کَمّ ءُ کَلَھے بلوچستان ءِ ۳ پز نام ءُ تواریں بامردانی زندمان ءَ بارو ءَ

چہ میارجل ءِ بنجاھی ھالرسانی ءِ ھالانی رد ءَ ; واجہ امیر کلمتی ءَ اے ڈول رَزینتگ کہ : بلوچستان ءِ ۳ سوھَو ءُ پر نام ءُ تواریں بامرد ، کوڑہ ایں دگنیا ءَ گوں وتی روبیدگ ءُ سیاسی پڑ ءِ تچ ءُ تاچ ءُ راج ءِ چاگرد ءَ یلو کت ءُ دیم پہ وتی مکیمی جاگہ ءُ ھنکین ءَ شُت انت . انچوشیں بامرد کہ آھانی ھورکیں جاہ ءُ بے مٹّیں بَدَلی ، داں سالانی سال بلکیں پہ ارزانی ءَ پُر مہ بیت . بلوچستان ءِ چاگرد رند چہ بازیں بے مھری ءِ گِندَگ ءُ بلوچ راج ءِ سَروکیں گھمردانی بندی بیگ ءَ کہ چہ پاکستانی سرکار ءُ پَھلَوی ھکومت ءِ " مِلّی شورجاہ " ءِ جھگیران ءُ لھتے مِھتر ءُ گُزر اں ، ماں آ سر وھد ءِ دَگائی نند ءُ نیاد ءِ چِست ءُ اِیر اں سَرجم ءُ برجم بوت ، داں اَنیگیں سال ۱۴۰۱ ءَ ، بلوچ راج وتی گیشتریں تاوان باری ءَ چہ اے ۳ بامردانی بیرانی ءَ دیستَگ ءُ وتی سر ءَ سَگّ اتگ . 

۲ کَس چہ اے سَئیں گھمردان ءَ ، چہ آھانی وتی نیک مارشتی ءِ کِرد ءُ سَرھد زمین ءِ چاگردی ھساب ءَ ، سَرداری ءِ بِستار دَیَگ بوتوتگ انت ءُ سَیُمی واجہ کہ چہ مَکُّران ءِ سوھَو ءُ شھدربرجاھی دَربروکان ات ، چہ آ دو دِگر ءَ ھم سَروک تِر ِاَت پمیشکا بلوچ راج آئی ءَ اُستازی ءِ پنّام سر ءَ دانگ ءُ سرپد بوتگ ات . اے ۳ بامرد چہ یکادگر ءِ ھم سَنَّتی ءُ شریداریں سساہ ءِ واھوندی ءَ ، زُلم ءُ زوراکی ءُ ھان ءُ نوابی مارشتانی ھلاپ ءَ ات انت . من ءَ چُنتے سالانی رد ءَ انچوش کہ آھانی زھگے ءِ وڑ ءَ گوں ھر سَئین ءَ رھوت بوتگ ءُ زان اں کہ بلوچ راج ءِ بَدواہ ءُ درامد دوستیں ھَسَدّیگانی چول سواری کہ وتی بور ءَ گوں تلاھیں زین ءَ سَمبّھینتگ ءُ لھتے بر ءَ کمّے گام ءَ ھم تاچینتگ ءُ ترڈ داتَگ ات ھم نہ توانتَگ کہ مئے کوم ءِ چوشیں بامردانی مارشت ءَ پروش بہ دنت .

اد ءَ من چہ اے بامردانی گوستگیں جھد ءُ کارستان ءُ آھانی بیرانی سَوَب ءَ گپ جناں .

اولی ، سردار بشیر اھمدھان ریکی انت . سال ۱۴۰۱ ءِ تیر ماہ ءِ پنچمی روچ ، پہ بلوچستان ءِ راج ءُ مردماں بَژن ءُ مولم ءِ روچ ات ، اے روچ ءِ تہ ءَ کوم ءِ یک َکَوّاس ءُ زانتکاریں گِھمردے بیران بوت . اے بامرد ، چہ میرجاوہ ءِ شھر ءِ شھرداری ءِ بندات ءَ بگِر ، داں وتی گِس منندی ( بازنشستگی ) ءِ گُڈی روچاں ، ھور گوں وتی اسلی آموزش ءُ پرورشی کارگِس ءِ دربرینوکی زمہ ءَ ، اے مُلک ءِ شھردار ءُ شھرپان ات .

 ھدامرزی سردار بشیر اھمدھان ریکی ءِ ڈوبہ ، رند چہ ھدامرزی سردار مھراللہ ھان ریکی ءِ بیرانی ءَ دو سر گیش بوتگ ات ءُ مھراللہ ھان ءِ زمہ اوں آئی ءِ کوپگانی سر ءَ نھادگ بوتگ ات ، ھدامرزی بشیر اھمد ھان وشّ تب ءُ باز اوپاریں مردے ات ءُ آئی ءِ نیاد گوں راج ءَ پہ دیم ھُروشتی ءَ بوتگ . اے بامرد ءِ بے ساھیں کُنٹ ءِ نماز ، ماں بلوچستان ءِ پراھی ءَ چہ راج ءِ ھمراھی ءُ رُکست ءِ ھساب ءَ بے درور ات . اے گھمرد ءِ بیرانی ءِ سَوَب ، دل ءِ دریکگانی اوشتگ ( ایست قلبی ) ات .

دومی بامرد ءُ سردار مِھدی ھان گورگیج ; سردار مھدی ھان ءِ مِرَگ ، ۴ روچ ءَ رند چہ ھدامرزی بشیر اھمد ھان ریکی ءِ بیرانی ءَ تُپاک کپت ءُ آ واجہ ، تیرماہ ءِ نُھُمی روچ ءَ دیم پہ وتی مُکیمی ھنکین ءَ شُت .

ھاجی مھدی ھان چہ کار ءُ چُلوپگ ، وانوگرانی دربرینوکی ءُ یک سُھل گریں مردمے ات . آ واجہ بلوچستان ءِ تہ ءَ وت یک شھدربرجاھی وانندہ ءُ بلوچ راج ءِ گِھمردانی نیام ءَ تُپاکی ءُ راجدوستی ءِ کاھمیں ساد ءُ رِشتِگ ات . آئی ءِ لوگ ءُ جاگہ ، ھاسیں سوھوئیں مردمانی دیوانجاہ ات . مھدی ھان ءِ اسپیتیں مود ءُ راستیں بالاد ، پہ دِزّاپ دمگ ءِ مردماں پجّار بوتگیں ڈیل ءُ زانتگیں نامے ات ءُ اوگانستان ءِ بلوچانی نیام ءَ راج ءِ زبان ءِ سر ءَ ات . چنتے سال پیسر ءَ کہ من وتی رسانکدری تچ ءُ تاچ ءَ ماں دزّاپ ءِ شھر ءَ بندات کُت ، چہ ھمے واجہ ءِ پلامرزی ءِ برکت ءَ ، من اود ءَ بلوچی زبان ءِ دربرینگ ءَ بنگیج کت . 

چہ مھدی ھان ءِ دانکاں یکّے اش ات کہ ; بلوچی زبان ءَ گوں بلوچستان ءِ سیاسی کاراں ھور ءُ تور مہ کن ات . اے واجہ ءِ پلامرزی پہ من ءَ باز کیمتی ات ، یک رندے کہ من گوں مھدی ھان ءُ ھدامرزی ھاجی محمد ھسین رئیسی ءِ ھمراھی ءَ ، مَکّی ءِ مَزن مسیت ءِ نماز ءَ بھر زُرتگ ات ءُ اود ءَ پہ بلوچی زبان ءِ دیمروی ءِ بارو ءَ ، من ءَ مردمانی نیام ءَ گپ ءُ تران ءِ موھے دات اش .

منی مَنّ ءَ ، چہ ھما گپانی آسرال ءَ ات کہ ماں بلوچستان ءِ شھدربرجاہ ءَ ، بلوچی ءِ شھدیں زبان ءِ وانگ ءُ دربرگ ءِ ھاتر ءَ ۲ موہ ءُ موکل دَیَگ بوت ، البت اے پڑ ءَ واجھان مھندس عبدالسلام بزرگزادہ ، ڈکٹر عظیم شہ بکش ءُ سیستان ءُ بلےچستان ءِ شھدربرجاہ ءِ وھدیں کماش ءُ کارمستر ءِ مِھنت ءُ پلامرزی اں ھم وتی الکاپیں اَسر مندی ءِ کارپد ءَ اِشتَگ ات .

ھدامرزی ھاجی مھدی ھان چہ اے ھاتر ءَ کہ وت بلوچ راج ءِ دود ءُ روبیدگانی دوزواھے ات ، ماں ندکاری ءِ پڑ ءَ ھم دستے ماں تَرّینتگ ات . آ واجہ ، سالانی سال دل ءِ نادراھی آماچ ات ءُ آھر سر ءَ ھم ، چہ ھمے نادراھی ءِ سَوَب ءَ اے کوڑہ ایں دگنیا ءَ یلو دات . گنجیں گلباگ ءَ جاگہ ئے بات .

سَیُیمی بامرد ، ھاجی مھمد ھسین رئیسی انت ; اُستاز رئیسی ءَ درھیں مردماں ، چہ " دربروکان ءُ دربرینوکانی اسلامی مُچّی ءِ زرمبش " ءِ ( جنبش انجمن اسلامی دانش آموزان و معلمان ) گَلّ ءِ تچ ءُ تاچاں ، ماں اے سدی ءِ سالانی پِنجاھی دھک ءِ آھری درگتاں پَجّاہ کار انت . اے واجہ وتی چاگردی ءُ دود ءُ روبیدگی جھدان ءَ گوں نرمیں بچکندے ءُ تیز چاری ءَ ، ماں سدی ءِ شستمی سالانی دھک ءَ ، سیستان ءُ بلوچستان ءِ تہ ءَ پیش داشت . واجہ ءِ اے َجھداں ، زلم ءُ زوراکی ءُ سرداری مارشتانی سَرانڈیلے ءِ سَوَب ، ھاسکار ماں بلوچستان ءِ زرباریں ھند ءُ دمگاں بوت ءُ زانتکاری ءِ بُست ءُ ھُژّاری ءِ ڈاہ ءِ توار ءَ ماں شاھگانیں بلوچستان ءَ گیشتر کُت . 

ھُدامرزی مھمد ھسیں رئیس ءِ کارستاں پہ مردمانی ڈاہ ءُ ھُژاری ءُ بلوچ راج ءِ وانگی ءُ دربرگی پڑاں ، انچوش ات کہ سَداں سردار ءُ نوابیں مُدّھا گر پہ وتی واک ءُ بستار ءُ واکانی ٹَھینگ ءِ ھاتر ءَ برجم کن انت .

مھمدھسین رئیسی ءِ لوگ ءُ جاگہ ءُ آئی ءِ مارشت ، یک شھدربرجاہ ءُ بلاھیں دیوانجاہ ءِ وڑ ءَ ات کہ اود ءَ وتی راج ءِ مردمان ءَ بے زر ءُ مال ءُ ھرچ ءُ درچے ءَ بہ جَلّ ایت . 

رند چہ ندکار ءُ پَٹّ ءُ پولکاریں ھدامرزی گلھان نسیر ءَ ، ھدامرزی مھمد ھسیں رئیسی ، بلوچ راج ءِ ایوکیں سیاست دان ءُ زانتکار ایں بامرد انت . بِلّ کہ گلھان ءَ ھانیں مردمے بوتگ ءُ مھمد ھسیں رئیسی ءَ ، رئیسانی ٹکّ ءِ یک ملائی زھگ ءُ اوبادگے انت .

ھدامرزی رئیسی گوں وتی پلامرزی اں چہ بلوچ راج ءِ ندکار ءُ پولگریں مردماں ، گیشتریں ھزمت ءُ مِھنت ءَ پہ بلوچی زبان ءُ لبزانک ءِ سر ءَ کَشّ اِتگ دانکہ بلوچستان ءِ گال ءُ گُپتاری راجدپتر پہ آیوکیں پٹّ ءُ پولکاراں کتابی دروشم ءَ بہ مان ایت ءُ سر بہ بیت . 

ھدامُرزی ھاجی رئیسی بلوچ راج ءُ دود ءُ روبیدگانی مانِشت ءِ یک بُمپانے ات کہ سالانی سال ءِ سات ءُ سپرءِ گوازینگ ءَ ھور جھد کتگ کہ وتی بلوچی لبزانک ءَ دگنیا ءَ اے دگہ راجان ءَ پیش بہ دار ایت . 

چہ پُپّ ءِ سیروز ءُ دل ءِ نادراھی کہ داں آئی ءِ زندمان ءِ گُڈّی ایں روچاں آئی ءِ ھمراہ ات پہ ھدامرزی رئیسی ءِ سر ءَ اوں رَھمے نہ کُت ءُ سال ۱۴۰۰ بھمن ماہ ءِ ۲۹ می روچ ءَ آئی ءِ بیرانی ءِ سَوَب بوت ءُ اے واجہ ءِ مھرانی ساھگ ءَ چہ بلوچ راج ءِ سر ءَ دیر کُت . چھبار ءِ شھر ءَ ھدامرزی کُنٹ ءِ نماز وانگ بوت ءُ وتی ماتی ملک ءَ ، ماں کیشگ ءِ کَلَّگ ءَ کہ گِہ ءِ آپسرے انت ھاک ءِ میار بوت

رجانک : میرجلال