میارجل ءِ ھالگری چہ پیشن ءِ مرزی شھر ءِ نگیگیاں / پُھلے کہ دزرسی ءِ جاہ ءَ راہ سر ءِ میلانک بوتگ+تامر

چہ میارجل ءِ رسانکدر ءِ بُنجاھی ھال ءِ نیمگ ءَ : پیشن ءِ بکش کہ رودرتکی ءُ رو ایرشتی بلوچستان ءِ سیمسر ءِ سر ءَ ءُ رِدیگ ءِ کَش ءَ اِنت کہ سیاسی بھر ءُ تھراں راسک ءِ شھرستان ءِ آبریچ ءُ آبند ءَ اِنت ءُ یکے چہ کشت ءُ کشار ءِ ءُ باپاری ءِ دیم ءَ برگ ءِ بُنجاہ زانگ بیت اِنت ۔

 پیشن ءِ 32 ھزار نپری شھر ماں ایران ءُ پاکستان ءِ سیمسر ءِ سر ءَ شریں جاھے شمار بیت  کہ بس گوں مزری بازار ءُ "پایانہ" ءَ 7 کیلومتر راہ ئِے ھست کہ ایشی ءَ گوشت کن اِیں کہ دوئیں ملکانی واست ءَ یکے چہ شرتریں بازار ءُ شھر ءُ مرزی بُنجاھاں ماں  سیمسر ءِ سر ءَ شمار بیت ءُ پیشن ءِ مردمانی گیش بیگ ءِ لوٹ ھم پہ وڑ وڑیں اوزار ءُ سامان ءُ نیبگ ءُ دگہ چیزانی نیمگ ءَ چہ مرز ءُ بازار ءَ گیش بیان اِنت کہ  روچے سداں ماشین ءُ تریلی چہ ورگی سامان ءُ شیر ءُ بہ گر ءُ بہ دار چہ پیشن ءِ مرز ءِ کسانکیں بازار ءَ پاکستان ءَ روان دیگ بیگ اَنت ۔

شھر ءِ زمہ وارانی نادلگوشی پہ پیشن ءِ شھر ءِ بُنی جوڑشتانی بارو ءَ سوب بیتگ کہ شھر نند ماں وتی گپ ءُ رپاں وتی گِلواں گوں میارجل ءِ ھالکار ءَ ماں  تامر ءِ توک ءَ درانگاز بہ کن اَنت ۔

ماں ھمے دوئین سالانی میانجی ءَ پیشن ءِ شھردار ءَ ماں شھر ءِ توک ءَ یک پُھلے جوڑ کتگ کہ مردم چہ بندات ءَ ایشی ءِ جوڑ کنگ ءَ ناراز بوتگ اَنت ءُ بے رھبندیں کار اِش زانتگ ءُ  جار اش جتگ کہ مئے چنت سالی تجربت اَنت کہ اِے شھر ءِ زند گوازینگ اِیں اِے پل ناں سیت مند بیت بلکیں مردمانی راھانی سر ءَ میلانک بیت ءُ دگہ گیشیں زیان کار اِیت کہ مرچی ھما مئے گپ دیم ءَ آتکگ اَنت ۔

انی چہ دو سال ءِ گوزگ ءَ چہ شھرداری ءِ درشتگیں آرتاں کہ شھر ءِ میانجی ءَ اِیر کنگ بوتگ اَنت کہ انچو ویل کنگ بوتگ کہ بازیں مشکل ءُ نگیگی پہ مردمانی واست ءَ آورتگ ئِے ۔

اے کار گوں بنداتی نھاد ءَ کہ آئی ءِ بُنکی مُلّ 3 میلیارد تومن بوتگ کہ سال ء 1398 ءِ بنگیجی ماہ ءَ چہ شھرداری ءَ بنگیج بوتگ کہ کرار ھمے بوتگ کہ سال 99 ءِ ھپتمی ماہ بزانکہ (آبان) ءَ ھلاس بہ بیت ءُ اِے کار ءِ وپسگ ءُ دیم نہ برگ ءِ سوب چہ شھرداری ءِ زرّ نہ دیگ ءُ مالی نہ گیگیاں زانگ بوتگ ۔