گہ ءِ دمگ ءُ بنت ءِ ھند ءَ ، چاھوک کلّگ ءِ برگانی ھاٹیگ ءِ نزوری ، اے ھلک ءِ مردمان ءَ تکانسر کتگ

چہ میارجل ءِ بنجاھی ھالرسانی ءِ ھالانی رد ءَ ; چاھوک ءِ کلگ ، ماں گہ ءُ بنت ءِ ھند ءُ دمگ ءَ کساس ۳۰۰ مردم ءِ منندی جاہ انت کہ ۹۵ لوگمان ءِ رد ءَ اد ءَ زند گوازینگ انت . برگ ءُ لین ءِ پد مہ پدیں سند ءُ سیل ءُ ھاٹیگ ءِ کم ءُ گیشی ءِ ھاتر ءَ آھانی لوگمان ءِ آسراتی اں چوشکہ سارتینک ءُ سارت آپاں سچ انت ءُ ناکار بنت .

واجہ محمد کریم بلوچ نژاد ، اے کلگ ءِ دھیار ءَ تران کت کہ چہ برگانی ھاٹیگ ءِ نزوری ءَ لوگانی وت گند ، سارتینک ، گُد دوچی چرک ءُ مشین ، کار بندگ نہ بنت ءُ تاں تنا ، لوگانی پنکہ ءُ تُروک ھم وتی نزوریں ساہ ءَ گوں چکرّ انت ءُ کاربندگی نہ انت ، چہ برگانی ھمے نزوری ءِ ھاتر ءَ مھلوک شپ ءِ درگتاں لوگانی ڈن ءَ وپس انت ءُ چہ مار ءُ زیم ءُ دگہ لولوکانی بیم ءَ ، داں سباہ ءَ واب نہ کپ انت ، اے سالانی سال انت کہ برگانی جاورھال ھمے ڈول ءَ انت ءُ ما وتی بزّگی ءِ ارزی ءَ گِہ ءِ برگانی کارمستر ءَ سر کتگ انت ، آ ھم توجیل کنگ ءِ لبزے داتگ بلے داں انّی ءَ اے دو سال انت کہ مئے چمّ اگدہ دارانی پسّو ءِ راہ ءَ درنگ انت ءُ کسّے ءِ گوشاں اوں مورے نہ چرونڈ ایت ، چہ آ وھد ءَ داں انی گپ ھمش انت کہ ما نوکیں ترانسے شمئے ملک ءِ ھاتر ءَ پیمانکار ءَ داتگ بلے اشانی کُنٹیں پاد دنینگت ءَ چاھوکان ءَ نہ رسگ انت ءُ مئے لوگانی آسراتی ءِ سامان مدام ءَ سوچگ ءُ بیگواہ بیگ انت . نوں اے گرانی ءَ گوں ، پہ نوکیں سامان ءِ زیرگ ءِ ھاتر ءَ مردمانی وسے ھم پشت نہ کپتگ .

اے کلگ ءِ دگہ نندوکیں زالبولے ءَ گوشت کہ مئے لوگ ءَ ، پہ روژنائی ءِ ھاتر ءَ بس یک گلوپے ءُ پہ گوات ءِ گیجگ ءَ یک تُرّوکیں پنکہ اے ھست بلے چہ برگانی نزوری ءَ نئے گلوپ ءَ رژنے دنت ءُ نئے پنکہ ءَ گواتے گیج ایت . اے بانک چہ ما را جُست کت ; باریں ملک ءِ اگدہ داراں مئے پیم ءَ سگ ات کُت کن انت ؟ من آھان ءَ سوگہ دے اں کہ وت ءَ را یک ادارے ءِ کچّ ءَ مئے جاہ ءَ بِلّ انت دانکہ بہ زان انت مئے سر ءَ چے گوزگ انت / رجانک : میرجلال .