چھبار ءِ شورای شھر ءِ ھپت کُرشی ءِ دزگرگ ءِ داواداراں، دلجم مہ بئیت!

میارجل ھالرسانی بُنجاہ ءِ ھالانی  رِد ءَ، مھمد جواد سادکی ءَ نبشت : شھر ءِ شورایانی گچین کاری ھاس چھبار ءِ کہ ھر سال ءَ  سرجم  ءَ ربیتی، راجی، بومی گرایی، مالی زَد ءُ بند ءُ کماشانی دیوان ءِ رد ءَ گچین کنگ بوتگ اَنت، بلے اے دورہ گوں گْوستگیں دَورھاں دگری داراِیت، پرچا کہ 20 سال ءَ پد اے رھبند نہ تھنا کار ءَ نیاتکگ بلکیں چھبار ءِ شھر دیمروی ءِ بدل ءَ گیش ءَ چہ گیش پُشت ءَ شُتگ، پھکیں شھرونداں اے بے سوبی ، نازانتیں گچین کنگ ءَ ماں شھری پارلمان ءِ باسکانی گچین کاری ءَ زان اَنت.

ماں اے دورہ ءَ ایشی ءِ چپ کہ بازینے دْرستیں چیزاں آسر ءَ رستگیں زان اَنت ءُ 7 مردم وت ءَ  کرشیانی واھُند سرپد بنت باید بزان اَنت کہ اے بری ھچ چیز پیش گُشی کنگ نہ بیت پرچا کہ چھبار ءِ شھروند ءُ مردماں دْرستانی آپ گْواز کتگ، شرّی سر ءَ زان اَنت کہ شورا ءِ شھر ءِ بازیں کرشیانی اُمیت وارے ءِ گچین کنگ آیانی نپ ءُ سیت ءَ نہ اِنت ءُ دیم ءِ گچین کاریاں گوں پَچیں چمّ ءُ  گستا چہ سیاسی گِر ءُ دار، راجی "تعصب"، مالی گِر ءُ بنداں، لائکیں مردماں گچین کن اَنت.

ماں اے دورہ ءَ ھما مردمانی گچین کنگ کہ وت ءَ چہ پیسر ءَ شھر ءِ شورائی ءِ کرشیانی باج بر زان اَنت 20 درسد اِنت  پرچا کہ 40 درسد چہ ھما شھرونداں کہ بومی نہ اَنت آیانی گچین پہ بھا زورگ نہ بنت ءُ دگہ 40 درسد ھما اَنت کہ پہ زانت گچین کن اَنت، گڑا اے دورہ ءَ گوں پیشی دَورھاں دگری داراِیت ءُ چہ پیش گُشی ءِ ھساب ءَ دَر اِنت.

بر ھال چہ چھبار ءِ شھرونداں لوٹیں کہ اے دورہ ءَ بیا اِت گستا چہ ھر چیز ءَ، کاری ئیں مردماں گچین بکن اِت ءُ چھبار ءِ شھر ءَ چرے جاور ءَ بہ رکّین اِت ۔