہ ءِ سر ءَ گِند ایت کہ پلیس انگت ءَ آئی ءَ رند دیگ ءَ انت . اے نیام ءَ دگہ پلپٹ والائے کہ چہ دیم ءَ وتی تچکیں گُوَم ءِ سر ءَ پیداگ ءُ آیگ ءَ انت ، اے مردم ، چہ اولی پلپٹی ءُ پلیس ءِ پد ءُ لِنگی ءَ ، چوشیں تَنک پھناتیں دگے ءِ تہ ءَ ترس ایت ءُ ھَلَپَچَگ بیت چمشکا ھر دو پلپٹ والایاں یکادگر ءِ گوم ءَ جنگ ور انت بزگیں سمیر کہ یادگ ءَ وتی لوگ ءِ نیمگ ءَ رَوَگ ءَ بوتگ اشانی نیام ءَ پَسّ ایت ءُ چہ دوئیں پلپٹانی ڈیّکّی ءَ سَکّ زَدَگ ءُ بیران بیت . 

اے چم دیستیں مردم ءَ گوش ایت ; کہ سمیر ءِ بے گناھیں بیرانی ، باز دردیگ ءُ تورشتیں تپاکے ات کہ یکّے ، بے گناہ ءَ اے ڈول بیران بہ بیت . اَلَّم ءَ کہ ناھکّیں تپاکے ات ءُ انساپ نہ انت بلے تپاکے ات کہ کپت ءُ یک بے گناہ ءُ نان کَٹّیں مزدورے ءِ مرک ءِ سوب بوت .

چہ پلپٹ والایاں یکے سکّ زدگ ءُ نادراھجاہ ءِ تہ ءَ ، وتی زند ءِ بے اوستی ءِ آماچ ءُ چہ زدگاں۲ کس دگہ نادراھجاہ ءِ بوپانی میار انت ، نوں جست اش انت کہ کے انت ھما ، کہ اے ناھکّی ءُ سمیر ءِ بیرانی ءِ پَسّو ءَ دنت ؟

چہ ھلاکہ ءِ جھگیری ءَ ، یک راہ داتگیں گَلّے ، اے جنجٹ ءِ سر ءَ ٹپّاسی کنت 

میارجل ءِ ھالکار ءَ گوش ایت ، ھالانی اشکنگ ءَ ، اے دگ وئیل ءِ زَدَگ ءُ ٹپّی ایں مردماں چہ ، یکّے ءِ جاورھال سکّ نہ گیگ انت ءُ نادراھجاہ ءِ ccu ءِ بھر ءَ واپینگ بوتگ ءُ ۲ دگہ ھم ، ۴ پادگ ءُ بوپانی میار انت .

ھما ٹپاس کنوکیں گلّ کہ چہ ھلاکہ ءِ جھگیری ءَ پہ اے تپاک ءِ ٹپاسگ ءَ کاینت ، پٹّ ءُ پول ءَ رند ، اے دگ وئیل ءِ پدّر ءُ پھنامیں ھالان ءَ پہ مردمانی سھیگی ءِ ھاتر ءَ درشان کن انت . ما ھم الم ءَ گوں آھاں گپّ ءُ ترانے کن ایں .

میارجل ءِ رندگیری ، اے دگ وئیل ءِ درھیں تک ءُ پھناتانی سر ءَ برجاہ انت .

رجانک : میرجلال