چھبار ءِ مساپری جاورھال نگیگ انت ، شھرداری کارگس ءَ وتی زمّہ ءُ ڈوبہ اں پرچا کوپگ چیر نہ دنت ؟

چھبار ءِ بندن ماں ملک ءِ زرباری دمگاں ، یک تر ءُ تابی ءُ "اقتصادی" شھرے لیگ ءُ زانگ بیت ءُ چہ ملک ءِ بازیں تک ءُ پھناتاں ، سال ءِ درھیں وھد ءُ موسم ءَ بازیں مساپرے اد ءَ کاینت . سرجمیں ملک ءِ لھتے ستا ءُ نامدات چوشکہ ; ایران ءِ ایوکیں ساوڑی بندن ءُ زری جھگیر ، مکران ءِ تیاب دپانی بود ءُ دیمروی ءِ پیٹوک ، چھبار ءَ وتیگ کرتگ انت ءُ سال دراجی ءَ چہ ملک ءِ کونڈ کونڈ ءَ بازیں مساپرے چھبار ءَ پہ ترّ ءُ تاب ءُ کشت ءُ گول ءِ ھاتر ءَ گچین کن انت . چھبار وتی ستا ءُ تاریپ ءِ کَچّ ءُ کساس ءَ چہ بنکّی ءُ بن ھشتی پڑانی ھساب ءَ ردوم نہ گپتگ ءُ ٹوہ نہ بوتگ ءُ چہ آسراتی ءِ کمّیں بھرے چوشکہ وتی شان ءِ یک مساپری باڈرے ءَ ھم زبھر انت . چھبار ءِ مساپری باڈر یک کریھی جاگھے ءُ مردمانی رو ءُ آئے ءِ کمیّں آسراتی ءَ چہ زبھر انت ، نوں چہ ھند ءُ دمگ ءَ اگدہ داراں ، جُستے دل ءَ کئیت کہ اینچوک سالانی گُوَزگ ءَ گوں اے ساوڑی بندن ءِ اگدہ دار اں پرچا دنیگت ءَ یک الکاپیں مساپری باڈری ءِ اڈ کنگ ءِ بارو ءَ ھم کہ اے شھر ءَ نام ءُ توار ءِ درور بیت توجیلے نہ کتگ ؟ شھر ءِ مساپری باڈر ءِ جاورھال نگیگ انت اد ءَ بازیں مساپرانی ھاتر ءَ الکاپیں دیمشود ءُ گرماگانی موسم ءَ بازیں مساپزانی کَچّ ءَ سارتینک ءُ سارت کنوکیں آسراتی اں ھم نیست انت . مردم چہ اے نگیگی اں تکانسر انت . مستاگی گپ اش انت کہ چھبار ءِ شھردار ءَ میارجل ءِ پیلوانی پسو ءَ ، لبز داتگ کہ یک ھپتگ ءِ تہ ءَ اے باڈر ءِ دیمشود ءُ گرماگی آسراتی اں چوشکہ سارتینک ءُ سردکنوکیں اوزار ساماناں شرّ کنگ بنت . ( انشاللہ ) رجانک : میرجلال .