ماں بلوچستان ءَ ڈاہ ءُ ناایمنی ءِ اِلاج چی اِنت ؟ !

میارجل ءِ ھالرسانی بنجاہ ءِ ھالانی ردءَ : استان سیستان ءُ بلوچستان گوں وتی دودمان ءُ پت پیرکی ربیدگاں مروچاں سک باز چہ ٹک ءُ کومی پگر ءُ ھیالاں سرریچ اِنت چوشیں پگر ءُ ھیال بلّے کہ پہ دوستی ءُ ھمدلی باندات ءَ پہ بلوچستان ءِ کوم ءُ ٹکاں سوبمنداِنت بلے اپسوزاِنت کہ دگہ نیمگے چہ ایب ءُ ھرابی ءَ سرچکار اِنت .

بلوچ کوم چہ باز دیرءَ پہ وتی سرڈگار ءِ پھریزگ ءَ ءُ گوں یکدگر ءَ دوستی ءُ ھاس پہ میارجلی ءَ زانگ ءُ پجاہ آرگ بوتگ اَنت پہ ھمے ھاترءَ ماں اے ھُشکاوگیں سرڈگار ءَ ءُ اے زوراکیں جاور ءَ پہ ھوری ءُ پہ مھر ءُ دوستی وت ماں وت ءَ زندمان گوازینگ ءَ اَنت بلے مرچاں گوں وھدءِ گوزگ ءَ ءُ گوں زمانگ ءِ زوراکی ءَ اے دود ءُ ربیدگ چہ پیسر ءَ کمرنگ تر بوتگ ءُ پیسری ھمسَنتی ءُ براتی چو کہ پہ مردماں دلجمیں ایمنی بہ بیت مروچاں دیم پہ بے بُنیں وت پیشداری ءُ ناسرپدی ءَ گوں ھمگرنچ بیان اِنت . 

چہ بلوچ ورنایاں لھتے پہ وتی پت پیرکی گامگیجاں ءُ شریاں روگ نہ اَنت بزاں پہ وتی جرند ءِ پیشدارگ ءَ ءُ پہ وتی زور ءِ شوندات ءَ دست پہ  سارت ءُ گرمیں سلاہ ءَ جن اَنت ،بزاں مرچاں سارت ءُ گرمیں سلاہ ءِ زیرگ ءُ دست ءَ کنگ اَیب نہ اِنت ءُ بازیں لوگمان ءِ مردم وتی چُکانی روگ ءُ آیگ ءُ آیانی ھمراھی ءَ گوں شر ءُ گندگیں بیل ءُ براھندگاں مکن نہ کن اَنت ءُ شپانی آگاھی ءُ ماں سلیں جاگاھاں گوں براھندگاں نندگ ھرابیں رنگے ءَ دیم ءَ روان اِنت بزاں اے درست یک ھرابیں پگر ءُ دودمانے ءِ مستاگ اَنت . 

ترندآپ ءِ ورگ ءُ مکدرات ءِ کشگ اے درست بے ھیائی ءُ رُزوائی ءِ بُن ھشت اَنت ورنا چہ وتی جرند ءِ شریں دود ءُ ربیدگاں دوری کنگ ءَ اَنت ، لوٹ اِیت کہ پہ ورنایانی سرگرمی ءُ وھد ءِ گوازینگ ءَ اے وھدی  یک شریں چار بیچارے کنگ بہ بیت پرچا کہ گیشتریں جنگ ءُ شِدت ءُ کُشت کوش ءِ بُن ھمے رسانکدر ءِ ھرابی ءُ ورنایانی شپانی نندگ ءُ یکجاھی اِنت بزاں چوشیں جاھاں ھر وڑیں کار بوت کنت ، بزاں مردم گُشت کنت کہ گیشتریں مروچیگیں کُشت ءُ کُوش چہ ھمے ھرابیں رسانکدر ءُ ورنایانی شپانی یکجاھی ءَ چہ بیگ ءَ اِنت گوں کمکیں وت پہ وتی دپ جاکے ءَ ورنا پہ وتی دروگیں گرور ءِ پیشدارگ ءَ سلاہ ءَ چست کن اَنت ، ورنا 18 داں 25 سالی بید چہ ورنائی جوش ءَ دگہ ھچ نہ زان اَنت اے رد ءَ ماں اے ھند ءُ دمگ ءَ سلاہ ءِ بازی ءُ ورنایانی ھمے ورنائی جوش بازیں کار ھراب کت کنت . 

ماں اے روچاں ھراب تریں باوست کہ چاگرد ءِ مردمانی پگر ءُ سسائِے گوں وت ءَ ترینتگ ھمے ٹک ءُ کومی جیڑگانی کُشت کُوش اِنت، بزاں چوشیں جاور کہ کوم ءُ ٹکی اَنت ھر کُشت کُوش ءُ ھر جیڑگ پہ اے دگہ ٹک ءُ کوماں گیش بیان بیت ، بزاں ٹک ءُ کوم چو کہ یک بدنے ھر ڈک درستیں جاھاں پہ درد کنت بلے اے درستیں کُشت کُوشاں ماں چنت جاہ ءَ بایداِنت کہ مردم چاربیچار بکنت . 

بزاں مواد مکدر ءِ زیر ءُ دئے کہ اے جیڑگ ماں کانود ءِ بنجاھاں گیش گیوار کنگ نہ بنت چوشیں جیڑگ پہ کُشت کُوش ءُ مردمانی بَرگ ءُ دارگ ءِ نیمون بیت ھنچو چہ امنیتی نیرواں دلجمیں ارادہ ءُ کارے پہ چوشیں مردمانی گرگ ءُ بندیگ کنگ ءَ ھمے ھاتر ءَ ھر کُشت کوش بیرگیری دروشم ءَ دیم ءَ روان کنت ، دیمتر ءَ ھرابیں دودمان ءُ ھرابیں رھشونی ماں لوگ ءُ وانگجاھاں ، مھتاد بیگ ، بے نیستی ، بیکاری سیمسر ءُ کاتلانی تچگ چہ سیمسراں ھما دیم ءَ دگہ لھتیں چیریں دست کہ مزنیں مردماں ءُ سرداراں کُشت کُوش ءِ آماچ کنت اے درست جنگ جیڑگ ءَ دیم ءَ بران کن اَنت ءُ سھل ءُ تران ءِ دیم ءَ داراَنت .  

اپسوز کہ بازیں راجمانی کارندہ چوشیں باواستاں پاد مان نہ کن اَنت آیاں وتی وتی دیدانک ھست اَنت بلے مردم بایداِنت کہ وتی چُکانی تربیت دیگ ءَ ءُ جنگ جیڑگ ءِ دیم ءِ دارگ ءَ چہ لوگان ءُ وانگجاھاں بنگیج بکنت ءُشریں وانگ ءُ زانگے اے باندات ءَ رھشونی بکن اِیں چاگردی کارندہ ءُ ھما مردم کہ زانت ءُ زانگ ءِ واھنداَنت بایداِنت کہ وتی لانک ءَ بہ بند اَنت ءُ میدان ءَ بیا اَنت . 

اِزمگر گوں اِزم ءَ ءُ زیمل ءَ جنگ جیڑگ ءَ مہ ساڑا اَنت بلکیں اے جنگ جیڑگ ءِ ھرابی ءَ زیمل ءُ تامر جوڑ بکن اَنت ، مئی ساز ءُ زیمل ھم کاتل ءُ ھرابکاریں مردمانی دست ءَ مہ بیت ءُ آیاں مہ ساڑا اِیت . 

اپسوزاِنت کہ برے وھدے ھمے رھشون ءُ نیکراھی پیشوک ھم نیل اَنت کہ میاریگ ءُ مجرم کانود ءِ ھساب ءَ سزا دیگ بہ بنت بزاں پہ ناسرپدی جنگ ءُ جیڑگ ءَ دیم ءَ بران کن اَنت شرتریں راہ ھمیش اِنت کہ ما درست ملک ءِ کانود ءَ کبول بکن اِیں ءُ میارباریں مردماں پہ کانود ءِ دست ءَ بہ دئیں بلے ما گنداِیں کہ ھمے سروک ءُ رھشون وھدے کاینت کہ کُشت کُوش بوتگ بزاں دیمگیری نہ کن اَنت ءُ گیشتریں ھم لوٹ اَنت کہ مجرم ءَ کانود ءِ دست ءَ مہ دینت چو ھم سرپد نہ اَنت کہ گوں چوشیں کاراں جنگ جیڑگ ءَ دیم ءَ بران کنگ ءَ اَنت .

پہ سھل ءُ تران ءِ دیم ءَ برگ ءَ ءُ پہ ایمنیں بانداتے ءَ بایداِنت کہ چاگرد پجاری چہ ھُنڈال ءُ ریشگ ءَ زانگ بہ بیت بزاں ماں آمیدگس ءَ پروندہ پٹ پاس بہ بنت گڑا اے جیڑگانی بُن ءُ ریشگ وھدے زانگ بوت اَنت گڑا پہ آیاں درمان شوھازگ بہ بیت ، اَپسوزاِنت کہ ما زانشتی پٹ پول ءُ چاگرد پجاری ءُ ناامنی ءِ باندات ءَ دلجمیں ءُ بازیں کار نہ کتگ بزاں باز کم ماں مزن شھدربرجاھاں یک نودربرے ءَ پایان نامگ ءُ دگہ نبشتانکے دیگ بوتگ ھر ڈول ءَ ما درست میاریگ اِیں کومانی سرداراں چہ داں کہ نیکراھی پیشوک لوگمان وانگجاہ مزن شھدربرجاہ امنیتی ءُ گزائی نیرو گیشتر ندارگ کنگ ءَ انت یاکہ بس میاریگ کن اِیں ءُ دلجمیں کارے زانشتی باندات ءَ نہ کن اِیں . 

بزاں پہ مارا باز گران اِنت کہ یک نامی مردمے یاکہ ھر مسلمانے دگہ مردمے چو پہ بے رھمی کُشگ بہ بیت بلّے کہ جیڑگ لوگی یا کہ کومی یے بہ بیت چوشیں وھد ءَ نبایداِنت کہ زمہ دار بگُش اَنت کہ جیڑگ لوگی یا کہ مردمے ءِ وتی جرندئیگ اِنت ءُ وتی زمہ داری ءَ پیلہ مہ کنت . 

گوشئے کہ بازیں سروک ءُ ریش سپیت ءُ نیکراھی پیشوک کہ گوستگیں وھد ءَ سھل ءُ ترانانی سربراہ بوتگ اَنت مروچی چاگرد ءِ تہ ءَ گندگ نہ بنت بلکیں ھم چہ بنگیج ءَ ما ھمے مردم ٹک ءُ کومی جیڑگانی آماچ کتگ اَنت پمیشکا مروچی ما ھُشک ءُ ھیران اِیں مئی ورنایاں ھم اوپار چہ زانت ءُ زانگ ءَ سستگ ءُ زوت گوزوکیں ورنائی مارشت زرتگ ءُ نشتگ اَنت .

 ما درست ماں گوستگیں سالاں دیستگ کہ چونیں وتی دوست ءُ آزیزیں مردم ھمے کومی ءُ وت پہ وتی  جیڑگاں گوں کُشت کُوش ءِ آماچ بوتگ اَنت . سدانی کساس ءَ ھُردیں چُک چُورو ءُ پِتی مھر چہ آیاں گرگ بوتگ ، جنین جنوزام ءُ بازیں مات وتی ورنائیں چُکانی مرگ ءَ موتکی ءُ بازیں پِت سرین پروش کنگ بوتگ اَنت سالانی سال گوستگ اَنت کہ اے جیڑگ ماں اے جاورءَ دیم ءَ روان اِنت ، اَگاں جاگاھے ءَ گوں رھشونانی جھدءَ اے آس کم بیان بوتگ بلے گندئے کہ گوں کمکیں جنجالے ءَ اے آس ءَ پد ءَ چہ پُرانی چیرءَ سر کش اِتگ ءُ پد ءَ جمبور بوتگ .

 نزاناں کہ آیوکیں نسل مئی بارو ءَ چی گُش اَنت ءُ گوستانک مئی بارو ءَ چی نبیس اَنت بلے چو پہ دلجمی بزان اِت کہ سالانی سال اِنت مئی مردم پُشت ءَ پَشت کپتگ اَنت ءُ شریں دودمانے مارا نیست اِنت بزاں ھمے جیڑگ ءُ ھمے ناایمنی درستیں واری ءُ بزگیانی ھُنڈال ءُ ریشگ اِنت . 

اگاں ما لوٹ اِیں کہ اے بدیں کُشت کُوشاں ماں سیستان ءُ بلوچستان ءَ ھاس بلوچستان ءَ چہ ولگوج بکن اِیں گڑا باید اِنت کہ یک چاگرد پجاریں گَل ءُ مچی یے وتی لانک ءَ بہ بنداِیت ءُ گوں پٹ ءُ پول ءَ چہ اے جنجال ءَ یک زانشتی رھشونی یے پہ اے دودمان ءَ ماں اے چاگردءَ پیش بکنت داں بلی اے مزنیں جنجال ماں کمکیں وھدے ءَ ءُ شریں دروشمے ءَ آسر بہ بیت . 

چو ھم گُشگ لوٹ اِیت کہ ھنوگیں کُوش پہ زانت ءُ ٹک ءُ کومی جیڑگ گُشگ بنت بزاں دُزی ، ناایمنی ءُ گوں سلاہ ءَ دُزی کنگ ءِ ھساب جتا اِنت اے باواست وت چاربیچار کنگ لوٹ اِیت ءُ اے وت یک جتائیں باوستے .

رجانک :ملا چمل