ازمگرانی درد دل گوں چھبار ءِ مامیر ءُ دمگدار ءَ

چہ میارجل ءِ بنجاھی ھالرسانی ءِ ھالانی رد ءَ ; چھباری ازمگراں یک نیادے ءِ رد ءَ گوں ھند ءُ دمگ ءِ مامیر ءَ ، چہ ھند ءِ لھتے اگدہ زیر ءُ زمہ وارانی بے مھری ءَ ماسیت کُت ءُ ازمگرانی گَل ءِ لوٹ ءُ ارزیگانی بارو ءَ گپ جَت .

چھبار ءِ مامیر ، اے دوستناکیں نیاد ءِ رد ءَ گوشت ; ملک ءِ ازمگراں ھرچ چاگرد ءِ ازم ءُ دودانی راہ ءِ رُژن ءُ کندیل انت . آھاں توان انت کہ چاگرد ءِ اوست ءُ اومیت ءَ را گیش ءُ گُزندانی تورشت ءَ کم بہ کن انت .

واجہ سپاھی ءَ گوشت کہ راجانی دودی بُن ھشت ءِ ردوم ءُ ایرانی اسلامی روبیدگانی شنگ ءُ شانگ ءَ زلورت انت کہ ھرچ دمگ ءِ روبیدگی سوھو ءُ سرپدیں مردماں ، وتی دیدانک ءُ لیکہ ءَ ھما ھند ءُ دمگ ءِ اگدہ دارانی دیم ءَ پیش بہ کن انت . ملک ءِ زمہ واران ءِ ھم ، زانتکار ءُ سرپدیں بامردانی لیکہ ھانی منّگ ءُ آھانی کاربندگ زلورت انت .

اے واجہ ھور گوں چار ءُ بیچاری گندوکے ، چہ ارشاد ءِ دالون ءُ لھتے ازمی ءُ روبیدگی گَلان ، آھانی مونج ءُ مشکلانی بارو ءَ گوشت کہ ازمگرانی سر ءَ دلگوش گور دیگ ، یک نوکبں دودی چاگردے ءِ اڈ کنگ ءَ گوں برابر انت دانکہ راج ءِ اسلامی ءُ ایرانی روبیدگان ءَ ردوم بہ دنت ءُ بہ ٹھین ایت . چھبار ءِ دمگدار وتی درشان ءِ گُڈّی بھر ءَ ، ارشاد ءِ دالون ءِ راہ پِرّینگ ، شھر ءِ درھیں ھلک ءُ ھاریگانی تہ ءَ روبیدگی مراگشانی برجم دارگ ، تھر پہ تھریں بُنگپانی سر ءَ گونڈیں تامرانی پیش دارگ ءُ ازمگرانی بیمہ ءُ آھانی لوٹ ءُ ارزیگانی پیلو کنگ ءِ بارو ءَ گپ کت .

اے مراگش ءِ رندگیری ءَ ، واجہ محمدی ، چھبار ءِ "ارشاد اسلامی" کارگس ءِ کماش ، اے کارگس ءِ کارندہ ایں مردم ءُ موٹل ءِ کمّی ءُ لھتے بُنجاھانی بے مھری ءِ بارو ءَ گپ کت ءُ گوَشت کہ ماں ازمی ءُ روبیدگی پڑ ءَ مردم اگاں تپاک ءُ ھم شوری مہ بنت ، کارانی دیمروی کُنٹ بیت . اے واجہ ، ازمی گلانی دالون ءِ ساچارگ ، ٹوھیں دالون ءِ سرد کنوکیں اوزارانی شوھازگ ، ازمگرانی بیمہ ءُ کار ءُ چلوپگ ءُ آھانی مالی روزگار ءُ گِس والینی ءِ بارو ءَ چہ دمگدار ءَ لوٹ دات .

رند تر ءَ "سینما جوان" ، اکس ءُ تامر ، لچّہ ءُ لبزانک ، ساز ءُ زیمل ، گِنداری ازماں ، وش نبیسی ءُ درھیں گلّانی نزوریں وس ءُ نگیگی انی بارو ءَ گپ کت . 

واجہ سپاھی ھور گوں گندوکے چہ ارشاد ءِ ٹوھیں دالون ءُ اے کارگس ءِ ادبی ، ازمی ءُ روبیدگی گلاں ، یک نیادے ءِ رد ءَ گوں اے ٹولی انی سروکاں ، اے گلان ءُ ھند ءِ ازمگرانی لوٹ ءُ ارزیگانی بارو ءَ سر ءُ سوج کت . نیاد ءِ رد ءَ ، اولسر ءَ واجہ محمدی وتی کارگس ءِ نگیگی ءُ کارندہ ءُ موٹل ءِ کمّی ءِ بارو ءَ ، انچوش چہ لھتے ھزگاریں بنجاھانی نادلگوشی ، پہ چاگرد ءِ دود ءُ روبیدگان ءُ دمگ ءِ ازمگرانی بارو ءَ ، ماسیت ءُ گلَگ کت . اے واجہ انچوش چہ ازمی ءُ ھنری گلانی جاہ ءُ دالون ءِ نوکساچی ءِ زلورت ءُ ھلاکہ ءِ تُش تُشی زرّ ءُ بنمال ءِ گیش ءُ گیوار کنگ ءَ گپ کت ءُ چہ ھند ءُ دمگ ءِ مامیر ءَ لوٹ ات کہ اے کارگس ءَ ، ھاسکار پہ سارت کنوکیں آسراتی سامانانی بارو ءَ کمک ءُ مدت بہ کنت . واجہ سپاھی ءَ ، ھنر ءُ ازمانی چاگرد ءَ چہ زانت ءُ مارشتانی ھساب ءَ ھزگار ءُ چہ مالی ھساب ءَ نیزگار لیکت ءُ ازمی گلان ءِ کِرد ءُ مراگشانی بارو ءَ گپ کت ءُ ازمگرانی گِس والینی روزگار ءِ کُھت ءُ کمی ءُ آھانی بیمہ کنگ ءِ ھاتر ءُ چہ دمگدار ءَ لوٹ دات .

رجانک : میرجلال . 

ھالکار : عبدالقادر شیخ زادہ