میارجل ءِ گپ ءُ دیوان گوں یک سرشناسیں ءُ دودمانی بلوچستان ءِ سردارے ءَ /سردار مھدی گْورگِیج : ما بای

میارجل ءِ بنجاہ ءِ ھالرسانی ءِ رِد ءَ : سردار مھدی گْورگیج گُش اِیت : ھر کھول ءِ لوگمردم پہ بلوچستان ءِ دود ءُ ربیدگانی پراہ ءُ شاھگانی ءَ مزن کردے ءِ واھند بیت کن اَنت 
ما بایداِنت کہ ھر کوم ءُ ھر ٹک ءِ مردم چو کہ اے دگہ مھلوک ءَ پہ بلوچستان ءِ دود ءُ ربیدگانی دیمروی ءُ شاھگانی ءَ ھم سنت ءُ ھمگام بہ بئیں ءُ جھد بکن اِیں 
پہ اے باندات ءَ کھولانی تھا زانتکار ءُ سرپدیں ءُ سوادداریں مردمانی زمہ داری سک بازاِنت. 

بایداِنت کہ ماں بلوچستان ءَ ھر کھول ءِ تھا چہ دکتر ءُ لیسانس ءَ کمتر گندگ مہ بیت دیمتر ءَ آئی ءَ گوشت :مروچی چاگرد ءَ پہ اے کار ءَ تیاری ھست اِنت مزن شھدربرجاھانی استاد دگہ کماش ءُ اِسپیت ریش ءُ نیکراھی ءِ پیشوک ھنچو شورا اسلامی باسک ءُ اے دگہ کوم ءُ ٹکّانی سروکیں مردم باید اِنت کہ بیا اَنت اے میدان ءَ اِیر بکپ اَنت ءُ وتی زانت ءُ زانگ ءَ پہ بلوچستان ءِ چاگرد ءِ دودانی شاھگانی ءَ کارمرز بکن اَنت ءُ وتی جرند ءِ وانگی ءُ دودمانی کتہ کاریاں پہ بلوچستان ءِ جاوراں پیش بداراَنت.

پد ءَ آئی ءَ جھان ءِ نبشتگیں آمار ءِ رند پداں اشارہ کنان ءَ گوشت : نوک دربرانی ءُ نوک ورنایانی ھوش ءُ زانت چہ اے دگہ جاھانی مردماں باز شرتر ءُ تیزتر اَنت باید اِنت کہ ھر کھول وتی چاگرد ءِ اے زانت ءُ زانگ ءَ چہ بھر بزیراِیت ءُ ھدا ءِ اے شریں داد ءَ کارمرز بکن اَنت. اے درمیان ءَ چاگرد باید اِنت کہ چہ جنکانی زانت ءَ ھم بھر بزیر اِیت پرچا کہ مروچی مئے کتہ کاری پیش داراِیت کہ زالبولانی ھوش ءُ زانت چہ مردیناں باز گیشتراِنت .

ماں بلوچستان ءِ ھر ھند ءُ دمگ ءَ کہ جنینانی زانت ءِ پیشداری ءِ جاورے جوڑ بوتگ گڑا ماں آ جاگاہ ءَ آیاں پہ وتی کھول ءَ یک وشنامی یے آورتگ پہ درور چو کہ بانک ھمیرا ریگی کہ مروچی ماں یک اسلامی کشورے ءَ ایران ءِ جھگیر اِنت بزاں چہ ھمے ملک ءَ ءُ گوں ھمے دروشم ءَ ءُ گوں وتی جنینی زانت ءُ زانگ ءَ دولت ءِ نیمگ ءَ پہ مزنیں اوست ءُ بروسھے ءَ رس اِتگ.

دیمتر ءَ آئی ءَ گوشت :کہ من اِشی پہ جزم جار جن آں ءُ گش آں کہ ھر راج ءُ ھر ٹکے ءَ کہ پہ وتی کھول ءِ ءُ پہ وتی چاگرد ءِ زالبولانی زانت ءُ زانگ ءِ سرءَ اوست ءُ بروسہ کتگ گڑا آیاں شریں بروردے ءُ بھرے چہ اے کار ءَ رس اِتگ ءُ ھجبر تاوان بار نہ بیتگ اَنت.

آئی ءَ ملک ءِ چیریں گنج زمینی مادن ءُ دریا ءِ بارو ءَ اشارہ کنان ءَ گوشت: کہ بلوچستان ءِ سرڈگار پُر اِنت چہ ھدا ءِ داتگیں نیامتاں اے باندات ءَ لوٹ اِیت کہ گوں کارزانتی نگاہ ءَ ءُ مردمانی اوست پہ دولت ءَ ءُ دولت ءِ اوست پہ مردماں یک روچے ءَ ما وتی چاگرد ءِ ردوم ءُ دیمروی ءِ شاھد بہ بئیں.