مکرّان ءِ مردمانی دود ءُ روبیدگاں ماں روچگانی ماہ ءَ

چہ میارجل ءِ بنجاھی ھالرسانی ءِ ھالانی رد ءَ ; بلوچ راج گوں نوکیں گُد ءُ پُچّانی زیرگ ءُ دوچگ ، لوگ ءِ پَلگار ءُ سَلّھگ ءَ ، روچگانی ماہ ءِ مبارکیں ائید ءِ پیشوازی ءَ رو انت . میتگ ءُ بازاران ءُ بھا بریدی بنجاھاں ، اے ماہ ءِ گُڈّی روچانی درگت ءَ ، چہ بازے ھما گِراکیں مردماں سرّیچ بنت کہ ائید ءِ سامانانی زیرگ ءِ ھاتر ءَ دیم پہ چوشیں جاہ ءُ بازاراں آتکگ انت .

بلوچاں پہ وتی ائید ءِ روچ ءِ ھاتر ءَ ، گھتریں گُد ءُ پُچّ ءُ پازوار ءَ شوھاز انت . سوچَکی ءُ وشّیں بوو ءُ آتار اں چہ ھر بلوچ لوگمانے ءِ زلوری ایں سامان انت کہ رند چہ لوگانی پَلگارگ ءُ سَلَّھَگ ءَ ، وت ءُ وتی لوگمان ءِ مردمانی گُد ءُ پُچّاں گوں وشیں بُوّاں آتار دے انت ءُ دیم پہ ائیدگاہ ءِ روگ ءَ تیار بنت . اے مردماں پیش چہ ائید ءَ ، وتی نوکیں گُد ءُ پچّان ءَ پہ دوچگ ءَ ، درزی انی گُوَر ءَ بر انت . اے روچ ءَ لوگ ءِ پلگارگ ءُ سلّھگ اوں ، زالبولانی ڈوبہ ءِ سر ءَ انت . 

ائید ءِ پیشی شپ ءَ ، جنیں دُتّگ ءُ زالبولاں وتی دستان ءَ ھِنّی لوج انت ءُ براہ داریں نکش ءُ ندارگانی سر ءَ سینگار انت . دستانی ھِنّی اں اوں ٹوھیں زالبولاں یا کہ پھتگ ءُ کتہ کاریں مردمانی گوم ءَ رجینگ بنت .

اے ماہ ءِ آھری روچ ءِ بیگاہ ءُ سرشپ ءِ درگتاں ، ماہ ءِ " نوک " چہ مردمانی نیمگ ءَ شوھازَگ بیت ءُ چہ اے کار ءَ رند ، مردماں وت ءَ پہ بانداتگیں ائید ءِ روچ ءِ جریدگ کن انت .

روچگانی ماہ ءِ روبیدگاں

پاکی ءُ سَلّہ ای

ائید ءِ روچ ءِ سھب ءِ ماھَلّہ ، مردماں وتی جان ءَ شود انت ءُ نوکیں گُد ءُ پُچّ ءُ کوش ، ( مردینانی گیشتر اسپیتیں رنگ ) پِر ءُ پاداں کن انت . سر ءِ میداں رَند انت ءُ دیم ءَ ھم براہ دار کن انت .

رَگبند .

ائید ءِ روچ ءِ رگبند یک شیرکن ءُ وش تامیں وراکے کہ آئی ءِ نام سیوہ ای انت ءُ چہ بارگ ءُ شیرکنیں رِشتگاں جریدگ بیت . پہ سیوہ ای ءِ تیاری ءَ ھمے بارگیں رشتگان ءَ لھڑیں آپ یا کہ شیرانی تہ ءَ جوشین انت ءُ لھتے وھداں ملکی روگنی نگن ءِ ھوری ءَ وَرَ انت .

ائید ءِ نماز 

مردیناں ، ائید ءِ سھب ءَ براہ داریں ڈیل ءُ ڈولے ءُ وتی پِر کتگ ایں نوکیں گُدانی گوم ءَ ، رُمبانی سر ءَ گوں " اللہ اکبر و اللہ اکبر لا الہ الا للہ و اللہ اکبر ءُ اللہ اکبر و للہ الحمد " ءِ دَپی لھمیں نارہ ءِ توار ءَ ، نماز ءِ برجم دارگ ءِ ھاتر ءَ دیم پہ ائیدگاہ ءَ رو انت .

ائیدگاہ یک پراہ ءُ سرپچیں پٹّ ءُ میدانے انت کہ ھرچ دمگ ءِ جھگیر ، یا کہ بَکش ءُ کلّگے ءَ کہ ھما ھند ءِ دلگاہ انت .

 نماز ءَ رند ، لوگانی پِر تَرّگ ءِ وھد ءَ یک دودے ھست کہ آئی ءِ رد ءَ مردمان ، آتکگیں دروازگ ءِ بَدَل ءَ چہ دگہ دروازگے ءَ در کپ انت . 

نماز ءِ وانگ ءَ پد ، ھکّ پھلّی ءِ دود برجم دارگ بیت . ھک پھلی اے داب انت کہ مردماں ، ائید ءَ بِگِر داں ۳ روچ ءَ ، نیاد ءِ وھد ءَ یکادگر ءَ ھمباز کن انت ءُ " وتی ھک ءَ پھل کن" ءِ گالانی درشانی ءَ گوں چہ ھمدگر ءَ پھلی لوٹ انت . 

گِند ءُ گُزار .

بلوچ مردماں پہ ھکّ پھلّی ءِ ھاتر ءَ یک ءُ دگر ءِ لوگاں رو انت ، پمیشکا ائید ءِ درگتاں ، پہ گند ءُ گُزار ءِ گھتریں وھد ءُ موہ انت . 

ھما مردماں کہ شھرانی نندوک انت ، اے نیمون ءِ سر ءَ ، وتی سیاد ءُ وارسانی گندگ ءَ دیم پہ پت ءُ پیری کلگ ءُ آپسراں روانت ءُ اے دود ءَ داں ۳ روچ ءَ برجم دار انت ءُ اود ءَ ، ھما ملک ءُ چاگرد ءِ دیمروی ءِ بارو ءَ وتی کماش ءُ ریش اسپیتانی گوم ءَ شور ءُ سلاہ کن انت . لھتے اوں ایوکی یا کہ وتی لوگمان ءِ مردمانی ھمراھی ءَ ، پہ ترّ ءُ تابے ءَ ھند ءُ دمگانی وڈّ ءُ گیابی جاھاں رو انت ءُ آ جاگہ ءَ یک شپے یا کہ گیشتر ءَ ، مان انت ءُ ھنکین کن انت . 

ماں بلوچستان ءَ ، زالبولان ءَ ائید ءِ نماز ءِ روگ ءَ موکل نیست ءُ جنیناں اے درگت ءَ وتی لوگانی تہ ءَ نند انت ءُ ائید ءِ ورد ءُ وراکانی تیاری ءَ کن انت . گونڈوئیں زھگاں اوں ائید ءِ وھد ءَ چہ وتی پت ءُ مات ءُ گُزر ءُ مستراں ، ائید ءِ ٹیکی ءُ بکشوشگ ءَ لوٹ کن انت . 

بلوچ راج ءِ ائید ءِ مدت داں ۳ روچ انت مردماں ، وتی کار ءُ چلوپگ ءَ بند انت ءُ گند ءُ گزار کن انت . اگاں کسے ءِ آزیز ءُ دلدوستیں مردمے پیسر ءَ بیران بوتگ ، آئی ءِ سیاد ءُ وارساں ، ھما سیگیں مردم ءِ لوگ ءَ روانت ءُ آئی ءَ دلبڈی دے انت .

ھچ رنگ ءَ مہ کئیت پہ تو درداں بدیں شھمات 

منی دوست ءُ منی ھمبل ، ترا ائید مبارک بات . 

رجانک : میرجلال