پوشنزانی وڑ وڑیں اُرش پہ مالدار ءُ آیانی مالانی سر ءَ ماں بلوچ سر ڈگار ءَ + تامُر
میارجل ءِ رسانکدر ءِ بُنجاھی ھال ءِ رسانکدری ٹول ءِ ھال ءِ پد ءَ : ھر سال ماں دگہ دگہ آبند ءُ آبریچاں بلوچستان ئیگ ءَ مالدارانی مال پوشنزانی ارشانی دیمپان ءُ وراک بنت ءُ اِے وڑیں کمیابے جناور مزنیں زیان مردماں دیگ اِنت اَبید چہ ایشی ءَ کہ اے پوشنزانی بیڑ ءُ ارش ءِ زیانی باری پہ مالداراں چہ مھیت زیست ءِ نیمگ ءَ دیگ بہ بیت ۔
پیش چہ ایشی ءَ کہ دراج کشیں ڈکال ءُ بے آپی ءَ بلوچستان ءِ مالداری ءُ کشت ءُ کشار کہ گدام نندیں مردمانی بُندری آمدنی ءُ زندمان ءِ گوازینگ ءِ سوب اِنت ،ھشک بوتگ ۔
انی پد ءَ ھمے سالاں ھور ءُ گواران ءِ سوب ءَ یکبرے پد ءَ ماں ڈیھ ءَ مالداری ءَ نوکیں دروشم ئِے بکش اِتگ ءُ مال ءِ دارگ ءِ وڑ ءُ وج ئِے وشتر کُتگ ، بلے بژن پہ اے چنتیں سالانی توک ءَ ماں کوھستگ ءِ ابریچ ءَ ھاسکار : گرگان ،بُرز ءِ مکی ، جھل ءِ مکی ، سبز ءُ باکور ماں گھ ءِ آبند ءَ پوشنزاں بازیں پس ءُ میش ءُ گوک کُشتگ ءُ وارتگ اَنت بہ گر چہ ایشی ءَ کہ آیانی زیانی مالداراں دیگ بہ بیت۔
ھمے وڑ ءَ پوشنزانی بیڑ ءُ ارش ءَ یات بیتگیں بُرز ءِ آبند ءُ آبریچ ءَ بازیں مردمے ٹپیگ بوتگ کہ پوشنزانی گڈی ارش پہ انسان ءَ چھل ءُ پنچ روچ پیش ، پِیش کَپت کہ اِے جناور ءِ بیڑ ءَ یک کسانکیں گونڈوے ءَ کہ چہ سر ءُ گردن ءَ سک سل ٹپیگ بوتگ اَت ءُ کہ پِت ءِ سوب ءَ چہ پوشنز ءِ دست ءَ دست کزا کُنگ بوت ۔
ھر وڑ ءَ کہ بہ بیت بژنے گپے اگاں اِے مالی ءُ جانی زیانی کہ پہ دمگ ءِ مردمانی سر ءَ چہ پوشنزانی سوب ءَ آتکگ پُر کنگ مہ بیت اِے ترس ھست اِنت کہ مردم ءُ جناورانی زندمان ءِ میانجی ءَ یک دیرائی یے جوڑ بیت کہ پوشنزانی نسل ءُ پدریچ ءِ گاری ءِ سوب ماں اِے ملک ءَ بہ بیت ۔
پیشگین سالاں ھم کہ سیاھیں مَمّ ءِ اُرش ءِ سوب ءَ چار کس چہ ھمے آبریچ ءِ دمگیاں ٹپیگ بوتگ اَنت کہ لھتینانی آزا سندگ بوتگ اَنت کہ ایشانی زیانی ءُ نُکس ھم پر کنگ ءُ دیگ نہ بیتگ اَنت ۔
ھمے انی یک گَلّے "نذر طبیعت " ءِ نام ءَ کہ دمگی مردمانی ءُ "ھیات وھش" ءِ میانجی ءَ آستیگ ئِے لانتکگ اَنت کہ امیت وار اِیں کہ اے وڑیں کارانی دیم گری بہ بیت کہ سیاھیں ممّ ءُ پوشنزانی کشت ءُ کوش ءِ ترس ءَ کم بہ کنت ءُ یکبرے پد ءَ اے کوھنیں دوستی ءَ کہ بلوچ مردمانی ءُ زید ءُ کھچرانی جناورانی میانجی ءَ مھرتر ءُ برجم بہ کنت ۔
کارمرز کنوکانی هیال