میارجل ءِ کسہ ءُ گُشتانک چہ ھالکاری ءِ اولی ھپتگ ءِ جاورھال ، رند چہ بلوچستان ءِ رسانکدری بامرد ءِ ز

چہ میارجل بنجاھی ھالرسانی ءِ ھالانی رد ءَ ; ھالکارانی ھپتگ  ، یک وڑے ءَ ھلاس بیگ انت کہ دگہ جواد سادکی انی ءَ مئے شمگ ءَ نہ انت ، آ ھدامرزی ، سالانی سال پہ وتی راجمان ءِ مردمانی ھاتر ءَ ندکاری کت ءُ زندمان ءِ دراجی ءَ لھتے تژن ءُ پیگورے نبشت کہ اگاں پہ لھتے ءَ تھل ءُ کچل تام انت بلے چہ دگہ نیمگے مئے چاگرد ءِ ھکّین ءُ المین گپ ات انت .
اے دیمی تامرھال ، مئے ھدامرزی ایں  امباسک ءُ  ھالکار ، جواد سادکی  ءِ رسانکدری ءِ بوھیریں رَیش ءِ بارو ءَ گونڈیں پٹّ ءُ پولے انت .
آ واجہ ءِ زند ، گوستگیں سال ءِ بھمن ماہ ءِ ۲۳ می روچ ءَ ماں انچوشیں جاورھالے ءَ دروھگ بوت کہ سالانی سال نادراھی ءُ ناچاکی ءِ میمیچ ءَ ، چہ یک ترندیں موٹلی ڈیکّگے ءِ ھاتر ءَ   نپاد ءُ گندلانی چتّر ءِ میار ات بلے زندمان ءِ داں آھری روچاں ، پہ وتی ڈیھ ءُ راجمان ءَ ندکاری کنگ ءَ ات . آئی ءِ مول چہ اے کار ءَ ، بس پہ بلوچستان ءِ مشکل ءُ جنجٹانی بارو ءَ ،  رھدرے ءِ شوھاز کنگ ات . چاگرد ءِ تہ ءَ جنجٹ ءُ نگیگیاں انگ ءَ ھست انت ءُ میارجل گوں وتی پورہ ایں وس ءُ ھاٹیگ ءَ ، جواد ءِ راہ ءَ رندگیری کنت ، پہ ھما روچانی اوست ءُ امیت ءَ کہ وتی بلوچستان ءِ جاورھالان ءَ آبات ءُ میزران تر بہ گندیں / رجانک : میرجلال