سلما احمدی | اگاں مئے راج کتاب ءِ وانگ ءِ ھیل ءَ بہ کنت ، مئے چاگرد ءِ درھیں کار ءُ بار شَرّ بنت
چہ میارجل ءِ بنجاھی ھالرسانی ءِ ھالانی رد ءَ ; سلما احمدی کہ داں انی ءَ گیش چہ ۱۰ کتابجاہ ماں بلوچستان ءِ تک ءُ پھناتاں ٹھینتگ ءُ راہ پِرّینتگ ءُ پیسر ءَ اوں بلوچستان ءِ وڑ وڑیں جیڑہ انی بارو ءَ گپ کتگ ، اے رند ءَ ماں یک نند ءُ نیادے ءَ گوں میارجل ءِ ھالکار ءَ گوشتگ کہ من وتی نَزّ ءَ ڈیزل بروکی ءَ نہ مَنّ اں ، چہ اے ھاتر ءَ کہ اگاں منی وتی ھمے پھرہ ءِ دگانی کَش ءُ کِرّ ءَ سنگ ءُ ڈوک ھم بھا کنگ بہ بیت ، پہ زیرگ ءَ مردم ھست . ما گندگ انت کہ چہ دگہ دیریں ھند ءُ دمگاں ، لھتے مردم پہ اُستائی ءُ مزدوری اد ءَ آتکگ انت ءُ کار ءُ چلوپگ کن انت چمشکا من ڈیزل بروکی ءِ منّوک نہ اں . وھدے کہ مئے راج توانت گوں گونڈیں کار ءُ بیاپار ے وتی روزگار ءَ بہ گوازین انت ءُ گس والینی ءَ بہ کن انت ، گُڑا پرچا ڈیزل کَشّی بہ کن انت ؟
اے پڑ ءَ ، شَرّ تریں لیکہ ءُ گپ ، مئے ملک ءُ راجمان ءِ سروک ءُ پیشونک ءَ گوشتگ انت کہ ; ڈیزل بروکی ءِ کسانیں کار ءُ بار ، کاچاک زانگ نہ بنت پمیشکا گھتر انت کہ اشان ءَ وتی کار ءِ موکل دیگ بہ بیت . پہ درور ءَ ۲۰۰ یا ۱۰۰۰ لیٹر ڈیزل وا بازیں بارے نہ انت ءُ دہ روچ ءِ واتر بیگ ءَ پد اوں ، گوں ۲ ملیون کتّ ءُ کماہ ءَ بلکیں بتوان انت وتی روزگار ءِ گس والینگ ءَ بہ کن انت .
اے بانک ءَ ( وتی گپان ءِ دگہ بھرے ءَ ) گوشت ; شَر انت ، اگاں اے ڈیزل بروکان ءَ مالی پلامرزی کنگ بہ بیت ، گھتریں کار ءُ چلوپگانی پیلو ءَ کن انت یا کہ وان انت ءُ دربر انت ءُ اے دابیں کارے ءِ رند ءَ نہ رو انت . چوناھا گندگ ءَ انت کہ اے ڈیزل بروکاں ، وتی شیرکنیں ساہ ءُ جان ءَ وتی لوگمان ءِ گس والینگ ءِ سر ءَ ندر کن انت . ما را بژن ءُ اپسوز انت ، چوشیں جاورھالے ، نے کہ ایران ءَ براہ ایت ءُ نے بلوچستان ءَ .
چوشیں جاورھالاں مئے وتی کِردانی آسرال انت ءُ ما وت ، وتی جاورھال ءِ زمہ وار انت ، مئے چاگرد ءُ راجمان ءِ تہ ءَ بازین ھزگار ءُ ھستومندیں بلوچ ھست انت کہ وتی مال ءُ مڈّی ءَ دگہ جاھاں بنمال بندی کن انت . ماں گوریچی ءُ جھگیری شھرانی تہ ءَ گس ءُ ماڑی اڈّ کن انت ءُ وتی سر ءَ ٹھل انت کہ اگاں یک برے ، آھانی یکے چہ پجاروکیں مردماں سالے ءِ سر ءَ آ ھند ءُ دمگانی شھراں شُت ، آئی ءَ پہ چنتے روچ ءِ جَلّگ ءُ ساسارگ ءَ وتی لوگ ءُ ماڑی انی کلیت ءُ گُشاداں بہ دے انت ءُ ٹھل کن انت کہ ما را تھران ، کرمان ، گوریچی شھراں یا کہ پلان پلان جاہ ءَ چوشیں لوگے ھست .
اے ھزگاریں مردمان ءَ گھتر انت کہ ماڑی انی بدل ءَ ، وتی ھند ءُ دمگانی تہ ءَ یک کارجاھے اڈ بہ کن انت دانکہ اود ءِ ورناھان ءَ کار ءُ چلوپگے دست ءَ بہ کپ ایت . بژن انت کہ مئے ھزگاریں مردمانی مارشتاں دگہ وڑ انت . من کسے ءِ ایرجنگ ءَ نہ لوٹاں بلے بازیں ھزگاریں بلوچ ھست انت کہ راج ءِ پگر ءَ نہ انت . مئے ھستومندیں مردمانی سد ءِ بھراں ، بلکیں ۵ کس وتی مڈی ءَ چہ کاچاک ءُ ردیں کاراں دست آرتگ .
بانک احمدی ءَ ماں وتی گپانی گڈّی بھر ءَ گوشت ; من جزم ءِ سر ءَ چوشیں ھزگار ان ءَ کہ راج ءُ راجمان ءِ پگر ءَ نہ انت ، گُشاں کہ اشاں اگاں بہ لوٹ انت پہ چاگرد ءِ ورنائیں گلاں کار ءُ چلوپگی بہ شوھاز انت چہ آھانی وس ءُ واک ءَ بوت کنت ، بس ھمینچوک کہ وت ءَ را چہ وتی وتگڑیں بازیں لوگ ءُ ماڑی انی اڈ کنگی مارشتاں ، ماں دیر سریں شھراں بہ چوٹّ این انت . چوشیں جنجٹانی سَوَب اوں ، بس مئے راج ءِ نا وانندگی ءُ دربرگانی کَمّی انت . مئے راج ءِ لھتے مردمان ءَ کتاب ءِ وانگانی بدل ، کم سردریں مردمانی نند ءُ نیاد دوست ءُ پسند بیت ءُ اے گرانیں تورشتے انت .
رجانک : میرجلال
کارمرز کنوکانی هیال