کلانی کلگ ءَ دو موٹلانی ڈیک ورگ ءِ ھاتر ءَ ۳ مردم بیران ءُ ۴ کس ٹپّی ءُ زدگ بوت انت

ناصر نصیب برازپور ، کلانی ھلکانی مچّی ءِ شورجاہ ءِ کماش چہ دو ڈیزل بریں ٹویوٹا موٹلانی ڈیک ورَگ ءَ ھال دات ، اے موٹلانی ڈیک ورگی ھال ءِ رد ءَ ٹویوٹا موٹل ءِ ۳ مردم ءِ جاہ پہ جاہ ءَ بیران بوتگ انت ‍ ءُ ٹویوٹا ءِ نندوکیں مردماں ، دو جانشو ءُ موٹل ءِ ڈلیور انت ، جانشو وتی بار ءَ کنتاکی ءِ ھمبار ءِ جاہ ءَ ایر گپتگ ءُ چہ کلانی کلگ ءِ راہ ءَ واتر کنگ بوتگ ات کہ پیراندادی ھلک ءِ ھبیلی ءَ گوں آ دگہ موٹل ءَ ڈیک وارتگ . آ دگہ موٹل ءِ نندوکیں مردماں ۴ کس بوتگ انت ءُ درھیناں ٹپّی ءُ زدَگ بوتگ ءُ چھبار ءِ امام علی نادراہ جاہ ءَ دیم دگ بوتگ انت .

چہ بیران بوتگیں مردماں یکّے کلمتی لَکَمہ ءِ ریمدان شھر ءِ جھمنندیں مردمے ءُ دو دگہ کس ، رودیگ کلگ ءِ کریم بکش ءِ ھلک ءِ نندوک بوتگ انت . 

کلانی ھلکانی مچّی ءِ شورجاہ ءِ کماش ءَ گوشت کہ دشتیاری دمگ ءِ پانک گس ءِ کماش ءُ راھانی پلیس ءِ کارندہ اں اے تپاک ءِ جاہ ءَ آتکگ ءُ تپاک ءِ بارو ءَ لھتیں ٹپّاسی کتگ انت .

واجہ ناصر نصیب برازپور ءَ وتی درشان ءِ رد ءَ چہ ڈیزل بریں ڈلیور اں لوٹ ات کہ راھانی ناسرجمی ءُ ھرابی ءُ موٹلانی بازی ءِ ھاتر ءَ ھر پیم کہ بیت وتی تیز روگ ءِ سار ءُ گِھمار ءَ بہ کن انت . 

ھالکـار : امیر کلمتی

رجانک : میر جــلال