وداریں ھست کہ نوکیں سرکار بلوچستان ءَ ھاسیں دلگْوش گْور بہ کنت / «ھاسیں نُسکہ» بلوچستان ءِ مشکلانی

میارجلّ ھالرسانی بُنجاہ ءِ گزارش ءِ رِد ءَ؛ مھمد شئیب آرپی چہ بلوچستان ءِ زانتکاریں ءُ مدنی جھدکاریں ورنایان اِنت کہ وکالت ءِ پِڑ ءَ کار ءَ اِنت پہ میارجلّ ءَ گُش اِیت :  منی وشمنّی اِنت کہ واجہ روھانی ءِ سرکار ماں جمھوری اسلامی ایران ءِ راھدار ءِ 42 ءِ سال ءِ تہ ءَ یکّے چہ نزورتریں سرکاراں بوتگ، کشور تھر تھریں جیڑھانی دیمپان بوت ءُ مردماں ھشت سال پہ واری ءُ سکّی گْوازینت ءُ اِے سکّی پہ زبھریں ءُ کم بھرہ مندیں دمگاں چوش کہ سیستان ءُ بلوچستان ءَ کہ سرجمیں پِڑاں اَلمّی ئیں چیر ساچ ءِ واھُند نہ بوتگ گیشتر مارگ ءُ سما کنگ بوت.

آئی ءَ گُشت : مئے اُستان ءِ مردماں ھم پَتّ گوں ایران اسلامی ءِ گیشتریں مردماں  پہ کسے ءَ کہ کارنامگ داراِیت ءُ جلشکوکیں مدیریتی گْوستے ءِ واھُند اِنت، اوٹ داتگ ءُ گچین کتگ ءُ دلگوش گوں واجہ رئیسی ءِ مدیریتی گْوست ءَ کہ بدلی لوٹیں مدیرے مارا ودار اِنت گوں یک راستیں برنامہ ریزی ءُ جھادی مدیریت ءَ کشور چَرے جنجالاں بہ گْوزاِیت ءُ دیم پہ شاھگان کاری ءَ بہ روت.

آرپی ءَ دَرّائینت : زبھریانی دور کنگ،  ناروائیں نابرابریانی چِست کنگ سرچمّگانی داداریں بھر ءُ بانگ ءُ ماں سرجمیں مدیریتی تَکاں چہ زانندگاں کارگرگ یک ھکّیں لوٹے ءُ ءُ مارا ایشی ءِ سر ءَ دلگوش دیگ ءِ ودار ھست اِنت؛ اِے ھشتیں سالاں ما جارینک باز اشکتگ، سرکاری مردم سیستان ءٌ بلوچستان ءِ زیادھیں دورپاندی ءِ گوں کشور ءِ آ دگہ جاگھاں منّوک بوتگ اَنت ءُ وت ءَ را اِے دورپاندی ءِ کم کنگ ءِ لوٹوک پیش داشتگ اِش بلے آیانی جارینک ءُ کارکردانی میان ءَ جھلانکیں ءُ باور نہ کنگی  شم ءُ درگے بوتگ.

اِے دادگستری ءِ وکیل ءَ دیمتر ءَ نشاندھی کُت : واجھانی گیشتریں گپ ءُ دانک ھیرواھیں واھگانی دْروشم ءَ اِت اَنت دانکہ پہ بلوچستان ءِ شاھگان کاری ءَ برنامہ ریزی کنگ ماں ھر رنگ ءَ روھانی ءِ سرکار ءِ آسر ءَ رس اِتیں گوں دْرستیں مشکل ءُ سکّیاں کہ بوتگ اَنت گوں گٗوستانکی ءُ جُھلیں زبھریانی  دلگوش گْور کنگ کہ ماں بلوچستان ءَ اِنت وداریں ھست اِنت نوکیں سرکار ھاسیں ءُ جتائیں دلگوشی یے پہ اُستان ءَ داشت بہ کنت ءُ پہ اِے زبھری ءُ پدمنتگیانی چِست کنگ ءُ گیشّینتگیں نُسکھے رِد ءُ بند بہ دنت ءُ اَلبت بلوچ چاگردی جُھدکار ءُ ورنا ءُ وانندگ ءُ بلوچستان ءِ پھکیں مردم رند چہ سرکاری کارمستر ءِ گچین ءَ، کار ءَ آسر بوتگیں سرپد مہ بنت گوں نوکیں سرکار ءَ گیشتریں ھمکاری ءَ ھوار وتی راستیں لوٹ ءُ پکاراں چہ کانونی راھاں رندگیری بہ کن اَنت ءُ گوں وتی لوٹ ءُ دَزبندیاں ناکارامدیں مدیرانی کم کاری ءِ دیم پہ دیم ءَ پہ  پساتکاری ءُ جنگ ءُ مدیریتی رانتاں گوں سرکار ءَ ھمکوپگ بہ بنت.

رجانک : جنید بلوچ