واجہ رھشون : بلوچ ءُ بلوچستان ءِ مستریں جیڑگ ماں ناتپاکی ءَ گنداں/زبان یا راج ءِ شرتریں توجیل ماں ھم
چہ میارجل ءِ ھالرسانی بُنجاہ ءِ ھالانی رِد ءَ : واجہ وتی پجار ءَ بہ کن ءُ بہ گْوش کہ شمئے نام ءُ پنّام کے اِنت ءُ کجا نشتگ ئے ءُ کدیتانی بلوچی زبان ءِ جھد بنگیج کتگ ءُ کجام تھر ءَ جھد ءَ ئے ؟
منی سجلی نام ابدل اَزیز اِنت ، بلے ڈنّ ءُ من ءَ مردم آبد توار کن اَنت منی پنام رھشون اِنت۔
من شستون ، بمپُشت ءِ آبریچ ءَ پرکن نامیں میتگے ءَ نشتگ آں۔
من سال ء 1385 ءَ بلوچی زبان ءِ پڑ ءَ دور کُرتگ منی بنگیج گوں یک پرشتگیں لچّھے ءَ بوتگ ۔
من گیشتر شائری ءُ رجانکاری ءِ تھر ءَ یک نودربرے ءِ ھساب ءَ جُھد کنگ ءَ آں۔
بلوچی زبان ءِ باندات ءَ چون گندگ ءَ ئے ؟
من وتی نزوریں دیدوکاں بلوچی زبان ءِ باندات ءَ باز روژنا ءُ پر امیت گندگاں پرچا کہ انیگیں وھد ءَ تو بچارئے مارا بلوچی زبان ءِ ھر پڑ ءَ سوھو ءُ زانتکاریں استاد ھست ءُ دومی گپ ایش اِنت کہ زالبول اوں گوں مردیناں گام پہ گام دیم ءَ جنزگ ءَ اَنت ، وھدے کہ راجی ءِ زالبول سرپد ءُ آگاہ بہ بنت گڑا آ راج ءُ زبان ءِ بیگواہ کنگ باز مشکل اِنت ، پمیشکا من بلوچی زبان ءِ باندات ءَ سکّیں روژنائیں بانداتے گندگ ءَ آں۔
تئی دلدوستیں نبشتہ کار کے اِنت ءُ پرچا چہ دگراں گیشتر دوست ئِے دارئے ءُ گچین کنگ ءِ سوب ئِے چے اِنت؟
من چوناھا بلوچی ھر کتابے منی دست ءَ بہ کپیت وانان ئِے ءُ من گیشتر شائری کتاب واناں ، بلوچی ءِ ھر شائرے ءُ نبشتہ کارے بہ بیت من آئی ءَ دلگوش کناں ،
من گیشتر اتاشاد ءُ مبارک کازی ءَ واناں پرچا کہ ھر کجام جتا جتائیں درشاندابے ءِ ھدابند اَنت ، یک پگرے من آیانی لچّھانی تھ ءَ گنداں کہ بلوچ ءِ درد ءُ گم ءُ واری ءُ بزّگی ءِ پگر اِنت۔
بلوچی زبان ءُ بلوچستان ءِ مستریں جیڑگ ماں چے ءَ اِنت ءُ اِیشی ءِ توجیل ءَ ھم گْوشت کن ئے؟
مستریں جیڑگ ءَ من وتی راج ءِ ناتپاکی ءَ گنداں توری زبان بیت یا سرڈگار ، ایشی ءِ شرتریں توجیل ھمپتّی ءُ ھم سَنّتی اِنت
شمئے گور ءَ کتابجاہ ھست اِنت اگاں ھست ، بلوچی کتاب در کپ اِیت ءُ اگاں نیست سوب ئِے چے اِنت کہ نہ بوتگ ؟
مئے جند ءِ میتگ ءُ آبریچ ءَ کتابجاہ نیست ، ایشی سوب مئے راجے پیسری پدمنتگی اِنت بلے ھنوں کہ راج سرپد بوتگ امیت اِنت کہ کتابجاہ اوں بہ بیت ،
بلے ماں شستون ءِ شھر ءَ دو یا سے کتابجاہ ھست ءُ ھاوند ءِ شگر اِنت کہ بلوچی کتاب دست کپ ایت۔
بلوچی زبان ءِ جُنز پہ وتی ھک ءِ پد ءَ در کپتگ کہ #پرچا بلوچی زبان ماں وانگجاھاں وانینگ نہ بیگ اِنت ؟ چے بہ کن اَنت دانکہ ماں وتی شور ءُ نیت ءَ سوبمند بہ بنت؟
شرتریں توجیل ایش اِنت کہ ھرچ ھما باسک کہ اے راہ ءِ توک ءَ ھم کلام ءُ ھم سوگند بوتگ اَنت باید اِنت وتی مسامانی پابند بہ بنت ءُ نیمراھی ھمراہ مہ بنت
گُڈی گپ ءُ دانک ؟
چہ ھاوند ءَ پہ شما سلامتی لوٹوکاں کہ شپ ءُ روچ اِت نیست ، واب ءُ آرام اِت نیست داں کہ وتی ماتی زبان دیم ءَ بہ برئے۔
اللہ شمارا ھست ءُ ابدمان بہ کنت ۔
منی راج ءِ کنگر ءُ نرمزار پہ شمارا ھم دراھی ءُ سلامتی لوٹ اِیں
بلوچی زبان ءِ جُنز ءِ گلگدار ءِ تھر ءِ زانشتی نودربر :کرکینک بلوچ ، بامسار بلوچ ، امیر بلوچ ، اِستال بلوچ ، آھوگ بلوچ ۔
کارمرز کنوکانی هیال