پنّوچ ءِ آدینگ روچانی نماز ءِ ھدارُکی پیژ امام ، اے دمگ ءُ تنگ سرھد ءِ میانیں راہ ءِ پورہ نہ بیگ ءَ ر

چہ میارجلءِ بنجاھی ھالرسانی ءِ ھالانی رد ءَ ; واجہ مولوی اللہ بکش کازی ، پنوچ سُنّی انی آدینگ ءِ روچانی پیژ امام ءَ گوشت : تنک سرھد ءُ پنوچ ءِ درمیانیں راہ ءِ کارانی چار ءُ بیچار ، پہ اے راہ ءِ کَش ءُ کِرّی کَلّگانی نندوکیں مردمانی آسراتی ءِ مول ءُ مراد ءَ بوتگ ءُ چہ آئی ءِ بنداتی کاراں داں انّی ءَ ۱۸ سال گوزگ ءَ انت .

 راھداری ءِ کارگس ءِ زمہ وارانی گوشگ ءِ رد ءَ ، داں انی ءَ ۵۸ ملیارد تومن اے پڑ ءَ ھرچ ءُ درچ بوتگ بلے داں انگت ءَ ھم ناسرجم انت . 

اے واجہ گوں اے گپانی درشانی ءَ کہ اے راہ ءِ اڈ بیگ ءَ رند ، پنوچ ءِ دمگ ، چہ مُکلانی بُن زولی ءِ جاورھال ءَ در کپ ایت ءُ لس مردم اے ھند ءُ دمگ ءِ رُدوم ءُ دیمروی ءَ را گِند انت . مولوی ساھب ءَ ( انچوش ) گیش کُت کہ پہ اے راہ ءُ دگ ءِ سرجم بیگ ءَ گیش چہ ۶۰۰ ملیارد تومن ، زرّ ءُ بُنمال ءِ زلورت انت . اے واجہ ءَ پدَّر کت کہ پنوچ دمگ ءِ بود ءُ رُدوم ءِ ایوکیں گیگ ءُ گُوَم ، اے راہ ءُ دگ ءِ پورہ ءُ سرجم بیگ انت ءُ اگاں اے کار زوتریں وھدے ءَ اڈّ بہ بیت دمگ ءِ لس مردمانی راہ دیم پہ اے دگہ ھند ءُ دمگاں ( چوشکہ چھبار ) ءَ ۱۰۰ کیلومٹر ءِ کَچّ ءُ کَساس ءَ نَزّ آرگ ءُ راج ءُ مردمانی آسراتی ءِ سَوَب بیت . آئی ءَ گوشت ; پنوچ ءِ راھداری ءِ کارگس چہ اے ھاتر ءَ نزور ءُ دلگوش گور دیگ ءِ مھتاج انت ، اے کارگس ءَ را انچوش کم چہ کم ۲ بولدوزر ، ۴ گریدل ، ۵ ٹرک ءُ گیش چہ ۲۰ مردمی کارکنانی زلورت انت / رجانک : میرجلال