زبان زانتین مردمے کہ لوٹ ایت وتی راج ءِ روبیدگی مڈی ءَ وتی آیوکیں پدریچ ءَ سر بہ کنت

درستاں زان انت کہ کریم بکش اندیش نامیں مردم دگنیا ءِ چنت زبان ءَ گوں گپ کنت . چہ مرد ءُ میارجل ءِ اھوالکار ءِ گپ ءُ تران ءَ سرپد بوت ایں کہ "اندیش" ءَ لوٹ ایت بلوچ راج ءِ دستی ازم ءُ ھنر ءَ گوں دگنیا ءِ مردماں پجّار بہ دنت . چہ دگہ نیمگے گوستگیں روچانی تہ ءَ چہ ملکی ءُ ھندی رسانکدرانی نیمگ ءَ بلوچستان ءِ زرباری دمگان ءِ یک ازمگریں مردمے ءِ بیرانی ءِ ھال شنگ ءُ تالان بوتگ . اے ھال ءِ رد ءَ چہ ھند ءُ دمگ ءِ اگدہ دارانی نادلگوشی ، ازمگریں مردمانی بارو ءَ بازیں گلّہ ءُ ماسیت درشان بوتگ انت ، پمیشکا زلوری انت کہ پیش چہ دیر بیگ ءَ ، ازمگر ءُ ازمکاریں مردمانی سار ءُ گھمار دارگ بہ بیت .