بلوچ ءُ بلوچستان ءَ گھتر ءُ گیش تر بہ زان این

چہ میارجل ءِ بنجاھی ھالرسانی ءِ ھالانی رد ءَ ;  بلوچستان چہ ۲ بھر ءِ گالاں ، یکّے " بلوچ " ، کہ اے کوم ءُ راج ءِ نام انت ءُ دگہ " ستان " کہ ھنکین ءِ بزانت ءَ دنت اڈّ ءُ پیم بوتگ ، ھمے ھاتر ءَ ھما درھیں مُلک ءُ دَمَگاں کہ چہ دیریں گوستاکے ءَ اود ءِ ھنکین کتگیں مردم بلوچ بوتگ انت ءُ داں انیگیں وھد ءَ ھم ھما جاہ ءَ زند گوازینگ ءَ انت ، اے جاہ ءِ نام  بلوچستان ءُ بلوچ نشتگیں مردمانی ھنکیں گوشگ بیت . اِشی ءَ ھور ، کہ بلوچ راج ءِ گوستاک چہ بنگش ءَ دگہ زورانسریں راجانی جیڈ ءُ مڑ ، ھول ءُ ھولانچ ، پروشت ءُ پروش ءُ زوراکیانی دُچار کپگ ءِ ھاتر ءَ ، بلوچ راج ءِ نام ءُ پنام  ءُ سیاسی سیمسراں ، پہ زاھری  ھساب ءَ برے برے ٹَگَل اتگ ءُ دگہ وڑ وڑیں نامدات چُشکہ مکّا ، مکیا ، ماکا ، مکُّران ، گدروشیا ءَ وتی سر ءَ سگّ اتگ ءُ اے سر ڈگار ءِ سیمسراں پہ سیاست ءِ مول ءُ مرادانی سر ءَ بَدَل بوتگ . ( البت اے ھم گوشگی انت کہ ھمے سیمسرانی بدل کنگ ءُ ٹَگَل دیگ ءَ شِلگِرہ اں ، چہ درھیں جنجٹ ءُ گپچلاں ، بلوچان ءَ  گیشتر دلسیاھی داتگ ءُ  بَزَّگی ءَ کارچ ءَ داں راج ءِ ھڈّاں رسینتگ . چمشکا بلوچانی گیشتریں ٹکّ ءُ بھراں ماں ۳ ٹُکُّریں بلوچستان ءَ ، ( ایران ، پاکستان ءُ اوگانستان ) گیش چہ وتی دود ءُ روبیدگی ، چاگردی ، بیاپار ، سیادی ءُ وارسی ، سور ءُ سانگ ءِ کار ءُ باراں کہ وت ماں وت ءَ دار انت بژنی گپّے کہ اے ۳ ٹکُّریں بلوچستان ءِ مردماں پہ وتی لھتے دگہ زلورتانی پورہ کنگ ءَ چُشکہ سِجِل ءُ راجی کارٹ ، سانگ ءُ سیر نامگ ، زھگانی وانگ ءُ دَربَرَگ ءِ پڑاں ، باز تکانسر ءُ مزنیں گپچلانی آماچ انت پمیشکا اے گپچل کپتگیں مردمانی دستاں مدامی دیم پہ آزمان ءَ چِست انت ءُ زورانسریں اُگدہ داران ءَ بد دوائی کن انت . آھانی ھمے اوست انت کہ دریگتے بلوچستان ءِ سیمسراں وتی ھما  پیش چہ ٹکّر ٹکّر بیگ ءِ دور ءُ باریگانی وھد ءَ پچ بہ ترّ انت . پرچا کہ اے سیاسی سیمسراں پہ بلوچ راج ءَ چہ وھدیگیں برلن ءِ دیوال ءُ جرمنی ءِ ۲ ٹکّری ءِ زمانگ ءِ زُلم ءُ زوراکی ءَ ھم گیش انت .
گپّ اے رد ءَ انت کہ اگاں یک لوگے ءِ پیژگاہ ءَ ، ۳ چینہ ( دیوال ) کَشّگ بہ بیت کہ اولی چینہ ءَ پُشت ءَ برات ، دومی ءِ پشت ءَ گُھار ءُ سیُّمی ءِ پشت ءَ آھانی پت ءُ مات چہ یکادگر ءَ گستا دارگ بہ بنت ءُ آھان ءَ پہ وتی گندگ ءُ گُزار ءَ ابید چہ دیوال پان ءِ موکل ءَ دگہ راھے مہ بیت ، گُڑا چوشیں لوگمان ءِ مردمانی سر ءَ چے گوز ایت ؟ مرچیگیں بلوچ راج ، ھاسکار سیمسری ھدّات ءِ نندوکیں مردمانی جاورھال ھمے وڑ ءَ انت . ما را امیت انت کہ مُلک ءِ زمہ وار اں ، چہ میان اُستمانی راجانی پلا مرزی ءَ بہ توان انت کہ آ گستا کتگیں ٹُکران ءَ  وتی اسلیگیں جاہ ءِ سر ءَ کہ سال 1871 ءِ سیمسراں ، چہ سِند ءِ کَش ءُ گوَری ءَ بگر داں ھند ءُ ھرات ءُ کندھار ءِ ھندان انت ، سر بہ کن انت . 
ھما پیم کہ سرپد ات بلوچستان ءِ ٹُکُّر ٹُکُّر کنگ ءِ منانک ءُ سَوَب ، ایرانی کاجار ءِ سرکار ءِ نزوری ءُ انگریز ءِ سامراجی پنڈلانی ھاتر ءَ پہ وتی  سیت ءِ سر ءَ بوتگ کہ چہ " فرڈریک جان اسمٹ ءِ ٹَگّی ءُ ٹوری ءَ بلوچستان ءِ ٹوھیں بھرے ءَ ھندوستان ( انیگیں پاکستان ) ءَ داتگ ءُ دگہ کمتریں بھرے ءَ ھم اوگانستان ءِ سر ءَ جتگ ءُ لِچّینتگت . چہ آ زمانگ ءَ داں روچ مروچیگ ءَ بلوچ راج اے سیمسری تچ ءُ تاچ ءِ آماچ انت داں جاھے کہ پہ وتی سیاد ءُ وارسانی گِندگ ءُ چارگ ءَ ، اے سئیں سیمسرانی پشت ءَ بازیں روچانے ءَ تکانسر بوتگ ءُ ھست انت .
ھر پیم ، پہ وتی گیر بلوچیں ھم مُلکی انی سرپدی ءَ گُوَشگ لوٹاں کہ لھتے چہ کرمان ، ھُرمزگان ، زرباری ھُراسان ءِ سرڈگاری چونڈ ءُ بھراں ( دمگاں ) چہ گیدی ءِ بُنگش ءَ بلوچ بوتگ انت کہ داں انّی ءَ ھم اے ملکانی تہ ءَ نشتگ ءُ ھنکین انت . اے ۳ ھلاکہ ءِ چوشیں دمگاں پیسر ءَ بلوچستان ءِ پراھی ءُ شاھگانی ءِ تہ ءَ بوتگ انت بلے رند ءَ چہ  بلوچستان ءِ جھگیری شھر ءِ دور بَیَگ ءُ اے دمگانی دیمروی ءُ بودناکی  ءِ نیمون ءَ ، وتی ھمساھگیں ھلاکہ انی سر ءَ ھور ءُ لِچّینگ بوت انت .
 چہ اِشی ءَ ابید ، بازیں بلوچ ٹَکّانے اوں پارس ، گلستان ءُ تھران ءِ ھلاکہ انی نندوک انت .  دگہ لھتے بلوچ ھم مزن ھور  ( خلیج فارس ) ءِ توکی زروان ءُ کش ءُ گوری ملکان ءُ ترکمنستان ، ھندوستان ، ٹنزانیا ءُ روچ ایرشتی ملکاں ، ( یوروپ ءُ امریکہ ) ءِ تہ ءَ نشتگ انت .

نیں جُست اِش انت کہ بلوچ کئے انت ؟ پہ اے جست پسو ءَ ، دگنیا ءِ درھیں راجانی تہ ءَ ، ھما مردماں کہ آھانی پُچّ ءُ پوشاک ، بلوچی ءِ گُد ءُ آھانی زبان ءُ لبزانک ، بلوچی انت ، اشاں درستان ءَ بلوچ گُوَشگ بیت . تری چہ بلوچ ءِ کوم مہ بنت ، ھمے ھساب ءِ سر ءَ انت کہ اگاں مئے یک " تبریزی " یا " مھریزی " ھم ملکی ئے کہ اولی رند ءَ بلوچستان ءَ آتکگ ءُ آئی ءَ بلوچی گد ءُ پوشاک گُوَر ءَ انت ، دگہ گِندوگیں مردماں ، آئی ءَ رند چہ گِندَگ ءَ بلوچ سرپد بنت تری بلوچے مہ بیت ، پمیشکا آئی ءِ شَرّین ءُ سِلّیں کرد ءَ ، بلوچ راج ءِ سر ءَ لیک انت ءُ زان انت .

ما چہ وتی مَنّ ءَ ، ھما درھیں مردمان ءَ کہ گوں گیرت ، دلیری ، مھمان جَلّی ، وش لبزی ، وپاداری ءُ میارجلی ءِ کارسناں ساڑاھگ بونگ انت آھان ءَ بلوچ گُوش ایں تری آھان ءَ بلوچی گُد ءُ پوشاک گوَر ءَ مہ بیت . 

ابید چہ راجدپتر نبیسوک ءُ پولکاریں مردمانی گُوَشگ ءَ ، منی جِند ، اگاں یک گالردے ءِ سر ءَ بے کَست ءُ پلوگری ءَ بلوچ راج ءِ پَجّار ءَ بہ کن اں ، اے وڑ ءَ نبیس اں ; بلوچ بزان ، مھرواں ، مھمان جلّ ، شَرّ پَجّار ، ستک دل ، درگُوَزکنوک ، بھادر ءُ دلیر . پمیشکا مَنّ اں کہ پیسری بلوچاں چوشیں ستاھانی ھساب ءَ گیدی ءِ تہ ءَ سروک بوتگ انت . من ءَ امیت انت کہ ھَنّیگیں دور ءِ نوک ءُ رُژنا سساھیں بلوچاں ھم وت ءَ را اے زیب ءُ ستاھانی سر ءَ بہ جَلّ انت .

نوں جُست اِش انت کہ شمئے چَمّ ءُ دید ءِ دیم ءَ ، مردمانی کجام گَلّ ءُ ٹَکّ کہ بلوچ سرڈگارانی ( چہ جاشک ءَ بِگِر داں گمبرون ، کلاگنج ، روبار زمین ءُ پھرج ، دُزّاپ ، گیابان ءُ چھبار ) ءِ نندوک انت آھان ءَ بلوچ لیکگ بیت ؟ 

چہ منی دیدانک ءَ ھما درھیں گل ءُ ٹَکّ ءِ مردماں کہ گوستگیں راجدپتری ءِ رد ءَ ، چہ اپریکہ ، یوروپ ، عرب ءِ ملکاں کہ اے سرڈگار ءِ سر ءَ آتکگ ءُ اولی بلوچانی شَم ءَ نشتگ ءُ آھانی ھیل ءُ تَب اش زُرتگ ءُ بلوچانی زبان ءُ دود ءُ روبیدگان ءِ منّوگِر بوتگ ءُ انّی ءَ پَھر ءِ سر ءَ وت ءَ را بلوچ لیک انت ، اے درستاں بلوچ گُوَشگ بنت . 

دانک ; یک ءُ دو ڈَڈیں دیدانک پہ بلوچانی اولی ھونڈال ءُ ھنکین ءِ بارو ءَ ھست انت .

۱_ گوش انت مردمانی اولی تک ءُ پرکی ءُ لڈ ءُ بوج ءِ وھد اں ، بلوچ راج وت یکّے چہ ھما ٹکّان بوتگ کہ انیگیں بلوچستان ءِ نندوک انت ءُ زندمان ءِ گُوَزگ ءَ ھور ، بلوچ ءِ نام ءَ وتی سر ءَ اِشتَگ انت ءُ وتی مھر گر ءِ ۱۱ ھزار سالگیں گوستاک ءُ سوتکگیں ڈنّ ءِ راجدپتر ءَ ، بلوچانی نامنوگریں مردمانی دیم ءَ پیش دار انت . 

پہ بلوچانی بلوچی نامدات ءِ بارو ءَ ھم انچوش کہ اے دگہ راجانی نامداتی ءِ تھر پہ تھریں زیب ءُ ستاھاں ، بلوچانی جنگ ءُ میڑ ءِ یک ستاھے ( قوچ ) ، گُورنڈے ءِ وڑ ءَ انت کہ دور ءُ باریگ ءِ گوزگ ءَ پد ، قوچ ءِ نام پہ بلوص ، بلوش ، گُدروچ ، گدروس ءِ ناماں بدل بوتگ . 

لھتے ءَ وتی منّانکانی سر ءَ اے وڑ ءَ مار انت کہ دراویدی ءِ ٹکّ زگریں بلوچ انت ءُ دگہ لھتے ھم گوش انت کہ آریائیاں زگریں بلوچ انت ءُ آھانی اولی ھنکین ایران ءِ گوریچی دمگان ءِ البرز ءِ کُھسراں بوتگ ءُ رند ءَ چہ بازیں جنگ ءُ مڑانی کارپداں دیم پہ کرمان ءُ بارز ءِ کُھسران ءُ انیگیں بلوچستان ءُ داں ھند ءُ سند ءِ کور ءِ سیمسراں لڈّ ءُ بوج کتگ ءُ اے جاھاں ھنکیں گِپتگ انت . 

دگہ لھتے ناسرجمیں باوست ھم چہ کُرد ءُ تازی ءِ کوماں ھست ، ھمے باوستانی رد ءَ مردوخ نامیں راجدپتر نبیسے ءَ جھد کتگ دانکہ بلوچ راج ءَ وتی کوم ءِ یک بھرے پیش بہ دار ایت بلے اشانی منانک پورہ نہ انت ءُ ناسرجمیں گپّے ءِ کَچّ ءَ پَشت کَپتَگ . ھر پیم ، درھیں راجانی راجدپتر نبیساں چُشکہ " برایان اسپونر " فلیپ کارل ءُ بلوچانی وتی سیدزھورشاہ ھم ، اے بُنگپ ءِ سر ءَ تُپاک انت کہ بلوچ راج ، بلوچستان ءِ اولیگیں ھنکین کتگیں مردم بوتگ انت تری آھانی بُنگش چہ دراویدی ، آریائی ، تازی ، ایرانی بلوچ یا ھر دگہ ٹَکّے ءَ بہ بیت . گَپّ اِش انت کہ اے سرڈگار ءِ اولی نندوکیں مردماں کہ مرچاں گوں ھوریں دود ءُ روبیدگاں بلوچ نام ءِ سر ءَ زانگ بنت ، انگت ءَ پھر ءُ شان ءِ سر ءَ بلوچ لیک انت . 

دگنیا ءِ تہ ءَ بلوچ مردمانی َکَچّ ءُ کِساس ءِ بارو ءَ پورہ ایں شمار ءُ مَنّانکے پیش دارگ نہ بوتگ ءُ چہ ھمے گپّ ءِ ھاتر ءَ انت کہ داں انّیگ ءَ ، زندگیں بلوچان ءَ وتی ھساب کَنَگ ءِ موہ ، ماں ایران ، پاکستان ءُ اوگانستان ءِ ھلاکہ اں دَیَگ نہ بوتگ بلے بلوچ راج ءِ جھدکار ءُ زانتکار اں ، آھانی کَچّ ءَ چہ 60 ءَ بِگِر داں 100 ملیان ءِ مردماں تود ءُ گمان بَرَ انت ، آھانی منّانک اے رد ءَ انت کہ ابید چہ سَئیں ھلاکہ انی نندوکیں مردماں ، لھتے دگہ ملکانی تہ ءَ ( چُشکہ پاکستان ءِ سِند ءُ پنجاب ) ءَ ھم بلوج نندوکیں مردم باز انت .

پہ اے راج ءِ نندوکیں سیمسرانی بارو ءَ ، زانتکار ءُ پولکارانی دیدانکانی نیام ءَ دگری ھست بلے چہ راجدپتر ءِ وڑ وڑیں باریگانی ملپداں ، اے مُدّھا پَدَّر بیت کہ کرمان ، زرباری ھُراسان ، گمبرون ءِ پُشتی آبنداں ، داں نمروز ءُ ھلمند ءُ ھند ءِ سیمسراں بگر داں لِنگہ ءِ بندن ءُ ھند ءِ تیاب دپان ءُ کلانچ ( مرچیگیں کراچی ) ءِ سر ھدّاں ، اے درھیں ملکاں بلوچانی تچ ءُ تاچ ءِ پَٹّ ءُ میدان بوتگ انت ءُ رندتر ءَ آھانی نام ءُ سیاسی سیمسراں بَدَل کنگ بوتگ انت .

چہ دینی ءُ نیکراھی ءِ ھساب ءَ بلوچ راج ءِ گیشتریں مردماں ، سُنّی ( ھَنَپی مھذب ) ءُ کَمّے اوں شیھہ ءُ زگری ءِ مھذب انت . پہ راجدپتر ءِ گُوَھداری ءَ بلوچ راج ھچ بر ءَ کومی ءُ نیکراھی جنگ ءُ میڑانی پڑ ءَ ماں نہ کپتگ بلے ایوک ءَ ھر وھد کہ چہ دگہ راجانی نیمگ ءَ آھانی سر ءَ اُرُشے آرگ بوتگ گُڑا چہ وت ءَ دیمپانی اش کتگ .

چہ دگہ نیمگے اے باوست ءِ ھلاپ ءَ ھم بلوچانی دگہ مُدّھا بوتگ ءُ آ اِش انت کہ ھر وھد دگہ نیکراھی ءِ منّوگرانی زندمان ءَ ھَکَّلے سر ءَ آتکگ‌ ءُ آھاں وت ءَ را بلوچانی میار کتگ ، بلوچ راج چہ وتی میارجلّی ءِ ھاتر ءَ آھان ءَ ایمنی ءِ گوم ءَ وتی دَمگانی تہ ءَ جَلّ اتگ ءُ جاگہ داتگ انت . اے مُدّھا ءِ منانک داں روچ مروچی ءَ ھم بلوچانی چاگرد ءِ تہ ءَ ھست انت .

چُنتے وھد انت کہ کومی ءُ نیکراھی جنگ ءُ مڑانی ھاتر ءَ ، میان روچ دراتکی ملکانی تہ ءَ لھتے گیش لوٹوکیں گلّ ءُ گروپاں دگہ مھزب ءُ کومانی دیم پہ دیم ءَ چِست بوتگ انت بلے وشّ مَنّی ءِ گَپّے کہ چوشیں تیز تچوکیں گل ءُ گروپانی دیم پہ دیمی ءَ ، بلوچ راج ءِ میان تبین ءُ رُژنا سساھیں مردماں ھم گیش ءُ باز بوتگ ءُ اِشانی آس روکی ءِ ھلاپ ءَ اوشتاتگ انت . گپّ ءِ سرجمی اش انت کہ بلوچ چاگرد ءِ مردمانی گیشتریں بھرے ، چوشیں نیکراھیانی آس روک کنوکیں گَلّانی ھلاپ ءَ بوتگ ءُ ھست انت . اے میان تبیں مردماں گوں وتی میان تبی مارشتانی مَنّ ءَ وتی اُگبالانی دیمپانی ءَ وتی ھکّ زان انت .

چہ اے گپّ ءَ ھم بے تران مہ بَہ ایں کہ گُوَستگیں سد سالانی تہ ءَ ھاسکار ماں انیگیں کرن ءُ سدی ءِ میانی سالاں ، بازے دگہ بے شماریں یزدی ، بیرجندی ءُ ترکیں ھم ملکی مردم ، دیم پہ بلوچ ڈیہ ءُ ڈگاراں لڈّ ءُ بوج کتگ ءُ اد ءَ نشتگ انت داں جاھے کہ دزّاپ ءِ شھر ، ھلاکہ انی تہ ءَ چہ کومی ءُ نیکراھی ءِ ھساب ءَ تپاکی ءِ شھر ، نام دیگ بوتگ . چہ دگہ نیمگے ھما ڈول کہ پیسر ءَ گوشگ بوت چوشیں سُدُّرتگیں جاورھالانی بوّ ، بلوچ ءُ گیر بلوچیں تیز تچیں گلانی پونز ءَ وش نہ آتکگ ، پمیشکا اشاں مدام ءَ جھد کتگ ءُ انگت ءَ ھم کنگ ءَ انت کہ گوں وتی گیش لوٹی ءِ باوستاں ، ناتپاکی ءِ تندور ءِ آس ءَ روک بہ دار انت بلے چہ ھاوند ءِ مھرانی برورد ءَ دنیگت ءَ چوشیں گلّاں چہ وتی ناشریں کاراں سوبے نہ بُرتگ . پمیشکا چہ سُنّی ءُ شیھہ ءِ دوزواھان ءُ بلوچ ءُ گیر بلوچیں زانتکارانی جزم ءُ ھمّت ءَ ، تیز تچیں گلّانی ٹگّی ءُ ٹوری بے سوب منتگ انت ، چوناھا ، چہ چوشیں کومی ءُ نیکراھی ءِ دِگِری اں کہ ماں بلوچستان ءَ رواج انت ، مئے دیدانک ءِ ھساب ءَ ، کانود ءُ رھبندانی منوگری ، دود ءُ روبیدگی ءُ نیکراھی ، سیاسی ءُ کومی پڑانی تہ ءَ ، ادل ءُ بروبری ءِ سر ءَ کار کنگ ، اے ڈولیں پندلانی گُمسار کنگ ءِ ایوکیں رھدر انت .

پہ بلوچ راج ءِ نیکراھی ءُ منوگری ءِ باوستاں ، پیش چہ اسلام ءِ آیگ ، پورہ ایں منانکے نیست بلے گیشتریں تود ءُ گمان اش انت کہ آ دور ‍ءُ باریگ ءِ بلوچاں ، زردشتی ءُ آس مَنّی ءِ منّوگر بوتگ انت .

 لبزانک ءُ گالوار ءِ پڑ ءَ ھم بلوچانی زبان ءِ گیشتریں سیادے ءُ مانھوری ، پھلوی ءُ اشکانی ، ساسانی ءُ کُردی راجانی گوم ءَ انت . گوستاک ءِ گیشتریں پٹّ ءُ پولانی رد ءَ گُوَشگ بوتگ کہ چہ مردمانی کُوَھن تریں راجدپتر ءِ نبشتانکان ءُ ھردوت ءِ گُشتانک ءِ سر ءَ ، مکّا ءُ گدروشیا ءِ ناماں ، ماں اسکندر ءِ میڑ ءِ پروش ءِ زمانگ ءَ گپ جنگ بوتگ . ماں بیستون ءِ سنگ نبشتہ اں ، چہ بلوچ ءُ بلوچستان ءِ بامردان ءُ ماکا ءِ نام ءَ شَرَّی ءِ سر ءَ یات کنگ بوتگ .

ایران ءِ جنگ نامگ نبیس ءُ مَزَنیں شائر ، ھکیم ابوالکاسم پردوسی ماں وتی نبشتگیں شھنامہ ءِ تہ ءَ ، بلوچانی گھورتی ءُ مَکُّران ءَ ، پد مہ پد گوں پھر ءَ ساڑاھتگ ءُ یات کتگ . 

 پردوسی یک جاھے ءَ گوش ایت : 

یک رُمبے چہ کوچ ءُ بلوچاں ، پہ جنگ ءُ مڑ ءَ جنگولیں گُورنڈ ءِ ور ءَ تیار انت . دگنیا ءِ تہ ءَ اشاں ، وتی پشت ءَ ھچ کس ءَ پیش نہ داشتگ ، اشانی لوچیں لنکُکے ءَ کس نہ دیتگ .

سپاھی ز گردان ءِ کوچ و بلوچ

سگالیدہ جنگ مانند قوچ  

کہ کس در جھان پشت ایشان ندید

برھنہ یک انگشت ایشان ندید .

گپّ ءَ گُوَنڈ گِراں ; مَزَنیں ھاوند ءِ ڈگار ءِ اے ٹُکُّر ، وتی سر ءَ باااز نامداریں مردم ( چُشکہ ; رستم ، زال ، سیہ سوار ، آکوب لیس ، میر چاکر ، گوھرام ، بانری ، گل بی بی ، گوھر ، ھَمّل ، جیھند ، بالانچ ، کمبر ، میر گوس بکش بزنجو بانک رابیہ ، دادشاہ ءِ وڑیں جنگولیں بامرد ءُ نیگراھی ءِ ٹوھیں سروکاں چشکہ مولانا عبدالعزیز ، مولانا روانبد کہ بلوچستان ءِ شیک سادی ءِ وڑ ءَ پُر نام ءُ توار انت ) بوتگ . چہ اے گھمردانی نیام ءَ پہ درور ءَ توان ایں میر ھمّل ءِ نام ءَ بہ گوش ایں کہ چہ وتی جھدانی برکت ءَ سامراجگریں پُرتگیزی ان ءَ پہ بِہ چہ مکران ءِ تیاب دپاں گَلّینت ءُ در کت . یاکہ ھُگم کنوکیں بانک گل بی بی ءِ نام ءَ بہ گوش ایں کہ گوں وتی مرد وڑیں پاد مٹّی ءَ توانتگ کہ سامراجگریں انگریز ءِ اُرُش ءِ دیم ءَ ماں ایران ءِ جھگیری ھند ءُ دمگاں بہ گیپت ، چہ ھمے ھاتر ءَ انت کہ انگریزانی ڈابر نامیں جنرلے ، چہ بانک گل بی بی ءِ دلیری ءُ گھورتی ءَ ، آئی ءَ گوم ءَ گپّ ءُ نیادے ءِ لوٹوک بوت . ( ھمے جنرل ءِ کتابے ) 

  انی ءَ پہ گیر بلوچیں راجانی ڈاہ ءُ سرپدی ءِ ھاتر ءَ ، اے کوم ءِ دود ءُ روبیدگ ءِ زیبناکی ءُ اشانی سرڈگار ءِ سیل ءُ ندارگی جاھانی سر ءَ نیم چمّے ءَ شانک دئیں .

زیمر ; بلوچ ھما راج انت کہ تو گوش ئے چہ وتی بنگش ءَ ساز ءُ زیمر ءِ گوم ءَ وَدیگ بوتگ ءُ داں روچ مروچی ءَ ، یک مردمے ءِ چہ مات بیگ ءَ بگر داں آئی ءِ مرک ءِ درگتاں بلوچانی وڑ وڑیں زیمر ھست انت . سرجمیں گپ اش انت کہ بلوچ راج ، چہ وھداں تھر پہ تھریں ساز ءُ زیمرانی ھدوک بوتگ ءُ گون سروز ، بنجو ءُ رباب ءَ رُستگ . بلوچانی گستائیں دمگاں ، ھرچ کُنڈ ءُ جاگھے ءَ کہ ھنکین انت ، ( چُشکہ ; روبار ، کھنوج ، جاشک ، ریگان ، نسرت اباد ، واش ، دزّاپ ، پھرہ ، شستون ءُ چھبار ءَ ، آھانی ساز ءُ زیمر گوں کمّو دَگِری ءُ وڑ وڑی ءَ گِندَگ بنت . انّیگیں دور ءُ زمانگ ءَ ھم گوں گیدی ءِ ساز ءُ زیمرانی دیمروی ءَ ، بلوچ راج ءَ ساز ءُ سوتانی تہ ءَ تھر پہ تھریں اوزار ءُ سامانانی نوکیں دسپانکاں گیش بوتگ انت .

بلوچ راج ءِ کُوَھنیں وردشت ءُ سساھی لیب ءُ گوازی اں چُشکہ کَپَّگ ، اشکاتلی ، کُستی ، اُژناگی ، کوہ سَرکَپی، کترینجی ، چیتی ، نُہ داری ، ھژدہ داری ءُ چَم بندوکی کہ ھرچ کجام بلوچی زندمان ءِ یک بھرے انت ، ماں بلوچانی درھیں دمگاں گوں کمّوکیں دِگری ءَ چہ وھداں بوتگ ءُ داں روچ مروچی ءَ ھست انت . ھرچ یک چہ اے لیباں وتی جاہ ءَ زیب ءُ ستاہ کرزی ءِ درور انت . مرچاں ھم گوں دگنیا ءِ نوکیں میان اُستمانی لیب ءُ وردشتانی ودیگ بیگ ءَ ، بلوچستان ءِ ورنا ءُ نوک ورناھاں ھم گوں اے نوکیں گوازی اں ھدوک ءُ ھمگرنچ انت

رجانک : میرجلال