بلوچستان ءِ تہ ءَ پھلوان پلورینی ءِ جلّ ءُ گیگ نیست
میارجل ءِ بنجاھی ھالرسانی ءَ چہ وتی مول ءُ مکسدانی رد ءَ پہ ھاسیں مردم ءُ ملکی کماش ءُ روبیدگی ءُ چاگردی بامردانی پجّارینگ ءَ ، نند ءُ نیادے ءَ گوں واجہ عبداللہ حسین بر، کہ یک شستونی لیب کار ءُ پھلوانے انت برجم داشتگ .
جست ; دزبندی کناں وتی پورہ ایں پجّار ءَ بہ کن .
پسّو ; من عبداللہ حسین براں ، لیب ءُ گوازی ءِ میان اُستمانی پڑانی چُنت رند ءِ پھلواں .
ج : چنت سال انت کہ لیب ءُ گوازی کنگ ءَ ئے ءُ اے راہ ءَ کے ءَ تئے پلّامرزی کتگ ؟
پ ; ۲۵ سال انت کہ لیبی میڑانی پڑ ءَ جھد کنگ اں . پیسر ءَ کسّے ءَ منی پلامرزی نہ کتگ بلے منی جند چہ وتی چکاسی مارشتانی سر ءَ اے تک ءُ پھنات ءَ بود کتگ ءُ میڑوکے بوتگاں .
ج ; دان انیگ ءَ وتی جھدانی کجام جاہ ءَ سر بوتگ ئے ؟
پ ; چہ پاکیں ھاوند ءِ مھرا ، اولسر ءَ "شائولین چوان" ءِ باج بروکی ءَ رند ، چہ اسلامی ایران ءِ اے لیبی گلّ ءِ نیمگ ءَ ، پہ ھنگ کنگ ءِ میان اُستمانی چکاسان ءِ بھر زیرگ ءَ لوٹگ ءُ تَلَپَگ بوتان ءُ پدا ھم لھتے دگہ میان اُستمانی ءِ جام ءُ چکاساں ، گرجستانی ملک ءِ آزات جام ءَ ، سُھر ءُ تلاہ ءِ اولی باج بروک بوتگاں .
ماں کیش ءِ چکاساں کہ گیش چہ ۱۰۰ ملک ءَ اود ءَ بھر زُرتگ ات ، من اولی باج ءَ برتگ ءُ ھنگ کنگ ءِ مُلک ءَ ، ماں "اور آسیا ءِ چکاسانی رد ءَ دومی نپر ءِ باج ءَ برتگ . تُرکی میان اُستمانی چکاساں اوں کہ ماں "انتالیا" ءِ شھر ءَ برجم دارگ بوتگ ، سَیُمی نپر ءِ باج ءَ کٹّ اتگ ءُ برتگ . گیدی ءِ تہ ءَ ، وتیگی دیمپانی ءِ بنجاہ ءِ باسک ان ءُ لھتے دگہ لیبی بستار .
ج : تئے ھاسکاریں پیسروک ءُ چیدگ ، ماں لیبی تک ءُ پھناتاں کے انت ؟
پ; گیشتر تامری لیبانی بامرداں چوشکہ ، بروس لی ، جکی چان ءُ محمد علی کلے انت .
ج : تئے لیکہ پہ بلوچستان ءِ لیبی واک ءُ وَس اں کہ دنیگت ءَ شوھازگ نہ بوتگ انت چے انت ءُ اے بارو ءَ چوشیں واک ءُ وس اں چہ پیم ءَ بود کار انت ؟
پ ; ماں بلوچستان ءَ بازیں بستارے اے پڑانی تہ ءَ ھست انت ، انیگیں سر وَھد ءَ واجہ شہ بکش ماں مُشتکی ءِ لیب ءَ کہ توانتگ وت ءَ را " المپیکی ءِ جاھاں سر بہ کنت ، باز ٹوھیں گامگیجے زرتگ ءُ چہ منی دیدانک ءَ ، ملک ءُ دمگ ءِ یک بلاھیں ھستیگ ءُ مڈّی ئے انت ءُ مئے ھلاکہ ءِ زمہ واریں اگدہ داران ءَ واجہ شہ بکش ساھب ءِ پلامرزی ھژدری انت دانکہ اے واجہ ءَ وتی لیبی جھدانی پَٹ ءُ میدانانی تہ ءَ ، شرّی سر ءَ بہ رکش ایت . چوناھا مئے دمگانی تہ ءَ پھلوان پلورینی ءِ جلّ ءُ بُنی بستارے چوشکہ اے دگہ ھلاکہ اں نیست ءُ لھتے وش میاتک ھم کئول ءِ مردمانی ، اے دمگانی لیبی جدّ ءُ جھد ءُ لیب کنوکانی واھگدار نہ انت ءُ اشانی دیمروی ءَ نہ لوٹ انت .
ج ; ترا چونیں سوگہ اے پہ بلوچ راج ءِ ورناھاں ھست ؟
پ ; منی سوگہ اش انت کہ میے لیب کاریں ورناھاں ، وتی مول ءُ مکسدانی سر ءَ گوں پورہ ایں ھاٹیگے ءَ دیم ءَ بہ جُنز انت ءُ چہ بدواھانی ڈوک ءُ ڈنگرشانی ءَ پاترپاں پد مہ کِنز انت دانکہ وتی واھگانی ٹِلُک ءَ سر بِہ بَنت .
ج ; دگہ گپّے اگاں ترا ھست بہ گُش ؟
پ; چہ شما ءُ بلوچ راج ءَ کہ من ءَ مھر داتگ ءُ پلامرزی اش کتگ منتوار اں.
رجانک : میرجلال
کارمرز کنوکانی هیال