بلوچستان ءِ تہ ءَ پدروچگ ءِ کَچّ ءُ کساس چیںچُک ءَ گیشّینگ بوتگ + تامر

مولوی یارمحمد پناہ ، ماں نند ءُ نیادے گوں میارجل ءِ ھالکار ءَ اے وڑ ءَ سرپدی دات ، ھما لس مھلوک کہ آھان ءَ ۵۲/۵ ٹولا نگرہ ، یا ھمے کچّ ءِ دگہ سامان ءُ مالی وس ءُ واک بہ بیت ، آھان ءَ پدروچگ ءِ دیگ ھژدری انت . ایںچوکیں مال ءُ مڈّی ءِ وس ءُ واک ءِ مَٹّ ، چہ ھر ٹولا ءِ نھاد ماں ایران ءُ گیدی ءِ تہ ءَ ایرانی زرّ ءِ ھساب ءَ ، سرجم ۲۸ ملیون ءُ ۹۶۶ ھزار ءُ ۵۷۲ تومن انت ، چمشکا پدروچگ ءِ دیگ ، چوشیں ھزگاری ءِ مردمانی سر ءَ ھژدری انت .

چھبار ءِ آدینگ ءِ نمازانی ھداروکیں پیژ امام ءَ ھر مردم ءِ پدروچگ ءِ کساس ءَ ، چہ ۲ کیلو ءُ ۳۲۰ گرم گندیم ءُ آرت ءِ ھساب ءَ ، یا کہ ۴ کیلو جو ، کشمش ءُ ناہ ءِ نھاد ءَ گیشںتگ ءُ سرجم ءَ ، پہ ھر نپر ءَ ۵۰ ھزار تومن جار جتگ کہ ٹوہ ءُ گونڈیں مردمانی سر ءَ دیگ ءِ الّمی انت .

اے واجہ ءَ وتی گپان ءِ رند گیری ءَ گوشت کہ روچگ داریں مردماں ، وتی پدروچگ ءَ وھد ءِ سر ءَ ماں روچگانی ماہ ءِ درگت ، یا کہ اے ماہ ءِ روچانی دومی بھر ءِ تہ ءَ بہ دے انت . 

مواوی پناہ ساھب ءَ گوشت ; زلورت انت کہ پدروچگ ھما نیزگاریں مردمان ءَ دیگ بہ بیت دانکہ آھاں پہ وت ءَ سھوری ءُ دبّوج ءِ وراکی یا کہ پہ ائید ءَ نوکیں گُد ءُ پچّ ءُ دگہ زلوری ایں سامانے ءَ بہ گِر انت ءُ پورہ بہ کن انت . 

واجہ ءَ گیش کت پدروچگ ءِ دیگ ءَ بازیں اردشت ءُ بستارے گون انت ءُ روچگ داریں مردمانی بد زبانی ءُ دگہ موک ءُ ملامانی آپوری ءِ سَوَب بیت ، پد روچگ ءِ دیگ زکات ءِ دیگ ءِ وڑ ءَ انت ، بزاں ھما مردمانے ءَ کہ زکات گِر انت ، پدروچگ ھم گِپت کن انت . آ مردمانے ءَ کہ آھان ءَ زکات ءِ گِرَگ ءِ موکل نیست ، پدروچگ ءِ گرگ ءِ موکل ھم نہ انت / رجانک : میرجلال