بانک سارا وشکوی ءِ ھاسیں نبشتانک کہ بلوچستان ءِ مچانکی ءُ سیاسی کارندھے /ماتی زبان ءِ جاگاہ ماں آمو

بانک سارا وشکوی ءَ کہ بلوچانی مچانکی ءُ سیاسی لیڈر ءُ کارندھے کہ ماں یک ھاسیں نبشتانکے ءَ پہ میارجل ءَ نبشت ئِے : چو کہ زبان ناں ایوک ءَ ماں انسانانی میانجی ءَ رھوت کنگ ءِ یک وسیلہ ءُ اوزارے ، بلکیں مارشتانی درانگاز ءُ سر کنگ ءِ ھم یک سوبے ، ماں چاگرد ءَ سَسّا ءُ پگرانی بَلینگ ءِ ھم یک اوزار ءُ وسیلھے  کہ زبان مزنیں یک بستارے ءِ واھُند اِنت ءُ باید آئی ءَ سک باز دلگوش بہ دے اِیں.

ھاسکار کہ زبان دربرگ ھژدری ئیں کارے ءُ پد ءَ دربرگ پہ انسانانی مجگ ءُ پگرانی ساٹگ ءُ تیار کنگ ءِ ھژدری تریں چیزے گڑا چاگرد ءِ دیم روی ءِ بن ھِشت ءَ زبان جوڑ کنگ اِنت ءُ زبان ءِ دلگوش دیگ ھاسکار پہ کسانیں چکانی وانینگ ءَ ماں کسان سالی سک باز ھژدری اِنت ۔

چہ یونسکو ءِ دیدانک ءَ : "ناوانندہ کسے کہ وتی ماتی زبان ءَ گپ کت ءُ وانت ءُ نبشت مہ کنت " گڑا چمیشکا گونڈلانے کہ بید ء چہ وتی ماتی زبان ءَ ماں وانگجاہ ءَ بِندات کنگ اَنت ناں ایوک ءَ گوں مزنیں نگیگیاں دیم پہ دیم بیگ اَنت کہ وانگ ءِ نزور بیگ ، بے بروسھی ، وت ءَ مان نیارگ ،وتی جھل گندی ءُ پد ماں پدیں نا سوبی ءُ ماں وانگ جاھاں پروش ورگ ءِ آماچ بیگ اَنت ، بلکیں گیشتریں چہ آ چکاں ماں اولی سالاں کہ ماں وانگ جاھاں ناسوبی ءُ نزوری ءِ سوب ماتی زبان ءِ نہ وانینگ انت ءُ کہ پمیشکا چُک ھچ کاری ءَ دیم روی نہ کنگ انت ، گڑا وتسر ءَ وت چہ وانگ ءُ زانگ ءِ پڑ ءُ میدان ءَ پَشت کپگ انت ءُ چاگرد ءِ جوڑشت ءُ آبادی ءُ دیم روی ءِ بھر زیری ءَ وت ءَ گون گِیتک نہ کنگ اَنت ءُ بے سوب بیگ اَنت ءُ زندمان ءِ پْرشت ءُ پروشانی آماچ ءُ چہ دیم روی ءِ بور ءَ اِیر گیجگ بیگ اَنت ۔

ءُ گیشتریں بھر چہ راجانے کہ وڑ وڑ ءَ وتی وانگ ءُ زانگ ءَ ماں شھدربرجاھاں دیم ءَ برگ ءَ اَنت بلے چہ وتی ماتی زبان ءِ وانگ ءُ نبیسگ ءَ زبھر انت ءُ چہ یونسکو ءِ دیدانک ءَ ناوانندہ ءُ بے سواد لِیکگ بیگ اَنت ھر چنت کہ شھدربرجاھی مَس مستریں مدرک ءُ سند ءِ واھُند بہ بنت ۔

چہ دگہ نیمگے ماں ایران ءِ دابیں ملکے ءَ کہ گوں وڑ وڑیں کوم ءُ راجاں جوڑ کنگ بوتگ کہ بازیں رھبندے ماں ایران ءِ اسلامی ءِ بنیادی کانود ءُ رھبند ءَ ھاسکار 15 ءُ 19 ءِ اَسل ءِ توک ءَ پہ راجانی اھترام ءَ مان دیگ بوتگ ءُ آیانی دود ءُ ربیدگاں ارزشت ءُ بستار دیگ بوتگ کہ آیانی ربیدگ ءُ زبان مجتی پجارگ ءُ دیم ءَ آرگ بہ بنت ءُ اِے ایشی ءَ پیش دار اِیت کہ اسلامی جنز ءَ پہ ایران ءِ راجانی واست ءَ کہ ماں تپاکی ءُ ھم سنتی ءِ یکیں چم ءَ چارگ ءُ یکیں شاھیم ءَ تورگ بہ بنت کہ ایران ءِ اسلامی جنز ءِ ھم سنتی ءَ پیش دار اِیت ۔
ماں یک گپ ءُ پریچے ءَ کہ بنیادی رھبند ءَ چُش نبیسگ بوتگ : کومی ءُ ھَندی زبانانی کارمرزگ ماں مُچّیں رسانکدر ءُ روتاکاں ، لبزانک ءِ وانینگ ماں وانگجاھاں پارسی زبان ءِ کش ءَ آجو اَنت " بلے جست اِد ءَ اِنت کہ : پرچا کہ ایران ءِ بنیادی رھبند پہ راجانی ھم سنتی ءَ ءُ پہ مچانکیں وانینگی پڑ ءَ ھژدری ئیں راہ ءُ درے بلے سیاست مدار ءُ اموزش ءُ پروش ءِ شور گروکانی دیم ءَ ھاسکار راج گس ءِ آموزش ءُ پرورش ءِ کمیسیون ءِ دیم ءَ اِیر اِنت ، گڑا پرچا چہ اِے مزنیں گنج ءُ گوھر ءَ ماں بنداتی وانگجاھاں پہ چکانی واست ءَ کارمرزگ نہ بیگ انت ؟

بس ملک ءِ مزنیں سیاست مدار ءُ ءُ آموزش ءُ پرورش ءِ سر مستر ءُ پاگواجہ پہ پولکار ءُ زانتکارانی دست آرتگیں جھداں ماں ساٹگی تب زانتی زانشت ءِ توک ءَ چمشانکے بہ دے انت کہ زبان زانتی ءُ دو زبانی وانینگ ءِ تجربت ءَ ماں چنت زبانیں ملکاں بہ چار اَنت کہ وانینگی درونت ءُ آیانی پریچ ءُ سر ءُ سوج ناں ایوک ءَ پہ رسمی زبان ءَ زیان نہ دنت بلکیں رسمی زبان ءِ رھوت گوں  اے دگہ زباناں مھر ءُ مھکم بیت اِنت.

اے گپ بے ھیال کنگی نہ انت کہ ماتی زبان ءءُ چنت زبانی ءِ وانینگ ابید چہ ایشی ءَ کہ مارشت آری ءُ زبان ءُ ربیدگ ءِ ازت دیگ انت ءُ چک ءِ بروسہ ءُ اندری لوٹ ءُ مارشت ءُ ساچِشتاں گیش کنت ءُ بلین ایت ، بلکیں یکے چہ ھژدری تریں کارانے کہ اِے راج ءُ کوم ءَ گیشتر پہ ایران ءِ اسلامی ھاکمیت ءُ جنز ءُ زرمبش ءَ دل بَند انت ءُ ھم سنتی ءُ تپاکی کار اِیت ءُ ھدوناک بنت کہ مچی ءُ مزنیں تپاکی ءُ ھم سَنّتی ھاٹیگ ءُ کدرت دنت انت ءُ پد ءَ ملک ءُ چاگردے ءَ کہ گوں چنت راج ءُ ربیدگ ءُ زبانانی سر ءَ جوڑ کنگ بیتگ ۔

ماں گڈسر ءَ چہ وینگنشتاین ءِ زیبائیں گالردے ءَ پہ منانک ءُ سرچمگ ءَ کہ گیدی ءِ نوکیں زمانگ ءِ مستریں شھزانت اِنت کار گران ءُ  پیش کناں : پہ چاگرد ءِ جوانیں انسانانی جوڑ کنگ ءُ ساٹگ ءَ ءُ پہ چاگرد ءِ دیم روی ءِ واست ءَ اِیشی ءَ دلگوش دیگی انت کہ چنت زبانانی وانینگ ءَ پہ ماتی زبان ءِ کَش ءَ جھان ءِ زانشت ءِ دروازگ ءَ پہ چکانی دیم ءَ پچ بہ کن اِیں دانکہ جاھے کہ مئے وس رس اِیت آیانی دنیا ءَ مستر بہ کن اِیں "

ڈاکٹر سارا وشکوی 
ساٹگی تب زانتی ءِ وانندہ 
سیستان ءُ بلوچستان ءِ سیاسی (احزاب) گَلّ گِسانی کارمستر