بانکلینک یک باز واھگداریں سوزی ئے ، بانکلینک واریں مردماں اے بنگپ ءَ شَرّی ءِ سر ءَ بہ وان انت

چہ میارجل ءِ بنجاھی ھالرسانی ءِ ھالانی رد ءَ ; بلوچستان گوں وتی پراھی ءُ شاھگانی ءَ بازیں وراکی بَکَلانی کِشار جاہ انت . بانکلینک ھلاکہ ءِ یکّے چہ ھمے رد ءِ بَکَلان انت . اے بَکَل ءِ ڈالنگ ءِ برزی داں یک ءُ نیم متر بیت ، آئی ءِ تاک پَتَن ءُ ڈالِنگ ھم چوشکہ بارَگ ءُ نازرکیں نَلے ءِ وڑ ءَ انت . بانکلینک ءِ کِشت ءُ کَشاری نیمون ماں اے ھلاکہ ءَ چہ آئی ءِ آپ ءِ کم ھاجتی انت . اِشی ءِ بَر اں پہ وَراک ءُ آئی ءِ پُلّ ءُ گلاں ھم ، دوا ءُ درمان ءِ جَرّ ءُ دارے ءِ ھساب ءَ زانگ بیت کہ چہ پلّانی جوشینگ ءَ ماں لھڑیں آپاں ، پہ لھتے نادراھی ءَ جوڑینگ بیت . بانکلینک ءِ تاک ءُ ڈالنگاں ھم مال ءُ دلوتانی وراک انت .

اے بَکَل ماں بلوچستان ءَ چہ مھرجان داں آبان ماہ ءِ درگتاں کِشَگ بیت ءُ چہ اے ھاتر ءَ کہ پہ وتی ردوم ءَ کَمّو سارتی ءِ لوٹوک انت ، ھر سال ءِ ایر اَھت ءِ سروھد اں ، بانکلینک ءِ کِشَگ ءِ گھتریں درگت انت . بانکلینک مئے ھلاکہ ءِ زرباری دمگاں چوشکہ شستون ، واش ، بنپور ، پھرہ ، گِہ ءُ گنداوگ ءِ آپسر اں رُد ایت ءُ بود کنت . بانکینک ءِ کِشَگ ءِ وڑ چہ زمین ءُ ڈگار ءِ تنکی ءُ پراھی ءِ ھساب ءَ ، ۲ داب انت . گونڈیں ڈگارانی تہ ءَ بانکلینک ءِ کشَگ ءِ ھاتر ءَ ، اول سر ءَ آئی ءِ دانان ءَ یک شپے ءِ دراجی ءَ آپانی تہ ءَ میسین انت ءُ رند ءَ ھمے میسینتگ ایں دانان ءَ گوں یک اوزار یا کہ ھاکوچے ءَ ، ھاک ءِ تہ ءَ کَلّ کن انت . ماں پَٹّ ءُ پراھیں ڈگار اں ، پیسر ءَ زمین ءَ گوں ننگار ءَ شوم کن انت ءُ رند ءَ بانکلینک ءَ دانان ءَ ھما زمیں تہ ءَ چَنڈ انت ءُ پاش انت ، چہ بانکلینک ءِ تُھمانی چنڈگ ءَ پد ، آ زمیں ءَ گوں کُراز نامیں اوزارے ءَ ساپ ءُ تَچک کن انت ءُ آئی ءِ تنگ ءُ بندان ءَ جوڑین انت .

بلوچ لس مھلوک بانکلینک ءَ لھتے وڑ وڑیں دابانی رد ءَ پَچ انت ءُ ور انت . جھل ءِ داتگیں سرپدی اں بانکلینک ءِ پَکَّگ ءِ وڑانی بارو ءَ انت .

پونٹ ; آپ ءِ تہ ءَ پکّتگیں بانکلینک ءِ گوم ءَ ، گھنیچ ءُ سوزیں پیماز ءِ سوزی ءَ ھوار کن انت . اے ھواردگیں وراک ءَ پونٹ گوش انت ، پونٹ ءِ وراک ءِ ھوری ءَ ترُپش ءُ وشتامیں شیر ھم ور انت .

دانکو ; سوزیں بانکلینک ءِ بَرانی سروھد ءَ ، دانکو ئیں بانکلینک ءَ بازیں لوٹوکے ھست انت ، دانکو چہ سوز ءُ نازرک پوچیں بانکلینک ءِ بَرانی سُھر کنگ ءَ ماں لھڑیں روگن ءَ تیار ءُ جریدگ بیت ، دانکو یک میان وھدیں دمیری وراکے انت . 

بٹّ ءُ بانکلینک ; بانکلینک ءِ گرادگ ءِ یک دگہ وڑے ، بٹّ ءُ بانکلینک انت پہ اے کار ءَ ، آئی ءِ نازرک پوچکیں دانان ءَ بٹ ءِ توک ءَ گراد انت ءُ ھمے کَش ءَ ، گوں مُلکی ترپش ءُ وشتامیں شیر ، گونڈیں پیماز چوک ءُ لھتے بر ءَ ، گوں پَکِّتگیں مُرگ ءُ ماھیگ ، ھوری ءَ ور انت . 

سَمبوسَہ ; چہ بٹّ ءُ سوز ءُ پوچ گِپتگیں بانکلینک ءِ ھوری پَچَگ ءَ سمبوسہ اڈّ کنگ بیت ، البت لھتے بر ءَ سمبوسہ چہ ھُشک ءُ بے پوچیں بانکلینکانی داناں کہ زرد دروشم انت تیار کنگ بیت .

کَدو بانکلینک ءِ نارُشت ; چہ ھُشک ءُ بے پوچیں بانکلینک ءِ ھوار کنگ ءُ گرادگ ءَ گوں مُلکی نوک ءُ تَرّیں کدو ءَ ، وشتامیں نارُشتے اڈ کنگ بیت .

کوھَل ; یک میان وھدیں دمیری وَراکے انت کہ زمستان ءِ موسم ءَ پَچَگ ءُ ورگ بیت ، بلوچی دمگانی تہ ءَ مات ءُ بَلّوکاں ، گونڈوئیں زھگانی دنتان رودینگ ءِ وھد ءَ ، پہ دنتان رودی ءِ نیمون ءَ کہ بلوچ راج ءِ دود ءُ روبیدگے انت ، یک میان وھدی ورگے ءَ ھمے نام ءِ سر ءَ اڈ کن انت ءُ وتی ھمساھگیں مردمانی تہ ءَ بھر ءُ بانگ کن انت . دنتان رودی ءِ وَراکی ، چہ ھُشکیں بانکلینک ءُ گندیم ءِ دانانی ھوری گرادَگ ءَ گونڈیں زھگانی دنتانانی درایگ ءِ درگت ءَ تیار کنگ بیت .

بانکلینک ءِ نپ ءُ سیت اں ; چہ اے ھاتر ءَ کہ بانکلینک ءَ لھتے مادنی برام چوشکہ فسفر آھن ، کلسیم گون انت ، آئی ءِ وَرَگ ءَ بازیں واھگدارے ھست . بانکلینک پہ مردمانی جون ءِ " منگنز " ءَ ، یکے چہ ھزگاریں وراکی ان انت ءُ ھمے ھاتر ءَ ھم ، وَرَگ بیت ، پمیشکا اے وراکی ، مردم ءَ چہ ھڈّانی پودَگی ءِ نادراھی ءَ رکّین ایت ، اے رد ءَ لس مھلوک توان انت گوں بانکلینک ءِ ورگ ءَ چہ وتی سلامتی ءُ جاندراھی ءَ دلجم بہ بنت .

انچوش کہ شما درستان سرپد اِت ھون زور ءِ بُرزی ءِ نادراھی ، چہ اُمر ءِ گُوَزَگ ءَ ، دل ءِ نادوری ءِ سَوَب بیت پمیشکا بانکلینک ھون زور ءِ نادراھی ءَ کم کنت

رجانک : میرجلال