سیمسری بازار ءِ کارمستر ماں پسابندن ءَ : مکران ءِ تیاب دپ ءِ دیمروی گوں دریایی کار بار ءَ ھمگرنچ اِن
میارجل ءِ ھالرسانی بنجاہ ءِ ھالانی رد ءَ : میارجل ءِ ھالرسانی بنجاہ ءِ ھالانی رد ءَ : مھمد شریپ بادپا کہ یکے چہ بلوچانی کار ءُ باری مردمان اِنت کہ میارجل ءِ ھالکار ءَ گند ءُ نندے گوں آئی ءَ کتگ دیم تر ءَ وانوکانی چم ءُ دیدگانی دیم ءَ گوز اِیت ۔
واجہ وتی پجارءَ بکن اِت ؟
من بکشدار پلان ءِ پَنی ءُ اِزمی کارمستر ءُ بکش پلان ءِ دھیارانی تاوانی ءِ کارمستر ءُ ھنوں ھم وانگ ءَ یاں اومران کارشناسی ارشدءَ منی اُمبر نوکی پہ 30 سالی ءَ رس اِتگ
چہ ھما کارباراں گپ بکن اِت کہ بلوچانی زندمان ءَ بدلی ے آرت کن اَنت ؟
درستاں چہ پیسر پہ منی ھیال ءَ بلوچستان ءِ مردمانی کار دریا ءُ ماھی کُشی اِنت پد ءَ دگہ ایران ءُ پاکستان سیمسر ءِ کاربار اِنت۔
ھمے بُنگپ ءَ گیشتر گیش گیوار بکن اِت ؟
بلے ، ما باید بزان اِیں کہ سیمسر یک شریں کارباری جاگاھے بلّے کہ ما مروچی آمریکا ءِ زالمانہ تھریم ءَ اِیں اے باندات ءَ یکیں راہ کہ ایران ءَ چہ اے گر ءُ دارءَ بہ رکین اِیت بایداِنت کہ دلگوش گوں بلوچستان ءَ بکنت پرچا کہ گوں پاکستان ءِ سیمسر ءَ بازیں چیز ءُ سامان برت ءُ آرت بکن اِیں بلے داں روچ مروچی اے کار یا وَ ھچ نہ بوتگ یا کہ اگاں ھم بوتگ گڑا باز کم دلگوش دیگ بوتگ.
بھرھال پہ سیمسرءِ کارءَ جنجال انگت ءَ سک بازاِنت پہ درور من ءَ کہ ھُکم کارمستری پہ سیمسری بازار پسابندن ءِ دیگ بوتگ بلے انگت اے کار بنگیج کنگ ھم نہ بوتگ ھنوں ما لوٹ اِیں کہ پہ دلجمی اے کارءَ بنگیج بکن اِیں گڈسر ءَ من چو گوشت کناں کہ ریمدان ءُ پسابندن ءِ سیمسر ءُ مِید ءُ ماھی کشی کار بلوچستان ءِ مردمانی زندمان ءَ بدل کت کن اَنت ۔
لبز مھرومیت پہ بلوچستان ءَ کارمرز بیت اے باروءَ شمئی ھیال ءُ لیکہ چی اِنت ؟
پہ منی ھیال ءَ مھرومیت ءِ بُن چہ مئی بُنجاھی نندوکانی نادلگوشی ءَ پیداگ بوتگ اگاں پہ اے ھند ءُ دمگ ءَ گیشتر دلگوش گور بہ کتیں مھرومیت ءَ ھچ مانا ءُ بزانتے نیست اَت پرچا کہ ماں اے ھند ءُ دمگ ءَ بازیں شری ءُ بودناکی ھست اَنت اے باندات ءَبلوچستان پہ ایران ءِ دیمروی ءَ ءُ پہ ھرچ کمی ءِ پورو کنگ ءَ یک اوست ءُ امیتے بیت کنت پرچا کہ مارا اِداں 350 کیلومتر ھشکی سیمسر ءُ 900 کیلومتر آپی سیمسر ھست اِنت ءُ دشتیاری ءِ دمگ پہ کشت ءُ کشاری کارءَ یک شریں رنگے ءَ دیم ءَ اتک کنت دلجمیں ھبر اِیش اِنت کہ مھرومیت چہ بُنجاھی نندوکیں زمہ دارانی نادلگوشی ءَ بوتگ ۔
چہ اے مھرومیت ءَ رکگ ءِ ھاترءَ شمئی ھیال چی اِنت ؟
اگاں ما کارپیشداری ءَ دلگوش گور بکن اِیں انسانی دیمروی باوست دیم ءَ کیت ھنوں لھتے بُنکی کار ماں اے ھند ءُ دمگ ءَ بوتگ ءُ باز درآمدیں مردم بزاں گیر میتگی مردم کار کنگ ءَ اَنت بلے میتگی مردم اگاں وانینگ ءُ اے باروءَ پیشدارگ بہ بنت گڑا آ ھم اے کارءَ کت کن اَنت بزاں میتگی مردمانی وانینگ کارزانت کنگ پہ اے ھند ءُ دمگ ءِ دیمروی ءَ باز کمک کت کنت ۔
سیمسری بازار ءِ باروءَ گپ بکن اِت کہ چونی ءَ پہ اے دمگ ءِ دیمروی ءَ کارے کت کنت ؟
ھنوں کارے کہ پہ اے بازار ءِ بنگیج کنگ ءَ باید اِنت کہ بہ بیت داں کہ اے کارءِ شری ءُ زانگ بہ بنت ءُ دیم ءَ آرگ بہ بنت بایداِنت کہ ما گوں پاکستانی دیم ءِ مردماں گپ تران بکن اِیں داں کہ آ نیمگ ءَ ھم آ وتی بُنُکی کاراں دیم ءَ بران بکن اَنت کہ ما چہ دریایی راہ ءَ یک شریں کاربارے کت بکن اِیں بلے اے کار ھما وھدءَ بیت کنت کہ گیشتریں دلگوش گوں لھتے اِدارھاں چو کہ استاندارد ، گمرک ، بھداشت دگہ لھتیں جاھاں گور بکن اِیں ءُ وت پہ وت ءَ ھمشور ءُ ھمتران بہ بئیں مئی وش بھتی اِنت کہ اِداں یک پاجے (اسکلہ ) جوڑ بیتگ چوناھا شیلات ئیگ اِنت ما گوں آیاں گپ کتگ کہ مارا بدئے اَنت ئِے ءُ دریابانی ھم پہ دریایی کاراں یک مزنیں ڈیکی (ستون) یے گوں مارا اے باندات ءَ باید کہ ھمشور ءُ ھمدل بہ بیت.
پسابندن پہ دیمروی ءَ بازیں شریانی واھنداِنت ما توان اِیں کہ پسابندن ءَ پہ ھند ءُ امارات ءُ پہ دگہ کشوراں یک شریں کارجاھے جوڑ بکن اِیں ءُ گوں پسابندن ءِ سیمسری بازارءَ بلوچستان ءِ کارباری باندات ءَ بدلی یے بیاراِیں ھنوں ما گپ تران کتگ لوٹ اِیں کہ کارے بکن اِیں کہ چہ اپریکاءَ گوک پَس پہ ایران ءَ بیاراِیں ءُ برسان اِیں ھمے داب ءَ چہ اپریکاءَ گوژد ءُ شیر ءُ دگہ برگی ءُ آرگی کارباراں بھر بزیراِیں۔
گڈی گپ ؟
پہ منی ھیال ءَ بلوچستان ھما وھد ءَ بدل بیت کنت کہ مارا یک آبادیں ءُ دیم ءَ شُتگیں بلوچستانے ھست بہ بیت اے کارءِ اِلاج ھم ھمیش اِنت کہ ما دیم پہ وانگ ءُ کارزانتی ءَ برواِیں بلوچستان ءِ دیمروی ءِ راھاں چہ یکے کار ءِ جرند ءُ کار ءِ پیداگ کنگ اِنت مروچی بلوچستان گوں بازیں جنجالاں دیم پہ دیم اِنت بزاں ھنچوشیں جنجال اَنت کہ مئی باندات ءِ ورنا یک نگیگیں راھے پہ وت ءَ گچین کن اَنت بزاں کاربار ءِ نہ بیگ وانگ ءِ نہ بیگ اگاں دولت اداں کارپیشداری ءِ کارءَ بنگیج بکنت ءُ اے باندات ءَ گَل ءُ مُچی جوڑ بکنت پہ منی ھیال ءَ اے باروءَ ما یک آباد ءُ دیم ءَ شُتگیں بلوچستانے ءِ واھند بئیں ۔
کارمرز کنوکانی هیال