پھرہ ءِ علوم پزشکی زانشت جاہ ءِ کولہ روگ چہ
چہ میارجل ءِ بنجاھی ھالرسانی ءِ ھالانی رد ءَ ; بھداشت ءُ جاندراھی ، ھرچ چاگرد ءِ یکے چہ اسلی چیر ساچ انت کہ چہ درستاں پیسر ءَ آئی ءَ وتی کارندہ انی گھمارداری لوت ایت . پھرہ ءِ "علوم پزشکی" شھدربرجاہ ، سلامتی ءُ جاندراھی پڑ ءِ ٹوہ تریں جھگیر ماں بلوچستان انت کہ انیگیں روچاں آئی ءِ بازیں کارندہ ئےچہ وتی ۳ ماہ ءِ پگارانی پشت کپگ ءِ مونج ءُ تکانسری اں ، گپ کن انت .
اے کارندہ اں پیش چہ وتی گپ کنگ ءَ گوش انت ; مئے پجار پدر مہ بیت پرچا کہ "علوم پزشکی" ءِ کارمستر ءُ کماشان ءَ ھچ بروسہ ءُ پروائے نیست اگاں ھر کس ءِ پجار پاشک بوت الم ءَ چہ کار کشّگ بیت ، ما چہ وتی ھک ءَ سرپدیں بلے پہ ما را دگہ رھدرے نیست ءُ بازیں سالے انت کہ ما اد ءَ کار ءَ این ءُ ما را چہ وتی در کنگ ءِ ترس ایت .
اے کارندہ وتی گپانی دیمتر ءَ گوش ایت کہ ۳ ماہ انت کہ بے زرّی ءِ سکی انی آماچ ایں ، چہ بانگانی وامداری بگر داں لاپ ءِ والینگ ءَ . کار ءُ ڈنڈاہ ءِ موڑ چہ ما را پچ گِرَگ بوتگ . لوگ ءِ واتر بیگ ءِ وھد اں مئے زھگ ءُ چوریگ پہ ورگی ءُ سامان ءِ پٹولے رھچار انت بلے مدام گوں ھورکیں دستاں کا ئیں . چہ نداری ءِ بازیں لجّ ءُ شرموکی ءَ برے برے وتی لوگمان ءِ چوریگان ءَ وتی پت ءُ مات ءِ لوگ ءَ بریں . ھچ کس مئے واری ءُ بَزّگی ءِ کسہ ءَ نہ اشکنگ انت ، ھچ زمہ واریں اگدہ دارے "علوم پزشکی" ءِ مستر ءُ مھتران ءَ جُستے ھم نہ کنت کہ "شرکتی" کارندہ انی موک ءُ ملام چے انت کہ ۳ ماہ انت بے پگار ءَ منتگ انت ، اے واجہ گوں ارسیگیں ھالے ءَ گوش ایت ; انچوشیں شپ مئے سر ءَ گوستگ کہ ما را شام ءِ ھاتر ءَ وَرَگ ءُ وردنے نہ بوتگ . ما ھمینچوک زرّ چہ دگراں وام کتگ کہ دگہ واپد کنگ ءِ وسے ھم پشت نہ کپتگ .
مسعود ( نامدات ) نامیں یک کارندہ اے دیم پہ میارجل ءِ ھالکار ءَ گوش ایت ; اے ۵ سال انت کہ "علوم پزشکی" زانشت جاہ ءِ تہ ءَ پہ "شرکتی" مزدور اں ، دگہ نہ کار ءِ وسے پشت کپتگ ءُ نئے لوگ ءِ واتر بیگ ءَ واکے ، وتی لوگمان ءِ مردمانی شرمندگ اں ، من ءَ دہ ماھیں گونڈوئے ماں لوگ ءَ ھست . بے اسناپی نہ انت کہ ما را ۳ ماہ انت پگار نہ دے انت ؟ مئے اگدہ داراں اے پگر ءَ نہ انت کہ ۳ ماہ ءِ دراجی ءَ بے پگار چوں کار کنگ بیت ؟ منی زھگے نادراہ ات ءُ زھگ ءَ نادراہ جاہ ءَ سر کت ، اود ءَ من سرپد بوتاں کہ چہ اے ھاتر ءَ کہ زانشت جاہ ، مزدورانی بیمہ ءِ زرّان ءَ نہ داتگ مئے بیمہ ءِ آسراتی ھم بند انت ءُ چمشکا زھگ ءِ دکتر ءُ درمان ءِ ھاتر ءَ گرانیں ھرچ ءُ درچے منی سر ءَ ڈول بوت ، اے درد ءِ تورشت ءَ ما کجا ءُ کئے دیوان ءَ سر بہ کن ایں ؟ زانشت جاہ ءِ مستر ءُ سروکاں یک رندے مئے جاگہ ءَ بہ نند انت باریں منّ انت کہ داں ۳ ماہ ءِ دراجی ءَ بے پگار کار بہ کن انت ، آھانی بیمہ بند بہ بیت ءُ رند ءَ وتی درمان ءِ ھرچ ءُ درچ ءَ آزاتیں نھادے ءَ گوں بہ دے انت ؟
رضا ( نامدات ) نامیں دگہ کارندہ ئے میارجل ءِ ھالکار ءَ دیم ءَ گوش ایت ; پیشتر ءَ یک رندے پہ وتی مزدوری ھک ءِ ھاتر ءَ من کموکیں تھروزے چست کت چمشکا زانشت جاہ ءِ سر مستراں من ءَ چہ وتی کار ءُ ڈوبہ ءِ سر ءَ داں چنت وھد ءَ دگہ دورسریں کلگے ءُ ، پہ یک ادنائیں کارے ءِ کنگ ءَ کڈّن بوتاں ، اے ماھانی درگت ءَ من ءَ گرانیں جاورھالے سر ءَ کپت ، باز رند ءَ انچوش مار ات کہ چہ کار ءَ درکپ اں بلے من ءَ وتی پیسری بازیں سالانی کار ءُ مھنتانی ھاتر ءَ بَزّگ بوت . اے واجہ وتی گپانی رندگیری ءَ گوشت ; اے درگت ءَ من باز سکّی سگّ ات ، منی لوگمان ءِ مردماں ھم واری کشّ ات ، زھگانی دربرجاہ ءِ سرکنگ اوں لھتے وھد ءَ پشت کپت ، در پدر بوتاں ، پھرہ ءِ "علوم پزشکی" زانشتجاہ ءَ کار ءُ چلوپگ ءِ بودشت ءَ چہ ما گپتگ ، گیش چہ ۱۷۰۰ کارندہ ءِ پگار چنت ماہ انت کہ پشت کپتگ بلے اشانی گوشاں مورے ھم نہ وارت . زاناں اشاں وت ءَ زھگ ءُ چوریگ نیست ؟
اے واجہ وتی گپان ءِ دگہ بھرے ءَ گیش کت ، باور کن کہ کار ءِ ھلاس بیگ ءَ پد ، من وتی لوگ ءَ واتر نہ باں بلکیں تچک ءَ پہ مساپر ءِ برگ ءَ شھر ءُ بازار ءَ رواں ، برے برے ھم بنزن بھا کناں ، باریں اشان ءَ شات بیت کہ پھرہ ءِ "علوم پزشکی" ءِ یک "شرکتی" کارندہ ئے ( کارندہ اں ) بنزن بھا بہ کن انت ؟ چوں کن ایں ؟ مئے کار سکّ گران انت ءُ باز رند ءَ چہ بازیں کارانی کنگ ءَ سکّ ژند باں
، مجبور باں کہ موٹل ءِ توک ءَ کمے دم سارت کنان ءُ رند ءَ مساپر بہ براں . اے واجہ وتی گشتانکانی گڈّی بھر ءَ گوشت ; چہ میارجل ءِ ھالرسانی بنجاہ ءَ کہ مدام مردمانی ھکّ ءُ اگبالان ءَ پیلو کتگ دزبندی کناں کہ مئے ھاسکاریں وڑے مئے ھکانی رندگیری ءَ بہ کنت . ما ءُ مئے لوگمان ءِ مردماں شما را نیکیں دوا کن انت ، ما اگدہ دارانی بازیں در ءُ دروازگے ٹوک اتگ بلے دنیگت ءَ بے کٹ بوتگ پمیشکا نوں میارجل ءِ دامن ءَ گپتگ بلکیں ما را کسے مئے گپاں اشکت بہ کنت .
ھالکـار : صالحہ دادکانی
رجانک : میر جـــــــلال
https://mayarjal.ir/fa/5354/
کارمرز کنوکانی هیال