تامر | نیکشھری ھلوا ، بلوچستان ءِ ٹیکی پہ ایران زمین ءِ سجّہ ایں مردماں

چہ میارجل ءِ بنجاھی ھالرسانی ءِ ھالانی رد ءَ ; کار ءُ چلوپگانی پلامرزی ءُ کار اڈ کنوکی بنجاھانی پجّارینگ ، میارجل ءِ یکّے چہ مول ءُ مرادان انت .

اے ھالرسانی بنجاہ ءِ ھالکاراں ماں درھیں بلوچ نندوکیں دمگان ءُ بلوچستان ءِ کونڈ کونڈ ءَ ، پہ اے کار ءِ ھاتر ءَ جزم ءُ تیار انت .

اے ھلوائی کارجاہ چہ واجہ سبیل رئیسی ءِ ھِمّت ءَ گوں ۱۵ ملیارد تومن بُنمال بندی ءِ کَچّ ءَ ، پہ کار ءُ چلوپگ ءِ ردوم ءُ دیمروی ءِ ھاتر ءَ اڈ کنگ بوتگ .

دیمتر ءَ شما را یک تامرھالے ءِ رد ءَ ، اے ھلواجنی کارجاہ ءِ بارو ءَ گیشتریں سرپدی رس ایت.

ھلواجنگی کارجاھاں ماں گِہ ءِ دمگ ءَ ھمک روچ ءَ گیش بیان انت ءُ یک برجاھیں بیاپارے ءِ رد ءَ اے ھند ءُ دمگانی مستاگے انت ، پمیشکا ماں اے گپ ءِ سر ءَ کَڈّں کن ایں کہ اے وڑیں ھلوا ءِ نامدات ءَ ماں توکی ءُ ڈنّی بیاپاری تک ءُ پھناتاں ، گِہ ءِ پنام ءِ سر ءَ پجّارینگ بیت .

گِہ دمگ ءِ "میراث فرھنگی و صنایع دستی" کارگس ءِ کارمستر ، یک گپّ ءُ ترانے ءِ رد ءَ گوں میارجلّ ءِ ھالکار ءَ گوشت ; اے ھلوا ءِ تیاری ءِ ھاسیں پَکّگ ءِ وڑ ءُ داب ءُ آئی ءِ نوک ءُ زیبداریں بَنڈل بندی ءُ پُر نام ءُ تواری ، گِہ ءِ مشکتی ھلوا ءِ بھا ءُ بریدی چمشانکان ءَ دیم پہ "عمان" ءِ بازاراں کہ دگنیا ءِ مشکتی ھلوا ءِ بن زہ انت ، گُوَم ءُ گیگ داتگ ءُ پاچ کرتگ . بانُک خیرالنساء امیری ءَ گوشت ; ھر روچ ، ۸ "تن" ھلواءِ کَچّ ، ماں گِہ ءِ دمگ ءَ ۶ کارجاہ ءِ تہ ءَ اڈّ کنگ بیت ، اے کار پہ ۱۰۰ نپر ءَ تچکین ءُ کش ءُ گُوَری چلوپگ درگیتکگ .

آئی ءَ گیش کت کہ شکر ، لِمبور ءِ جَوَّر ، کُنجیت ، زاپران ءِ آپ ،روگن ،گلاب ءُ نشاستہ ءِ آرت ، ھلوا ءِ زلوری ایں سامان انت ءُ آھر ءَ ھم گوں پستہ ءُ بادام ءِ پَچک ءُ کوپڑا (نارگیل) ءِ گونڈیں تروکاں آئی ءَ براہ دار کن انت .

اے بانک ءَ گُوَشت ; سات ءُ سپر کنوکانی ھاتر ءَ ، چھبار ءُ پھرہ ءِ شھدگ ءِ کَش ءُ کِرّ ءَ ، ۲ ھلواجنی ءِ کارجاہ ءُ نگین ءِ مکران نامیں سات ءُ سپر کنوکی ءِ آسراتی بنجاھے ، ھیچان ءِ کلّگ ءِ ھدّات ءَ راہ پِرّینگ بوتگ انت دانکہ اے دمگ ءِ ٹیکی ءَ پہ ایران ءِ سجّہ ایں تک ءُ پھناتاں سر بہ کن انت .

اے آسراتی ءِ بنجاہ ماں یک زمین ءُ پٹّے ءَ پہ ۲۰ مردم ءِ ھاتر ءَ کار ءُ چلوپگ ودی کتگ .

واجہ سبیل رئیسی ، ماں وتی گپان ءِ دگہ بھرے ءَ گوشت کہ ۶۰۰۰ متر زمین ءِ سر ءَ ، اے سات ءُ سپر کنوکانی آسراتی بنجاہ ءِ کَش ءُ پھناتاں ، مُلکی وراک چوشکہ امباگ ، کرائی ، تندوری ، بریانی ءُ بلوچی ھاسیں رَگبند جریدگ ءُ بھا کنگ بیت .

ماں اے کارجاہ ءَ روچے ۱۰۰۰ داں ۱۵۰۰ کیلو ھلوا ، سوز ، سیاہ ءُ زرد رنگیں گونابانی سر ءَ ، اڈ ءُ ملکی مردمان ءَ ٹیکی ءِ ھساب ءَ بھا کنگ بیت .

گِہ ءِ ھلوایاں گوں گوادر ءُ مشکت ءِ ھلوایانی وشتامی ءَ زور چکّاسی کن انت ءُ گیش چہ ایرانی ھند ءُ دمگاں ، دیم پہ "خلیج فارس" ءِ میانھور ءِ تل ءُ توکی زرواناں ، ٹیکی ءِ ھساب ءَ راہ دیگ بنت .

رجانک : میرجلال