بلوچانی ازمکار : مارا پہ توار ءِ نہ اِشکنگ ءَ ھِیل کتگ / میارجل آتکگ دانکہ ما وت ءَ باور بہ کن اِیں+تا

چہ میارجل ءِ ھالرسانی بنجاہ ءِ نیمگ ءَ : ابراھیم ساویز ءَ ماں میارجل ءِ بلوچی تندجاہ ءِ بھر ءِ دیم درائی ءَ گْوشت :چہ میارجل ءِ بلوچی تندجاہ ءِ بنگیجی ءَ سک باز وش ھال آں ، چہ اِے وڑیں پیش آتکاں وشی ءِ مارشتے منی اندر ءَ کدوہ کنت ءُ میارجل آتکگ کہ مزنیں کارے بہ کنت ، چوناھیگا سک باز شر کار ئِے کتگ ءُ اگاں کمی یے ھست اِنت الّم ءَ چکاس اِین ئِے دانکہ شر ءُ بے کِچّو بہ بیت ۔

آئی ءَ گْوشت : مارا ترسے ھست کہ اِے ترس نہ باید مئے اندر ءَ بہ بیت ، اِد ءَ مئے سرڈگار اِنت ، مئے پت ءُ مات اِد ءَ ودی بوتگ اَنت ءُ بلکیں مئے مردگ پشت ماں پشت ھمد ءَ کَلّ انت ، نہ بیت کہ اِے کوم ءَ جتا ءُ ایرانی مہ زان اِیں ، البت ما نہ زان اِیں کہ کجا بہ رو اِیں مئے ءُ مئے سرڈگار ایران ءِ میانجی ءَ ھمگرنچی پیش بئیت ، بلے میارجل توان اِیت اِے کار ءَ پہ جوانی انجام بہ دنت ۔

بلوچانی اِے ازمکار ءَ درائینت : میارجل ءِ جار نوکیں گپے ، بلوچستان ءِ دود ءُ ربیدگی ، مچانکی ءُ زرکاری کارندھانی توار اِنت ، داں کہ گْوشتگ اِش بلوچستان ءِ توار اِنت ھچبر اِشکنگ نہ بیتگ ءُ ما پہ اِیشی ءَ ھِیل کتگ بلے اگاں بہ گْوش اَنت شمئے توار اِشکنگ بیت ما باور نہ کن اِیں ءُ ما انگت ھم ترس اِیں چہ ایشی ءَ کہ اِد ءَ بہ گْوش اِیں ، مئے زندمان ءِ جاورھال شر نہ اَنت من ءَ بیم ءُ ھژم ھست اِنت ءُ ما اِے ھژم ءُ بیمانی تہ ءَ رُستگ ءُ مزن بوتگ اِیں ، بلے چد ءُ پد ما پہ اِے وت باوری ءَ رس اِیں کہ چد ءُ رَند ما اِشکنگ بئیں ۔