چہ دریا ءِ اُمّان ءَ آپرسانی ءِ درگت ءَ ، دنیگت ھچ وڑیں گامگیج زورگ نہ بوتگ/پہ ایران ءُ چین ءِ تپاک ن

میارجلّ ءِ ھالکاری بُنجل ءِ ھالرسانیءِ رِد ءَ؛ واجہ مئین الدین سئیدی ءَ ماں ھالکارانی دیوان ءَ کہ گوں میارجلّ ءِ واسیداری ءَ برجم دارگ بوتگ اَت،وتی "حوزہ انتخابیہ" ءِ روستایانی آپرسانی بارو ءَ گپ جت ءُ درائینت ئِے: باید روستایانی آپرسانی ءِ درگت ءَ کہ "مقام معظم رھبری" ءِ گیشتریں کڈّن ماں ھمے گپ ءَ اِنت، بلے پہ بژن گْوشاں کہ پہ ھاتر ء پندانی دوری ءُ روستا ءُ کلگانی سَرسندی ءَ ماں اے گِسر کپتگیں دمگ ءَ، در نہ گِپتگیں کِشک چہ در گپتگیناں گیشتر اَنت ءُ ورگی آپ ءِ درگت ءَ ھما داب ءَ کہ شما وت پہ جْوانی زانتکار اِت مئے گیشتریں روستا ءُ کَلّگان دنیگت ھما اھدی، بَڈُکّی آپ کشّی ءُ منجل ءُ لوھیگانی دور برجاہ اِنت۔

واجہ سئیدی ءَ درائینت: گوں نزام ءِ ھاسیں نگاہ ءَ ءُ ماں مجلس ءَ استان ءِ جھگیرانی رندگیری ءُ موجریں دردانی سھرا کنگ ءَ، ماں نگاھانی دیداں دِگری آتکگ، باز وشی ءِ گپ اِنت کہ ماں مجلس ءَ پہ پیشن ءِ سد ءِ جَھلی دمگ ءَ چوکہ تلانگ ءُ پلّان ءِ آپرسانی ءِ پروجکٹ ءَ کہ پیلوئی ءِ سیمسران انت ءُ دگہ پروجکٹانی درگت ءَ ما تْران ءُ باوست ھم کتگ، البت منی "حوزہ انتخابیہ" ءِ جاور سک نگیگ اِنت ءُ گوں اے رندگیریاں دگہ چِل کَلّگ ءُ روستا چہ تلانگ ءِ دمگ ءَ آپرسانی بنت، زیردان ءِ سد ءِ ایر جَھلگی پھنات ءَ ھم اے گامگیج ءِ تیاری برجاہ انت ءُ داں تیرماہ ءِ 31ءَ اے دمگ گوں آپ ءِ نوکیں پَیپانی لین ءَ ھمگرنچ بنت داں مردمانی گیشتریں کساس چہ آپ ءَ بھرمند بہ بنت ماں بریس ءُ پسابندر ءَ ھم، اے پروجکٹ پہ جْوانی دیم ءَ جُنزان اِنت۔

اُستان ءِ جھگیرانی باسک ءَ وتی گپانی رندگیری ءَ درائینت : آسرال ءَ پہ آپ ءِ درگت ءَ بازیں جُھد ءُ کوشستے بوتگ ءُ برجاہ اِنت داں گھتری یے بئیت ءُ پہ بژن کہ مئے چھبار ءِ مزن شھر ھوں ھمے "سھمیہ بندی" ءِ گَمباریں جاور ءِ آماچ اِنت، کرار اِنت چہ کنرک ءِ آپ شیرین کن ءَ دوھزار مترمکئب آپ ءِ گیشی بئیت ءُ ایشی ءِ تپاک نامو ھم منّگ بوتگ، بگندئے جاور گھتر بہ بنت، بلے دنیگت پہ بازیں دمگے ءَ پہ آپرسانی ءِ باندات ءَ ھچ وڑیں توجیل شوھاز نہ بوتگ کہ ماں اے سالی الّم ءَ اے بارو ءَ دلجمیں وس ءُ کوشستے کنیں، وشّی ءِ گپ ایش اِنت کہ اے سالی مئے آپرسانی ءِ زَرکِشار( اعتبار) 1065 ملیارد تُمن انت ءُ دگہ 400 ملیارد تمن ھم پہ پیشّن ءِ سد ءِ جَھلی دمگاں گیشّنگ بوتگ اَنت۔

واجہ سئیدی ءَ وتی گپانی رندگیری ءَ: چھبار ءِ دریا ءِ آپ ءَ پہ ھراسان رزوی ءَ ، دیم دیگ ءِ درگت ءَ گوشت : وزارت سنئت پرے آسرال ءَ سر بوتگ کہ پہ اود ءِ واستا چہ کرمان ءَ آپ ءِ بند ءُ بست ءَ بکن اَنت ، بلے گوں باسکانی پد ماں پدیں رندگیریاں پہ سیستان ءَ ھم آپ ءِ دیم دیگ ءِ باوستے چست اِنت ءُ اے کار پہ ھمے زیتّاں بنگیج بیت، پرے کار ءَ "کلنگ زنی" ءِ دود ھم برجم دارگ بیتگ بلے چونکہ "منبع" ءُ کساس گیشّینگ نہ بوتگ اَنت، اے درگت ءَ گوشت نکناں کدی بنگیج بیت ، اے وشیں ھال ءَ ھم شمارا بدیاں کہ تیس ءِ روستا کہ"منطقه آزاد" ءِ دلبند ءَ چو کوہ ءَ مِکّ اِنت،  ایشی ءِ آپرسانی ءِ پروجکٹ ھم تیار اِنت ءُ چہ سال ءِ بنگیجی نیمه ءَ ورگی آپ پہ تیس ءَ سر بیت۔

واجہ سئیدی ءَ پہ کشاورزی ءِ زمینانی کلّری ءُ زور ءِ کم بیگ ءِ درگت ءَ گوشت کہ : تیوگیں ایران ءِ زمینانی کلّری ءُ ھاک ءِ پیری ءِ کساس ماں ھر ھکتار ءَ15 تُن اِنت ماں دشتیاری ءَ اے کساس ماں ھر ھکتارے ءَ 100 تن انت پمیشکا اے چیز سوَب بیتگ کہ گوں ھمُک ھار ءُ ھیروپ ءَ ،مردمانی زید ءُ چَراگجاہ جوکمانی آماچ بنت ءُ ھما داب ءَ کہ شما وت زانتکار اِت اے سَرسندی ءُ" حاشیہ نشینی" ءِ سوَب ھمے ھاک ءِ کلّری ءُ ایر روگ اِنت،  بھمانگی گپ ایش انت کہ سال 98 ءِ ھیروپ ءَ وھدیکہ گوں ھمبلاں پہ کمک ءُ امداد رسانی ءَ ماں دشتیاری ءَ بلُّکے ءِ لوگ ءَ شتگ اتیں کہ لھتے ورگی سامان ئِے بدئیں، بلّی ءَ درائینت "من ءَ اے سامان پکار نہ اَنت بلے پہ ھاک ءِ کلّری ءُ ریزُم ءَ سسّایے بہ جیڑ اِت"

چمود ءَ من وتی شَور الّم کت اے مشکل ءَ رندگیری کناں چہ  صندوق توسعہ ملی" ءَ 103 ملیارد پرے کار ءَ گیشّینگ بوتگ۔

واجہ ءَ شھرستان دشتیاری ءُ بکش پلان ءِ نامانی درگت ءَ گپ جت ءُ گوشت کہ اے دمگ ءِ مردم وتی ملکانی بندری نامانی لوٹوک اَنت : ماں" حوزہ ترمینولوژیِ جغرافیای سیاسی" ءَ ھمے گوش اَنت کہ پہ نامگذاری ءَ باید دمگانی پجّار ءُ "ھویت" چار ءُ تپّاس بہ بنت، راجدپتری جھت ءَ ھمے دمگ کہ انّی دشتیاری ءِ نام ءَ اِنت، بُندر ءَ اے دمگ ءِ گیشتریں بھر باھو بوتگ کہ یک مزن بستاریں نامے بلے انّی منی کوشست، ھمش انت کہ پیرسھراب ءِ دھستان ءَ بکشے بکنین ءُ ماں آؤکیں باندات ءَ گوں بکش تلانگ، پلان ءُ پیرسھراب ءَ یک مزنیں شھرستانے گوں " دشتیاری بزرگ" نام ءَ جوڑ بکنیں ءُ بُندر ءَ دشتیاری مئے سرڈگار ءِ ھمے دمگ اِنت البت اگاں پہ ناماں چشیں مٹ ءُ سٹے بہ بیت، الّم ءَ اے کار گوں باھو ءُ دشتیاری مردمانی ھوری ءُ تپاکی ءَ بیت۔

ھِندیانی رو ءُ آ ءِ درگت ءَ واجہ ءَ درائینت کہ :ماں اے تیز رواجیں دنیا ءَ پمّا الّمی اِنت کہ گوں ھمساھگیں ڈیھ ءُ ملکاں چوکہ انڈیا ءَ دوستی ءُ ھمگرنچی بہ بیت بلے بژن اِنت کہ مئے اے ھمساھگیں دوستاں آ داب ءَ کہ گوشتگ اش وتی مسام ءُ اگدہ اش پیلو نہ کتگ اَنت ھر چُنت کہ ھمے گڈسراں انڈیا ءِ وزیرء راہ ءَ چھبار ءِ درگت ءَ لھتے تْرندیں کڈّن کتگ اَنت، بلے کِردی جھت ءَ دنیگت ھچ چشیں دگری نیاتکگ ءُ پرے بُنگپ ءُ باید " دیپلماسی " نند ءُ نیاد گیشتر بہ بیت۔

ایران ءُ چین ءِ ھم سنّتی ءُ تپاکی نامو ءِ درگت ءَ گوں زریپ ءَ گپوں جتگ،،،

واجہ ءَ ایران ءُ چین ءِ 25 سالی تپاکی نامو(قرارداد)ءِ درگت ءَ درائینت: ماں " قانون اساسی" ءَ ھمے گپ ھست انت کہ میان استمانی تپاکی نامو باید مجلس ءَ منّگ بہ بنت ءُ منی وتی جِند ءَ دو سے رند ءَ پہ مزن ریس ءُ پریسے ءَ چین ءُ ایران ءِ تپاکی نامو ءِ درگت ءَ گوں واجہ زریپ  ءَ گپ ءُ تْران کتگ، الّم ءَ کہ اے بنگپ ءِ سر ءَ ماں مجلس ءَ باوست بیت پرچاکہ دنیگت تپاکی نامو ءِ سرجمیں پھنات چار ءُ تپّاس نہ بیتگ اَنت ءُ باید پہ الّمی اے بنگپ ءَ سر ءَ "کمیسیون امنیت ملی" ءِ باسک ءُ مجلس ءِ جھگیر چار ءُ بیچار بکن اَنت، بلّے توری زوراکیں نزام ءَ  پہ مئے سرڈگار ءُ کشور ءِ ایرجیگ کنگ ءَ وتی سْرین ترماتگ ءُ روکپت ءِ نگاہ ھم مئے مشکلان توجیل نہ بیت بلے رودراتکیانی دامن ءَ لچّگ ھم مئے درد ءِ درمان نہ بیت۔

مجلس ءِ کمیسیون کشاوزری ءِ باسک ءَ درائینت: بے سِجلی مئے مزنیں مشکلے ءُ مجلس جھگیراں پریشی ءِ توجیل ءُ گیشوار ءَ مزنیں درگتے گوازینتگ بلے شَور ھمے بوتگ کہ گوں یک آرامیں "فضا" ءُ جاورے ءَ اے کار کنگ بہ بیت، من چہ اے مردمانی دردانی جُھلانکی ءَ چہ نزّیک ءَ زانتکاراں باید پہ بژن بگوشاں کہ بازیں بے سِجلیں مردمے ھست کہ پت ءُ پیرک ءُ پدریچ اش ھمے ایرانی بوتگ انت ،بلے سجل اش نیست لھتیں براتءَ ھست اِنت ءُ گوھار ءَ نیست،ءُ ھمے داب ءَ برات ءَ ھست گھاراں نیست، من اے بنگپ ءَ گوں تیوگیں پَنّی ءُ امنیتی پھناتاں پہ دلجمی رندگیری کناں، من اے گپ ءِ ھم منّوکاں کہ اے کار ءِ گامگیج سک کُنٹ اِنت ءُ انی  پہ ایرانی ماتانی چُکاں سجل ءِ دیگ ءَ باوست ھم چست اِنت بلے نامہ نگاری ءُ نبیسگ ءِ وڑ ءُ پیم ئِے انچیں دابے کہ دنیگت مردماں کارمرد کرت نہ کتگ ءُ ان شاءاللہ آؤکیں باندات ءَ مردمانی اے درد کمتر بیت۔

واجہ سئیدی ءَ وتی گپانی رندگیری ءَ کاجہ ءِ مَرگ لوپ (محور خطرناک) ءِ درگت ءَ درائینت: اے کشک چہ ناراہ ءُ جوکماں سَربار انت ءُ بازیں بیرانی ءُ ویل ھمے راہ کپتگ،  ما یک تپاکی ناموے ھمے درگت ءَ ٹھینتگ ءُ رندگیری کنگ ءَ ایں، راہ سازی " ماشین آلات" ھم آؤرتگ انت کہ اے بُرزَگ کمّیں بُرّگ ءُ جُھلتر کنگ لوٹ ایت، مَرگ لوپ ءِ باوست ءَ ما رندگیری کنگ ءَ ایں بلے مالی جاورانی سوَب ءَ ، دنیگت چشیں کارے نہ بوتگ ءُ ماں ایران ءَ گنداوگ ءِ شھرستان ءِ روستائی راھانی جاور چہ درستیں جاھاں گنتر انت ءُ مارا پہ تلانگ ءُ گنداوگ ءِ مرگ لوپ ءِ ھمگرنچی جوانیں بانداتے ءِ ودار انت۔

پلان ءِ نادراھجاہ ءَ سے دھہ ءِ اِنت کہ کلنگ زنی ءِ دودئِے برجم دارگ بوتگ بلے دنیگت دنز ءُ گُبارانی میار اِنت

مئین الدین سئیدی ءَ اے گپ ءِ نیمگ ءَ اشارت کرت ءُ گشت کہ ماں ایران ءَ منی " حوزہ انتخابیہ" دْراھجانی ءُ سلامتی ءِ جاور چہ درستاں نگیگ تر اِنت، ءُ من ماں وتی سات ءَ کہ گوں " مئاون اول رئیس جمهور" ماں استان بوتگاں، گوں واجہ ءَ گوشتگوں کہ پُلان ءِ نادراھجاہ ءِ کلنگ زنی واجہ ھاشمی ءِ رئیس جمهوری ءِ درگت ءَ بوتگ، ءُ پد چہ آئی ءَ دورہ اسلاھات بیتگ ءُ پد چہ آئی ءَ اھمدی نژاد ءِ باریگ بیتگ دو چکّر ءَ واجہ روھانی ءِ باریگ ءَ کلنگ زنی بیتگ ءُ انّی اگاں شما دگہ کلنگے ھمد ءَ بجن ات، پمّا نپت ءِ چاتے وَ جوڑ بیت بلے نادراھجاھے نہ بیت، وشی ءِ گپ ایش انت کہ پرے بنگپ ءَ زرکِشار ءُ " اعتبارے" گیشّینتگ اش ءُ گوں دانشگاہ اُلوم پزشکی ءِ ھمت ءَ " مناقصہ" ئِے ھم برجم بوتگ کہ یازدہ میلیارد تمن پریشی ءِ بُنپد ءُ اسکلت ءَ گیشینگ بیتگ اَنت

ءُ مسام اش کتگ کہ اے 32 تھتی نادراھجاہ ءِ دیمدرائی مان1401ءِ دھہ پجر ءَ بیت

واجہ سئیدی ءَ وتی گپانی رندگیری ءَ درشان کت: ءُ ھمے داب ءَ اے وشیں ھال ءَ شمارا سر کناں کہ بنگیجی رند اِنت کہ پہ چھبار ءِ 540 تھتی، نادراھجاہ ءَ 530 ملیارد تمن ائتبار گیشّینگ بیتگ،  کنرک ءِ نیرو دریائی ءِ نادراھجاہ ءِ  کار ءُ بار ھم رندگیری کتگ انی کارئِے گڈسری سیمسران اِنت،  پہ کسرکند ءَ " مرکز جامع سلامت" یے ءِ ھم چن ءُ لانچ ءَ ایں، کسرکند ءِ دمگ ءَ مشکلات باز اَنت ءُ گونڈکیں نادراھجاھے پُجّ اِت نکنت ءُ پرے آبریچ ءَ کرار اِنت 64 تھتی نادراھجاھے بندگ بہ بیت، بلے پَمے اوست ءَ کہ پلان ءِ نادراھجاہ ءِ ھوپ ئِے گْورگند مہ جنت،  ءُ ماں نگور ءَ ءُ زرآباد ءَ ھم کرار انت یک یک نادراھجاھے بندگ بہ بیت اے دوئیں پروجکٹ ھم بودجہ ءِ کتار ءَ اوشتاتگ اَنت۔

مجمِہ نمایندگان سیستان ءُ بلوچستان ءَ وتی گپانی رندگیری ءَ درائینت : دگہ کارے کہ من باز آئی ءِ رندگیر بیتگاں، ایش اِنت کہ نیکشھر ءِ نادراھجاہ ءَ چد ءُ مستر بکنیں،  ءُ " منطقہ آزاد" ءَ کہ وتی چاگردی اُگدھانی پیلوئی ءِ درگت ءَ یک راجدپتری کوتاھی یے کتگ بلے انّی بازیں تچ ءُ تاگے پہ چاگرد ءِ باندات ءَ کنگ ءَ انت ءُ گوں ما مسام اش کتگ،
 کہ ان شاءاللہ اے سالی پہ اے نادراھجاہ جوانیں زرکشار ءُ ائتبارے گچین کنیں، ھمے داب ءَ بنگیجی باریگ انت کہ چہ " مجموعہ بنادر" ءَ 300 ملیون تمن اعتبار پہ " حوزہ سلامت" ءَ دیگ بیتگ کہ پہ چھبار ءِ نادراھجاہ ءَ  "تجھیزات درمانی" زرتگ ءُ ھمود ءَ کارمرد بنت۔

*""چاگرد ءِ دیمروی ءِ کِشک گوں بانکانی ھمکوپگی ءَ بندوک اِنت'''

واجہ سئیدی ءَ پہ بلوچ بانکانی درگت ءَ گوشت: ماں اے پھنات ءَ درستیں نگاہ ءُ گپ کہ جنَگ بیتگ اَنت گیشتریں گْوشتانک دْروشمیں بیتگ اَنت ءُ پہ بژن کہ ما آ داب ءَ چاگرد ءِ مشکلانی گیشوار ءَ سوبین نہ بوتگیں، مارا درستاں پرے گپ ءَ اوست اِنت کہ چاگرد ءِ دیمروی ءِ کِشک گوں جنینانی ھمکوپگی ءَ دیم پہ منزل ءَ جنزان کنت، من ھمے گڈسراں یک دیوانے ءَ گوشتگ اَت کہ کرونا ءِ درگت ءَ سے ملکانی پدکِرد جْوانیں بیتگ اَنت کہ آ ملک، پنلاند، نیوزلند ءُ آلمان اَنت ءُ اے ھر سئیں ملکانی واکدار ءُ کارمستر بانُک اَنت بلے آ چیزے کہ ماں کِرداں گندیں دگری ھست ءُ منیں جھگیر ءِ اُگدہ اِنت کہ مردمانی ھکّ پانکجنی ءَ بکناں،  بگندئے ھمُک چاگرد گوں وتی کُنشاں بندوک بہ بیت۔

واجہ سئیدی ءَ وتی گپانی رندگیری ءَ درائینت: بیمہ ءِ درگت ءَ ھما بانُک کہ پُل دوچ اَنت ءُ دوچگر اَنت پرایاں "بیمہ بانوان خانہ دار" جوڑ کنگ بیت ءُ پہ بانُکاں پارک بانوان ءِ بند ءُ بست کہ بندن آزاد ءَ پرے کار ءَ جوانیں پریام(برنامہ) ٹھینتگ ءُ چہ بندن آزاد ءِ جوانیں کاراں دگہ کارے، پہ پلان ءُ کسرکند ءَ ھم دلمانگ انت پارک بانوان بہ بند اَنت، بلے گْواچن ایش اِنت کہ اگاں چہ ھر جھگیرے ءَ جست بکن ئے پہ بانُکانی ھکّ ءِ پانکجنی ءَ  چی اِت کتگ، بگندئے ابید چہ لھتے بے رد ءُ بندیں گپ ءُ لھتیں گْوشتن(شعار) ءَ دگہ ھچ گوشت مہ کنت، من ھمے گپ ءِ منّوکاں کہ جنیناں ماں راجدپتر ءَ مزنیں کِرد پیلو کتگ اَنت ،ھاسکن ماں بلوچستان ءَ اگاں شما راجدپتر ءِ تاکاں بہ لیٹین اِت گند اِت، کہ ماں چاگرد ءَ جنین مجّتی گوں مردینان ھمکوپگ بیتگ اَنت ءُ من ءَ اوست اِنت بگندئے یکروچے اے جھت ءَ ھم دویمروی ءُ گھتری کیت،، 

دیمتر ءَ واجہ سئیدی ءَ پہ چھبار ءِ ریل ءِ راہ ءِ بارو ءَ درائینت: پہ بژن کہ اے چہ کارمسترانی ھما مُسامان اِنت کہ ھجبر پیلو نہ بوت ءُ پمّنی گُمان ءَ چریشی ءَ ھمے سڑکّ گھتر اِنت کہ چہ چھبار ءَ دیم پہ میلک ءَ روت پرچاکہ گیشتریں بار وَ چَمے سڑکّاں کشّگ ءُ برگ بیگ ءَ انت ءُ ریل گاڑی ءِ راہ ءَ دنیگت پر ما سیتّے گون نہ بیتگ ءُ پہ بژن کہ مئے روستائی راہ ءُ مزن دگّانی" شاخص" نکشون( جدول) ءِ ھما جَھلتری تَبکان اِنت،  پہ بژن کہ مئے اُستان ءِ ایوک ءَ گوریچانی پھنات ءَ 200 کیلومتر ءَ مزن دگّ( بزرگ راہ) ھست اِنت ءُ مکران ءِ تیابدپ ءُ زرباری نیمگ ءَ مزن دگّ نہ گْواہ ایت ھالانکہ مئے ھمساھگی ءَ پہ دَروَر ماں کرمان ءَ ،چہ چارھزار کیلومتر ءَ گیش مزن دگّ ھست اِنت پہ گواچنی اے پند ءُ دوری دراج ءُ راجدپتری اَنت بلے ما پہ ایشانی بُرّگ ءُ وتی وس ءُ کوشست ءَ کنیں۔

واجہ ءَ دیمتر ءَ گوشت: ھمے داب ءَ پہ نیکشھر ءُ کنرک ءَ "تامین اجتماعی ءِ درمانجاھے ءِ ھم چن ءُ لانچ ءَ ایں،  ماں مئے استان ءَ تامین اجتماعی ءِ 6 نادراھجاہ ھست اَنت کہ ھر یکے ءِ دوری ءِ پند چہ یکدگر ءَ 300 کیلومتر اِنت بلے چہ کنرک ءُ چھبار ءَ باید 750 کیلومتری پندے بہ بُرّئے داں زاھدان ءَ سر بہ بئے(پرچاکہ چد ءَ تامین اجتماعی ءِ نزیکتریں نادراھجاہ ھمود ءَ انت) منی" حوزہ انتخابیہ" ءَ مردم نزّیکء 300 ملیارد تمن پول پہ تامین اجتمائی ءَ دے اَنت ءُ اے مئے ابرمی ھکّ اِنت کہ اے چیز ءِ رندگیر بہ بئیں۔

استاں بھر ءُ بانگ، مشکلانی توجیل نہ اِنت

سئیدی ءَ استان ءِ بھر ءُ ونڈ ءِ جنجالی بنگپ ءِ درگت ءَ درائینت: استان ءِ بھر ءُ بانگ ءِ گپ دنیگت ماں وزارت کشور کارشناسی نہ بوتگ من اے گپ ءِ منّوکاں کہ چشیں کار ءُ "طرح" باید گوں شھسسّایانی پجّیگ ءَ ، گوں ورنا ، چاگرد پھازیں مردمانی ھواری ءَ ءُ چہ ھمُک دید ءُ نگاہ ءَ اے کار ءِ سر ءَ چار ءُ تپّاس بہ لوٹ ایت، چشیں "طرح" داں ھیرت چاری مہ بنت بگندئے وشیں آسرالے پہ ایشاں گُمان جنگ مہ بیت ءُ باید دلجمیں کارشناسی بہ بیت ءُ دگہ ھبرے ایش کہ لھتے مردم اے سر ھال ءُ بنگپ ءَ گوں "ناموسی" دید ءُ نگاھے ءَ چار اَنت، پہ کارشناسی ءَ نیل اَنت اے بنگپ ءِ سر ءَ باید گیشتر دیرچاری ءُ تپاس بہ بیت آیا پہ گواچنی گوں استان ءِ بھر ءُ بانگ ءَ تیوگیں اڑ ءُ مشکل توجیل بنت، الّم ءَ کہ کس گوں اے کار ءَ تپاک نکنت، منی شَور ایش انت کہ گوں استان ءِ انّیگیں جاور ءَ، اگاں ما تیوگیں ادارات کُلاں" پہ گونڈکیں درگتے ءَ استان ءِ دگہ ھَند ءُ جاھاں بھر ءُ بانگ بکنیں ھاسکن ماں زربار ءُ ،تیابدپاں پہ استان ءَ سیتّمندتر بیت۔ 

دیمتر ءَ درائینت ئِے : ما درست اے گپ ءِ منّوکیں کہ " آزاد اندیشی" ءِ کُرشی باید ماں دانشگاہ ءُ شھدربرجاھاں ایر کنگ بہ بنت، ھما باید بیاینت اے گپچلاں گوں کارزانتی ءُ کارشناسی گیش ءُ گیوار بکن اَنت، داں اے ادار ءَ ھچ وڑیں کارشناسی اے بنگپ ءِ سر ءَ نہ بیتگ، پد ءَ ھم کڈن کناں کہ دنیگت ماں مجلس شورای اسلامی ءَ چشیں دستورے دیگ نہ بیتگ، ءُ من ھمے گپ ءِ منّوکاں کہ بگندئے پہ چشیں بنگپاں دگہ وھد ءُ باوستے پکار اِنت۔

چھبار ءِ مجلس ءِ جھگیر ءَ درائینت : ڈنی باپاری( سرمایہ گذاری) ءِ جھت ءَ اگاں ما دیمروی لوٹیں، گڑا باید ڈنی باپارانی آیگ ءِ راہ ءَ جوک ءُ ھموار بکنیں،  نے ایوک ءَ چھبار ءَ بلکیں گوں اے زوراکیں نزام ءِ تھریماں تیوگیں سرڈگار ءَ ڈنی باپاری ءِ راہ ءُ در بند کتگ انت چہ دگہ نیمگے ءَ راجدپتری ریشگ ءُ باورانی توک ءَ ھم دگری ھست بزاں اگاں چد ءُ شرتر بگوشاں ھمے تھریمی اے کار ءِ سوَب بوتگ اَنت۔۔

رجانک : ھیدر راھچار