نادیا ءِ تھتال ، بلوچانی نمیرانیں مَمّ

چہ میارجل ءِ ھالرسانی بنجاہ ءِ ھالانی رِد ءَ : مھمد جواد سادکی ءَ نبشت : 14 سال پیش بزانکہ سال ءِ 1386 ھجری شمسی ءَ کہ وتی کھول ءُ لوگمان ءِ باندات ءَ ھِچ وڑ ءَ سھیگ نہ اِتاں کہ من ءَ پہ ساٹگ ءَ زابل ءِ شھدربرجاہ ءِ جناورانی باگ ءَ برت اِش ،من ءَ چہ کسانی ءِ زند ءَ لھتیں چیز یات اَت کہ مزنیں کوہ ءُ دراں گوں پِت ءُ مات ءِ ھمراھی ءَ زندمان گوازینتگ ، ءُ اِد ءَ کہ پہ منی زندگی ءَ مَیّن ءُ گِچین اِش کتگ اَت سَکّ تَنک اَت ءُ ھچ وڑیں ھم رنگی ئِے گوں منی پیشگیں زندجاہ ءَ نیست اِت ئِے ۔

جناورانی (وھش) باگ ءِ اُگدہ داراں پہ منی سرگرمی ءَ یک کسانکیں تلویزیونے اِیر کتگ اَت کہ بس ھامون ءِ کانال ءَ پیشدارگ ءَ اَت ءُ وھد وھد ءِ سر ءَ بلوچستان ءِ شھرانی ھالاں رندگیری کنگ ءَ اِتاں کہ یک روچے ھالے شنگ بیت کہ ماں گِھ ءِ مرکزی بکش ءَ داروکان ءِ نامیں میتگے ءَ مئے وڑیں مَمّانی سِنگ بُت اِش تْراش اِتگ ءُ مِکّ اِش کتگ اَنت ءُ انگت مرکزی ءِ بکشدار ءَ پہ آیاں پجار کاڈ ھم جوڑ کتگ ءُ نوکی من سھیگ بوتاں کہ منی نام نادیا اِنت ءُ آیاں ھچ  نہ زانت کہ مئے نام سیاھیں مَمّ اِنت بلے دلگوش اِش نکت ءُ من منت ءُ زاری ءَ دمبرتاں کہ من ءَ وتی شھر ءَ بہ بر اِت کہ اِد ءَ سے ماھی دنز ءُ لوڑ ءُ زمستان ءِ سوچوکیں سارتی من ءَ بے تاھیر کنگ اِنت بلے بژن کہ ھچ کس ءَ منی گپ مان نیاورت اَنت ۔

 یک روچے بمپور ءِ یک ممّے ءِ بیرانی ءِ ھال چہ ھامون ءِ کانال ءَ شِنگ بیت کہ سک ترس اِت ءُ مونجان بوتاں ،پہ وتی لوگ ءِ مردماں گوانک جت ءُ گوشت اَنت کہ من انچیں ھالے اِشکتگ مئے سیاد ءُ وارساں کند اِت ءُ ٹٹولی کت  ءُ گُشت اِش کہ مارا ماں بمپور ءَ سیاد ءُ وارس نیست اِنت واجہ یاسین جلالزھی نیا بمپور ءِ ھالکار کہ انی میارجل ءِ تندجاہ ءَ کار ءَ اِنت چہ ردی ءِ سوب ءَ یک سیاھیں بِینگے مَمّ ءِ جاہ ءَ پجار ئِے کتگ ۔

 ھیر ! گُڈ چہ 14 سال جُھد ءَ پہ وتی وائے وتن ءُ ھشکیں دار ءِ ڈنگر ءُ  داراں ءَ زَنزَر اِت ءُ پہ ڈیھ ءِ واترگ ءَ واھگ دار اِتاں ، اگاں شما روچے اِشکت کہ من بیران بیتگاں منی تْرانگ ءُ تھتال ءَ اَلّم ءَ بہ کپ اِت ءُ گِھ ءِ اُگدہ داراں ھمے وَسیت ءَ کناں ھاسکن مرکزی ءِ بکشدار واجہ مھمد بلوچزھی ءَ گُشاں کہ مہ اِلّ اِت دگہ مم چو منی سرنبشت ءُ باندات ءَ دُچار بہ بنت ۔