تامر| بے راھی ءِ مونج ءُ تکانسری ۲ آپسر ءُ کلّگ ءِ دامن ءَ گِپتَگ

چہ میارجل ءِ بنجاھی ھالرسانی ءِ ھالانی رد ءَ ; سال ۱۴۰۰ ءِ مھرجان ءِ ماہ ءَ ، کلینک تاج مھمد ھانی ءُ ازم ھانی کلگانی مردمانی لوٹ ءِ سر ءَ ، اے ۳ نام گپتیں کارگساں ، یک راھے ءِ اڈ کنگ ءُ ساچارگ ءِ کول ءُ لبز ءَ دات ءُ یک منّگ نمدی ءِ رد ءَ ھم شور ءُ ھم سَنّت بوت انت . اے شور نمدی چہ پھر ءِ دمگ دار ءِ نیمگ ءَ ھم مَنَّگ بوت ، منّگ نمدی ءِ تہ ءَ اے ڈول ءَ لبز دیگ بوت کہ ، چہ بنیاد مسکن ءِ نیمگ ءَ "گیل" ءُ چہ راھداری ءِ نیمگ ءَ راہ ساچی ءِ سامان ءُ اوزار شوھازگ بہ بیت ءُ اڈ کنگ ءُ ساچ ءِ زمہ ، مسکن ءُ شھر سازی کارگس ءِ ڈوبہ ءَ گیش ءُ گیوار کنگ بوت . داں انی ءَ کہ یک سال ءُ نیم چہ منگ نمدی ءِ ٹھینگ ءَ گوستگ ، مسکن ءُ شھر سازی ءِ زمہ واراں وتی داتگیں کول ءَ شموشتگ ءُ لبز پروشتگ انت . اے نیام ءَ مردم ھم چہ بے راھی ءَ مونج ءُ تکانسری ءِ آماچ انت . 

اے اوشت آماچیں بنگپ ءِ رندگیری ءُ گپ ءُ ترانے ءِ ھاتر ءَ ، ما دوئیں کلگانی مردمانی کِرّ ءَ شُت این ءُ چہ آھانی لیکہ ءُ بے راھی ءِ مونج ءُ تکانسری ءَ ، سر ءُ سوجے کت . دیمتر ءَ ھم لوٹ ایں وتی ھال ءُ تران ءِ رندگیری ءِ ھاتر ءَ ، اے ۳ کارگس ءِ کارمسترانی نیمگ ءَ بہ رویں . البت اگاں آھان ءَ چہ وتی کولَہ روی ءَ ، پسّوئے پہ دیگ ءَ بہ بیت .

رجانک : میرجلال