مکران زر ءَ پہ اولی رند ءِ ھساب ءَ کبسی ماھیگ رودینگ ءِ کار ءُ بار بندات بوت

کبسی ماھیگ رودینگ ، یکے چہ ارزان ءُ پر سیتّیں کار ءُ باراں ، آپ رودمیں چلوپگانی رد ءَ انت . چنتے وھد انت اے ڈولیں چلوپگانی سر ءَ چہ ماھیگر ءُ ھزگاریں مردمانی نیمگ ءَ دلگوش گور دیگ بوتگ . عطاءاللہ رئیسی ھلاکہ ءِ شیلات ءِ مزن کارگس ءِ سروک ; کبسّی ماھیگ رودینگ یکے چہ ارزان ءُ پر سیتّیں کار ءُ ڈنڈاھاں گولم ءُ آپی چلوپگانی تہ ءَ ماں سیستان ءُ بلوچستان ءَ انت کہ نوں چہ ماھیگر ءُ ھزگاریں مردمانی نیمگ ءَ دلگوش گور دیگ بوتگ . شیلات ءِ مزن کارگس ءِ سروک ءَ گوشت چہ کہ پہ اولی رند ءَ ۵۷ کبس اے کار ءِ سر ءَ کارمرد بوتگ ، دیمتر ءَ اے شمار ، ماں رودیک ءِ باڈر ءَ داں ۱۰۷ کبس ءَ گیش کنگ بنت ءُ چلوپگ ءِ ھساب ءَ سرجم داں ۶۰۰ کبس ءَ سر بوت کنت . واجہ رئیسی وتی گپانی رندگیری ءَ گوشت ک ماھیگ رودینگ ءِ ھاتر ءَ وشّیں موسم ءُ سوریں آپ ، یکے چہ اردشتاں ماں اے ھند ءَ انت کہ توانت ماھیگانی بود ءُ برش ءُ ماھیگرانی سیت ءِ سوب بہ بیت . اے واجہ ءَ گوشت کہ تھم شانی ءِ وھد ءَ ، گونڈوئیں ماھیگکانی کَش داں ۳۰ "گرم" ءِ کچّ ءَ بیت کہ اے ھند ءِ موسم ءِ وشّی ءَ ، ۶ ماہ ءِ گوزگ ءَ رند چہ کَشّ ءِ ھساب ءَ داں یک کیلو بود کنت . رجانک : میرجلال . ھالکـار : عبدالقادر شیخ زادہ