میارجل ءِ روایت چہ ریمدان ءِ سیمسر ءِ بازار ءِ جوڑ بیگ ءِ مراگش ءَ کہ سیمسر ءِ سر ءَ ریمدان ءُ گبد ءِ

چہ میارجل ءِ ھالکاری بُنجاہ ءِ نیمگ ءَ : مرزدارانی کار ءُ باپاری ءِ دیم روی ءِ ھاتر ءِ شریداریں بازارے ایران ءُ پاکستان ءِ مرز ءِ سر سر ءُ بُن بُن ءَ جوڑ کنگ بیگ اِنت  دانکہ مرز ءِ ھر دوئیں نیمگ ءِ مردم ماں اِے شریداریں بازار ءَ پہ مال ءُ گوک ءُ پس ءُ ھشتر ءُ برنج ءُ روگن  ، کشاورزی ، ھر دوئیں ملکانی جوڑ کتگیں اوزار ءُ سامان ءُ ھمے وڑ ءَ 180 وڑیں چیز ءُ سامان ءِ بر ءُ آر ءَ سیت مند بہ بنت کہ  لھتیں چہ اِے کشاورزی ءُ کشت ءُ کشاری سامان ءُ اوزار ءِ کیمت ءِ نھاد ءسَدی سَد کم تر ءُ جھل تر دیگ بنت ۔

روہ اللہ  شریپی کہ باپاری کارجاہ ءِ کارمستر اِنت ءُ ایران ءِ جھگیر ماں اِے گند ءُ نند ءَ بوتگ ءُ گوں میارجل ءِ ھالکار ءَ درائینت ئِے : ایران ءُ پاکستان ءِ دولت ءَ شور کتگ دانکہ مرز ءِ ھر دوئیں مردمانی واست ءَ زرکاری ءُ باپاری ءِ کارے بہ کن اَنت دانکہ آیانی زندمان بود بیار اِیت گڑا شریداریں بازارے پہ دئے ءُ زیر ءِ ھاتر ءَ پہ ریمدان ءُ گبد ءِ واست ءَ نیت اِش کُتگ کہ جوڑ بہ بیت ۔

آئی ءَ تران کنان کت کہ اِے ھم سنتی ءُ ھم شوری دو ملکانی مِلّی مزن کارمسترانی نیمگ ءَ چنت ماہ پیش بوتگ اَنت دانکہ اِے ملکانی زرکاری ءُ باپاری جاورانی گھبودی بئیت ءُ وتی جوڑ کتگیں چیز ءُ ساماناں پہ یک ءُ دگر ءَ بہ دے اَنت ءُ دئے ءُ زیر بہ کن اَنت ، گوں شریں بھا ءُ مزے ءَ اِے کرار کنگ بیت کہ ھر دوئیں ملک ھوری ءَ وتی ھیرت ءُ مزنیں چیز ءُ ساماناں وتی ھاک ءِ کش ءُ کر ءَ بھا بہ کن اَنت ءُ ھمے ملک ءِ وتی نشتگیں مردم چہ اِے پتر ءَ کہ پچ کنگ بیت اِنت سیت مند ءُ بھرہ مند بہ بنت ۔

شریپی ءَ درائینت ھر دوئیں نیمگ ءِ کارمستراں اِے نیت ھست اِنت کہ کم تریں وھد ءَ زوت ءَ زوت اِے ھور ءُ تور ءُ شریداریں بازار ءَ بنگیج بہ کن اَنت ۔

راجا اَتھر اباسی گوادر ءِ پرماندار ءِ سیاسی ءُ انتزامی کمک کارمستر ءَ گوں میارجل ءِ ھالکار ءَ گوں گْوشت : جاگھے کہ ما پہ مرزی بازار ءِ واست ءَ مَیَّن ءُ گِچین کتگ پہ ھر دوئیں ملکانی واست ءَ سیت مند بیت اِنت ءُ باز شریں موھے پہ ھر دوئیں ملکانی واست ءَ پیش آتکگ ءُ شور ءُ مشورتے کہ دوئیں کشوراں کتگ ما امیت واریں کہ زوت ءَ زوت ھر دوئیں ملکانی مرز نندیں مردم چہ اِیشی ءَ سیت مند بنت ءُ کارمرز کن اَنت ۔

آئی ءَ تران کنان کُت : اِے نکشہ ھوری ءَ دوئیں ملکانی نیمگ ءَ جوڑ کنگ بیتگ ءُ ما وتی جھد ءَ کن اِیں دانکہ زوت تریں زمان ءُ وھد ءَ اِے ھور ءُ توریں بازار ءِ کار ءُ بار بنگیج بنت اِنت ۔