لیبی ھالے چہ گارکندی کلگ ءِ روچگانی ماہ ءِ جام ءِ چکّاساں

چہ میارجل ءِ بنجاھی ھالرسانی ءِ ھالانی رد ءَ ; ھَمُک سالانی وڑ ءَ ، روچگانی ماہ ءِ شپانی درگت ، رند چہ ترابی ءِ نماز ءَ ، لیب کنوکاں گوں پادبولی ءِ چکاسانی برجم داری ءَ ، سجّہ ایں لیب دوستانی شادھی ءُ گنگلانی ءِ سوب بنت . گارکندی ءِ کلّگ چہ پُلّانی ھند ءُ آپسر اں ، لیبائی ءِ واھگداریں کلگے انت کہ امبرانی اوں روچگانی ماہ ءِ لیب ءُ گوازی ءِ چکّاسانی پنچمی پزّام اد ءَ برجم دارگ بوت .

اے چکاسانی برجم داری ءِ اُگدہ زیر ، واجہ رضا رضائی منش ءَ گُوَشت کہ ۳۸۴ لیب کنوکیں ورنا چہ ۳۲ گلّانی رد ءَ ماں ۶۳ لیبی ءِ پرّاماں اے چکاسانی برجمداری ءَ بھر زُرتگ . اے نیام ءَ ۴۲۲ گُل ، دروازگانی اے دیم ءُ آ دیم ءَ جَنَگ بوتگ کہ میانجینی کَچّ ءِ ھساب ءَ ، ھر پَرّامے ءَ ۷ گُل بیت کہ چہ "فروردین " ماہ ءِ دومی ، دان ۲۹ می روچانی درگت ءَ ، وتی گوم ءَ لیب چکّاسی کُتگ ءُ گڈّ سر ءَ گوں ھالو بازار ءِ دھیاری گَلّ ءِ اولی رد ءُ ھدامرزی شیھ ولید ءِ واھگدارانی دومی رد ءِ باج بری ءَ ھلاس بوتگ . 

اے واجہ ءَ وتی درشانی ءِ رندگیری ءَ دَرّائینت کہ ورنائیں گلّانی لیب دوستی ءَ پَدّر کت کہ ماں چھبار دمگ ءَ ، لیب ءُ گوازی ءِ جَد ءُ ھَلّان ، بلاھیں بستارے ءِ واھُند انت . 

واجہ اسمائیل درتاج ، پُلّان ءِ بکشدار ءَ درشان کت کہ گارکندی کلّگ ءِ تہ ءَ ، روچگانی ماہ ءِ درگت ءَ اے ۵ سال انت کہ دل تبیں چکّاساں گوں بازیں لیبی گلّانی ھوری ءُ بھر زورگاں ، ماں دشتیاری ءِ دمگ ءَ برجم بیگ ءَ انت .

 روچگانی ماہ ءِ جام ، ھلاکہ ءِ براہ دارتریں پادبولی ءِ لیبی گلّ انت .

عمر بلوچ ، چھبار ءِ اسلامی شورجاہ ءِ پاگواجہ ءَ گیش کُت کہ اَلَّمی ءِ سر ءَ روچگانی ماہ جام یَکّے چہ ھما زیبدارین ءُ پُرجَزَبگیں چکّاساں لیکگ بیت . سیستان ءُ بلوچستان ءِ ھلاکہ ءِ تہ ءَ گارکندی کلگ ءِ جام ، چہ لیب دوستیں مردمانی نیمگ ءَ ھمراہ داری کنگ بیت .

واجہ بلوچ ءَ لیب ءُ گوازی ءِ اردشت ءُ بستار ءِ بارو ءَ پہ روچگانی ماہ ءِ لیب ءُ گوازی ءَ کہ شپانی درگت ءَ رند چہ ترابی ءِ نماز ءَ برجم بیت گُوَشت کہ اے لیباں گھتریں کار پہ مردمانی زور ءُ ڈڈّی ءِ درانگاز کنگ ءَ انت .

 بلوچ ساھب ءَ گوں اوست ءُ واھگاں گیش کت کہ اے چکاسانی پیلو کنگ ، سوب بیت کہ پادبولی ءُ "فوتسال" ءِ لیباں ورنائیں گلّانی جزم ءِ سوب ماں چھبار ءِ دمگ ءَ بیت دانکہ اے پڑ ءِ نوکیں لیب کنوکاں ، ماں ھند ءُ دمگ ءِ ایبی پڑاں درگیجگ ءُ شوھازگ بہ بنت . 

گارکندی کلگ ءِ روچگانی ماہ ءِ جام ، وتی رد ءَ گھترین جام انت .

واجہ امیری ، چھبار دمگ ءِ لیب ءُ گوازی کارگس ءِ پاگواجہ ; اے کلگ ءِ امبرانی سال ءِ روچگانی ماہ ءِ جام ءِ چکاسانی برجم داری ءِ کمّی ءُ گیشی ءُ بود ءَ ، گوازی انی شرتریں بستارے ءِ کچءَ جار جت ءُ گوشت کہ گارکندی ءِ کلگ ، چہ گونڈیں پادبولی ءِ گوستگیں کتہ کاری ءُ بود ءِ ھساب ءَ ماں روچگانی ماہ ءِ چکاسانی جام ءِ برجمداری ءَ ، بے درور بوتگ .

منصور جدگال ، ھالو بازار ءِ گل ءِ کارمستر ءَ گوشت کہ اے گل ءِ باج بری ماں چکاسانی رد ءَ بے شک مئے لیب کنوکیں ورناھانی جزم ءَ درشان کتگ ءُ آھان توانتگ کہ گوں کمّیں اوزار ءُ آسراتی ءَ ، وتی ڈَڈّیں مَٹّانی دیم ءَ ترپوکیں دابے ءَ باج بروک بہ بنت ، پمیشکا اے ورناھانی جھد ستاہ ءِ لاھک انت .

واجہ جدگال ءَ چہ ھند ءُ دمگ ءِ اگدہ دار اں لوٹ ات کہ اے گلّ ءِ لیب کنوکان ءَ کہ چہ یک کلگے ءِ ھاک ءُ پُلکی پٹ ءُ میداناں وت ءَ داں باج بری ءِ بستاراں رسینتگ ءُ سر کتگ انت پلامرزی بہ کن انت .

ھالو بازار چہ بجار بازار ءِ مزن کلگ ءِ ھند ءُ پیر سھراب ءِ بکش ءِ آپسران انت ءُ اے میتگ ءِ گیشتریں ورناھاں چہ لیب ءُ گوازی ءِ ادنائیں اوزار ءُ آسراتی اں زبھر انت .

رجانک : میرجلال