بلوچ راج ءِ دود ءُ روبیدگاں ماں روچگانی ماہ ءَ ، میارجل ءِ ھال ءُ تران

چہ میارجل ءِ بنجاھی ھالرسانی ءِ ھالانی رد ءَ ; بلوچ راج ءِ زالبولاں ، پہ دبّوج ءُ سھور ءِ پرزونگانی جریدگ ءُ تیاری اں بازیں جھدے کن انت ءُ لوگمان ءِ پرزونگ ءِ چِست ءُ ایرانی کارمستری ءُ شوھازگاں ، زالبولانی ڈوبہ انت ، آھاں گیش چہ دبوج ءُ سھور ءَ پرزونگانی جریدگ ءُ تیاری ءَ ، ترابی نمازانی سرپانی رد ءَ اوں مسیتانی تہ ءَ بھر زور انت .

پکُوڑا ءِ پَچَگ ماں لوگاں اوں روچگانی ماہ ءِ یک اسلیگیں کار ءُ بارے انت ءُ چھباری لوگانی زالبولاں وتی ایوار ءِ نماز ءَ رند اے کار ءِ ھاتر ءَ جریدگ بنت .

پکوڑا ءِ بھا ءُ برید ماں چھبار ءِ بازار ، بلّوکانی بازار ، بلوچستان ءِ دگ ءِ کَش ءُ پھناتان ءُ شھر ءِ دگہ کونڈ ءُ جاھانی تہ ءَ برجاہ انت ءُ لس مھلوک وتی پکوڑا ءَ چہ ھمے جاھاں زیر انت .

ھزگاریں مردماں اوں ماں شابان ءِ ماہ ءَ یکّ ءُ دو پس ءَ کُش انت ءُ تباھگ کن انت ، یا کہ پہ بھا زُرتگیں گوشتاں گوں تباھگ اڈ کن انت ءُ دبوج ءُ سھور ءِ وھداں ور انت .

تباھگ ءِ اڈ کنگ ءِ وڑ ، اے داب انت کہ اولسر ءَ گوشت ءِ ھازگان ءَ نازرکیں تلّے ءِ داب ءَ بُرّ انت ءُ رند ءَ ترُپشیں ھِنار ءِ چُپتگیں آرت ، لِمبور ءِ آپ ءُ واد ءَ آئی ءِ سر ءَ ریچ انت . پدا کمّے تَرّ ءُ شُردیں گندیم ءِ آرتی لوج انت ءُ پِر مُش انت ، نیں اے تیاریں گوشتان ءَ بند ے ءِ سر ءَ سُمب انت ءُ پہ ھُشک بیگ ءَ ، روچ ءِ برمش ءِ دیم ءَ داں چُنت شپ ءُ روچ ءَ تاپ کن انت دانکہ مدان مدان ءَ ھُشک بہ بنت . 

تاپیں گوشتانی ھُشک بیگ ءَ رند ، آھان ءَ یک گُد ءُ پُچّی تورگے ءِ تہ ءَ ایر ءُ امبار کن انت دانکہ روچگانی ماہ ءَ یا کہ دگہ وھدے ، پَکَّگیں بَٹّ ءِ گوم ءَ بہ ور انت .

تباھگ ءِ تیاری ءُ جریدگی ءِ دود ءُ داباں ماں بلوچستان ءَ چہ پیشی وھداں برجاہ بوتگ ، اے کار یک ھپتگ داں ۲۰ روچ ءَ وھد کَشّ ایت ، پمیشکا تباھگ ءِ تیاری ءِ سر ءُ چیراں چہ شابان ماہ ءِ دومی بھر ءِ روچاں بندات کنگ بیت . پہ اے وراک ءَ مردمان ءَ پابُندی پَس ءِ گوشت یا کہ گوکی گوشت ھازگاں زلورت انت .

چھبار ءُ کنارک ءِ تیاب دپی مردماں ، وتی روچگ ءَ گوں بَستگ ءُ نوکیں یا کوھنیں ناہ ءَ بوج انت . مُلکی نیوگ ، چوشکہ موز ، چیکو ، پپیا ءُ اَمب ، دبوج ءُ سھور ءِ وھد اں ورگ بنت . 

چنگال کہ گوں ناہ ءُ تیموش یا کہ سیسِرک ءِ نگن ءُ مالی روگن تیار کنگ ءُ جریدگ بیت اوں یکّے چہ دبّوج ءِ وراکی ان انت .

تَرابی ءِ نماز ، ماں روچگانی ماہ ءَ ، چھبار ءَ گیشتریں مَسیتانی تہ ءَ برجم دارگ بیت ، اے نماز ۲۰ رُکَت انت کہ پاک وان ءِ چہ بر وانینوکیں پیژ امامانی پُشت ءَ وانگ بیت . ترابی ءِ نماز ، چھبار ءِ بندن آزات ءِ لھتے مسیتانی تہ ءَ ھاسکار ماں بیاپاری بنجاھاں چوشکہ ، تیس ، پردیس ، ابریشم ، صالح یار ءُ پردوس ءِ مسیتاں ، چہ پاک وان ۱۰ گونڈیں سورت "فیل" داں "ناس " ءَ سورتانی سر ءَ وان انت ، اے درھیں بنجاھانی ڈنّی کَش ءُ کِرّ ءَ یک مسیتے ھست .

وھداں سھور ءِ درگتاں ، لھتے جار کشّ ءُ پاکاریں مردم ، روچگ داران ءَ چہ واب ءَ بُست داتگ ءُ گوڑینتگ بلے انیگیں زمانگ ءَ اے دابیں دود اں بیگواھی آماچ بوتگ انت . 

روچگانی ماہ ءِ درگتاں ، سَدَکہ ءُ زکات ءِ دیگ ، پہ نوکیں مسیت ءُ مکتبانی اڈ کنگ یا کہ آے نیکراھی بنجاھانی نوک ساچی ءِ کُمََک ءُ مَدَت کنگ ءِ ھاتر ءَ ، ماں چھبار ءُ اے دگہ تیاب دپی ھند ءُ دمگاں ، چندا ءِ دود ءُ روبیدگ ءِ ھساب ءَ ھیریں کارانی ھاتر ءَ چہ اے دگہ ماھاں گیش تر بنت ءُ پہ اے کار ءَ ، چندا گراں مسیتانی دروازگانی دپ ءَ اوشت انت یا کہ نماز ءِ سرپانی تہ ءَ تَرّ انت ءُ لُنگ ءِ دارگ ءَ گوں ، پہ بَزّگیں مردمان ءُ مکتب ءُ مسیتانی نوک ساچی ءِ ھاتر ءَ چندا کن انت .

نادراہ ءُ نادوریں مردمانی گِند ءُ گُزار ، دوست ءُ ھمبل ءُ سیاد ءُ وارسانی چارگ ، ائید ءِ نوکیں گءُ پُچّ ءِ ھرچ ءُ درچ ءِ دیگ اوں ، چہ اے دمگانی نندوکیں مردمانی دگہ دود ءُ روبیدگاں شمار بنت . 

روچگانی ماہ ءِ آھر ءَ ، گیشتریں مردماں پہ وت ءَ ائید ءِ گُد ءُ پُچّ ءَ دوچ انت ، ائید ءِ روچ ءِ درگت ءَ ، مردیناں گوں وتی نوکیں گد ءُ پُچّاں ائیدگاہ ءَ رو انت ءُ اے روچ ءِ ھاسیں نماز ءَ برجم دار انت . گُونڈیں زھگاں گوں وتی پت ءُ مستریں مردماں ائید ءِ نماز ءِ سرپانی رد ءَ ، زیب داریں براھے ءِ گوم ءَ ھور ءُ ھمراہ بنت . نماز ءِ برجم دارگ ءُ نیکیں دواھانی لوٹگ ءَ رند ، نماز کنوکاں یکادگر ءَ ھمباز کن انت ءُ چہ وت ءَ پھلّی لوٹ انت . بلوچستان ءِ راجمان ، ھاسکار چھبار ءِ لس مھلوک ءِ نیکراھی مارشتانی رد ءَ ، اگاں گوستگیں سال ءِ سروھد ءَ ، آھاں ھرچونیں ردی ئے کتگ ، پھلّی لوٹگ ءَ رند چہ وتی ردی ءِ گناھاں آپور بنت . پھلّی ءَ پد ، گونڈوئیں زھگاں چہ وتی پت ءُ مات ءُ ٹوھیں مردماں ، ائیدی گِر انت ، انچوش اگاں ائید ءِ روچ ءِ درگت ءَ کسے ءَ پھلی لوٹگ ءِ موہ نہ رس ات گُڑا داں ۳ روچ ءَ آئی ءَ اے دود ءِ برجمی ءِ موکل ھست .

مردینانی ائیدگاہ ءِ رَوَگ ءَ رند ، لوگمان ءِ زالبولاں وتی نوکیں پُچّ ءُ گُداناں گورا کن انت ءُ ائید ءِ سبارگ ءَ تیار کن انت . چہ آئی ءِ پد وتی مردینانی واپدی ءِ وداریگ بنت دانکہ چہ وتی جود ءُ پت ءُ براتاں پھلی بہ لوٹ انت ءُ ائید ءِ شادھیں روچ ءَ ھوری ءَ بہ گوازین انت . 

ائید روچ ءَ بلوچستان ءِ لس مھلوک ، وتی گُزِر ءُ مسترینانی گَند ءُ گزار ءَ اشتاپ کن انت ءُ وتی ٹکّ ءِ بیراں بوتگیں مردمانی پُشت ءُ پدان ءَ اوں سرے کَش انت

رجانک : میرجلال