مئے دمگ ، بے دوائی ءُ بے دکتری ءِ جنجٹانی آماچ انت

زراباد دمگ ءِ اسلامی شورجاہ ءِ کماش ، ماں گپّ ءُ ترانے گوں میارجل ءِ ھالکار ءَ گوشت ; سلامتی ءُ جاندراھی ، چہ ھر چاگرد ءِ بُنھشتی زلورتان انت ءُ اے تک ءُ پھناتانی سر ءَ ، الکاپیں دلگوش گوَر دیگ ءِ زلورت انت . 

اے واجہ ءَ گیش کت ; پھرہ ءِ جاندراھی ءُ سلامتی زانشتجاہ ءِ کولہ روی ءُ کاھلی انی کچّ ءُ کساس ، چہ اے دگہ کارگساں اد ءَ گیشتر گندگ بنت ءُ اے نزوریں کارپداں ، دشتیاری دمگ ءِ لس مھلوک ءِ بازیں مونجائی ءِ سَوَب بوتگ .

دشتیاری ءِ اسلامی شورجاہ ءِ کماش ءَ تران کت ; مئے دمگ ءِ دکتری ءُ درمانی ءِ شلگرہ اں وتی سیمسر اں سِستگ ءُ کُھت ءِ ھَدّ اں سر بوتگ ، چہ اے ھاتر ءَ کہ اد ءَ ھچّ اگدہ داریں مردمے ، لس مھلوک ءِ مونجائی ءِ پَسّو ءَ نہ دنت . راج ءِ بزگیں مردم چہ سداں کیلومتر دیریں راھاں اد ءَ کاینت دانکہ وت ءَ یک درمان جاھے ءَ سر بہ کن انت بلے درمان جاھانی تہ ءَ نئے دوائے گواہ ایت ءُ نئے کہ دکترے چِش ایت ، پمیشکا مئے راجمان ءِ مردمان ءَ ، گیش چہ وتی تورشتانی مارگ ءَ ، بے دکتر ءُ دوائی ءُ ھند ءُ دمگ ءِ جاندراھی ءُ سلامتی ءِ زمہ وارانی نا سردری ءِ درد اں ھم سَگَّگی انت .

واجہ ایزد پناہ ، مردمانی سلامتی ءُ گھبودی ءِ چیرساچیں بستارانی بود ءُ دیمروی ءَ ، اے پڑ ءِ اسلی ایں جیڑہ ءُ بنگپ زانت ءُ گیش کت کہ سال ۱۳۹۹ ءِ بھمن ماہ ءَ ، لھتے گِھداشتی لوگ ءُ جاھانی بندات کنگ ءِ ٹیکُم ، اے دمگ ءِ کلگانی زمین ءِ سر ءَ جَنَگ بوت انت بلے ۲ سال ءِ گُوَزگ ءَ پد ھم ، دیمروی ءِ جاورھال انچوش کہ اولیگیں روچانی وڑ ءَ ، اوشت ءَ آماچ انت ءُ چہ وتی جاہ ءَ دیم ءَ نہ جنز اتگ ، ماں چوشیں کوراسی اں ، دمگ ءِ جھمنندیں مردمانی سد ءَ چہ ، ۹۵ بھر ، کلّگ ءُ ھاری انی نندوک انت ءُ پہ وتی سلامتی ءُ جاندراھی ءِ آسراتی اں ، گیشتر ھمے گِھداشتی لوگانی چم دار انت . 

اے واجہ ءَ وتی گپّانی گُڈّسری بھر ءَ درّائینت کہ دشتیاری یک سیمسری دمگے انت ءُ پاکستان ءِ سات ءُ سَپر کنوکیں مردماں ، چہ ھمے سیمسر ءَ مئے ملک ءَ کاینت ، پمیشکا چوشیں چست ءُ ایر انی ھاتر ءَ ، مئے مُلک ءِ جاندراھی ءِ زمہ واران ءَ ، ھاسیں دلگوشے گُوَر دیگ لوٹ ایت/ رجانک : میرجلال .