نازبی بی گوں وتی پس ءُ مالاں گنداوگ ءِ ھار ءُ ھیروپ ءِ کُربان بوت انت . اے وئیل ءِ زمہ کے سر ءَ انت ؟

چہ میارجلّ ءِ بنجاھی ھالرسانی ءِ ھالانی رد ءَ ; واجہ پیز مھمد زین الدینی ءَ دَرّائینت : گنداوگ ءِ رس اتگیں ھالانی سر ءَ ، دوشیگیں شپ ءَ ناز بی بی دامنی مزار ءِ زھگ ءَ ، ماں پاسک ءِ ھبیلی ءَ پہ وتی پَس ءُ مالانی رَکّینگ ءِ ھاتر ءَ کور ءِ تہ ءَ ماں داتگ ءُ آمال ءَ گوں وت ءَ برتگ انت .

اے واجہ ءَ گیش کت کہ اے مَزَن سالیں زالبول ، رند چہ ھلک ءِ مالدارانی بے ترانی ءَ چہ ھلک ءِ پس ءُ مالاں کہ کئور ءُ شیپانی تہ ءَ پشت کپتگ انت ، پہ وتی مالانی رکینگ ءِ ھاتر ءَ کئور ءِ تہ ءَ ماں داتگ ءُ اے نیام ءَ چہ ھار ءِ زوراکی ءَ ، وت ءُ مالاں ھور ، اے وئیل ءِ آماچ بوتگ انت .

گنداوگ ءِ جھگیری بکشدار وتی گپانی رندگیری ءَ تران کت ; موسم زانتی ءِ کارگس ءُ اُگدہ داراں ، پیسر ءِ موسمی جاورھال ءِ نگیگی ءِ بارو ءَ لھتے بیم باہ ءِ ھال درشاں کتگ انت بلے چہ اے ھاتر ءَ کہ ھند ءُ دمگ ءِ رسانکدری بنجاھاں چہ گوانکوانی ٹاپار ءُ دامگ ءُ دگہ اوزار ءُ سامانانی آسراتیاں کُھت ءُ کمّی ءِ سردچار انت دمگ ءِ بازیں کلگ ءُ آبادی اں چہ رسانکدرانی بنداتی آسراتی اں چوشکہ وت گند ءُ وتگوشانی توار ءُ برمشاں ھم نا دزرس انت پمشکا چوشیں جنجٹانی وھد ءَ چہ گیدی ءُ ھند ءُ دمگ ءِ ھال ءُ ھبراں چوشکہ موسم زانتی ءِ اھوالاں سھیگ ءُ مالوم دار نہ بنت ءُ چوشیں وئیلانی گوم ءَ دیم کپ انت .

ما را امیت انت کہ ملک ءِ زمہ وار اں پہ ھند ءُ دمگ ءِ چوشیں بن ھشتانی بارو ءَ توجیلے بہ کن انت ءُ رسانکدری پڑانی سر ءُ گوانکوانی دامگ ءِ نزوری ءُ کھت ءِ بارو ءَ ، نوکیں شورے بند انت دانکہ لس مردمان ءَ رسانکدرانی پورہ ایں دزرسے بہ بیت .

رجانک : میرجلال