واکدارانی جاور ھال ماں کرونا ءِ اَرگام پَرگام ءَ ماں سیستان ءُ بلوچستان ءَ

میارجل ھالرسانی بُنجاہ ءِ ھالانی  رِد ءَ مھمد جواد سادکی ءَ نبشت : پد چہ مردمامی ساڑی بیگ ءِ پُرشوریں گھگیری ءَ ماں ریاست جمھوری ءُ شھر ءُ میتگانی اسلامی شورائی ءِ گچین کاریاں؛ چہ کرونا ءِ سبب ءَ پیداگ بوتگیں مرگ ءُ میر ءُ نادراھی ءِ شنگ ءُ تالانی ءِ جاور دیم پہ بدتری ءَ رھادگ بوت ءُ بژن اِنت کہ تاں اَنگت ءَ بے مھاریں رنگے ءَ مردمانی ھَتَراں گاشینگ ءَ اِنت.

بنگیج ءَ مئے جھگیرانی کوکار ماں شورای اسلامی مجلس ءَ بُرز ء آزمان ءَ شُت؛ چہ راج ءِ مُئین ءَ بگر تاں راج ءِ ناسر ءُ چہ ستا ءَ سرباریں جھگیر، پَھکاں، دانکہ بھداشت ءِ مَستر ماں زاھدان ءَ آورت اِش.

سرجمیں واکدار وزیر ءِ کمک کار ءِ پابوسی ءَ ماں بالی پَٹّ ءَ آتکگ اِت اَنت بلے نا سھیگ چہ ایشی ءَ اِت اَنت کہ وزیر ءِ جند پہ مردمانی پابوسی ءَ، نیْامتانی مستری ءِ بستار ءَ اِنّاں بلکیں اے بدھالی ءِ بُندریں میاربارانی ھساب ءَ آتکگ ءُ بھداشت ءُ درمان ءِ بھر ءِ جیڑھانی گُشگ ءِ بدل ءَ آیانی سر ءَ پاد پِر دیگ ءَ گلائیش بوت. اُستاندار ھم کہ نوکی مزنیں درگیجے ءَ سوبین بوتگ اَت ءُ اے بدیں جاور ءِ سبب گچین کاری، چکاس ءُ باورمندی پیش ئِے کُرت اَنت کہ چہ آ نیمگی ٹیبل ءَ زاھدان ءِ شھر ءِ شھریار ءِ آہ ءُ اُپّار چست بوت اَنت ءُ پاد آتک ءُ دَرّائینت ئِے : اے سوَب مُچّاں وت ءَ پہ پُشت یات اَنت بلے اَگاں تئی دل پہ مردماں سُچ اِیت گُڑا تاں اے بدیں بیرانی ءِ آسر ءَ موکلاں بدار.

دگہ یکّے ءَ چہ واکداراں، پہ وتی تھر ءِ جھادی جُنزے ءَ سونوگراپ آورتگ اَت سر زاھر ءَ ایشی ءَ لوٹ اِت بزانت ماں شھرے ءَ کہ  کرونا ءِ مادگ ءَ جاڑ زاتگ، جاڑ نر اَنت یا مادگ؟
ماں رودرآتکی زِربار ءِ آسر ءُ  مُلک ءِ رودرآتک ءِ مالی شَھگان ءِ پیشانی ءُ جھانی کریدور ءَ، واکداراں اَجبیں آلوڑ ءُ بلوڑے کتگ اَت بَلُّک بازار، پیرُک بازار، پلاژ، بندن آزات ءُ کسان دریا ءُ مزن دریا ءِ موکلی، بس دکاندار ءُ بازاریانی تاوان ءِ پُر کنگ پشت کپتگ اَت کہ آ ھم شورای شھر ءِ گچین کاریانی بھا ءُ زیر ءَ جبران کنگ بوتگ اَت.