"بلوچستان بلبل" (کُلی) ءِ نمیزانیں میراس; چمشانکے استاد نورھان بیزنجو ءَ زندمان ءُ کارپد ءِ سر ءَ.

نورھان بزنجو سال 1970 ءِ ژانویہ ماہ ءَ پسنیءِ شھر ءِ چہ مات ءَ پیداک بوت. آئی ءِ آریپیں پت ءِ نام ھدامرزی گلامسرور بزنجو ات. نوزھان وتی ڈپلم ءَ پسنی شھر ءَ وانت ءُ در برت ءُ پہ وتی گیشتریں وانگ ءَ کزاچی ءَ شت، اود ءَ مزن دربرجاہ ءُ شھدربرجاہ ءَ در برت، چد ءُ رند پہ "کارشناسی ارشد" ءِ دربرگ ءَ شال ءَ شت ءُ اود ءَ وتی اے مول ءُ مراد ءِ وانگ ءَ بلوچستان شھدربرجاہ ءَ راجدپتر ءُ گوستاک ءَ دربرگ ءَ سوبین بوت. نورھان اولی گسندہ ات کہ "کارشناسی ارشد" اے بنگپ ءِ وانگ ءُ دربرگ ءَ گوازینت. نورھان وتی وانگ ءُ دربرگ ءِ وھد ءُ درگت ءَ سیاست ءِ دگنیا ءَ پُتر ات ءُ گوں بلوچ دربرینوکانی بنجل ( سازمان دانشجویان بلوچ) B S O ءَ ھوار بوت. چہ شی ءَ گیش، نورھان بزنجو چہ گونڈی ءَ گشندھی ءِ ھدوک ات ءُ اے واجہ چہ دربرجاہ ءِ زمانگ ءَ زیمر ءِ دربرگ ءَ اوں بندات کت. نورھان زیمر ءِ اولی رھبندان ءَ وتی استاز ءِ دیوان، استاد اعجاز علی بلوچ، پسنی ءِ شھر ءَ دربرت ءُ دیمتر ءَ پہ گیشتریں دربرگ ءَ کراچی شت ءُ اسناد محمدعمر ءِ پتر ءَ زیمر ءِ دربرگ ءَ رندگیری کت، ھما وھداں نورھان ءَ اسناد ّعبدالستار بلوچ ءِ پتر ءَ اوں دربرگ ءِ موہ دست کپت. ھدامرزی نورھان ءَ سال 1988 ءَ بلوچی زیمر ءِ گسندھی ءَ بندات کت ءُ اے نیام ءَ گوں بلوچی زبان ءِ مزن ءُ نامداریں گشندہ واجہ عارف بلوچ ءَ پجارینک بوت. انچوشیں گشندہ ئے کہ نورھان ءِ وتی داب ءَ دلسر ءُ اسرمندیں توارے ءِ ساھب ءُ واھوند ات ءُ آئی ءِ سازانی دسپانک گھتریں بستارے ءَ ات. رند چہ اے سروھد ءَ ھر دوئیں گشندہ ھاں دو تواری سوتانی گشندہ ای ءَ بندات ءُ بازیں ھوریگیں نوار ءُ البوم اش شنگ ءُ تالان کت.. آھاں ھمے وڑ ءَ بازیں مھپل ءُ مراگشانے ءَ ھور بوت انت، آھانی دوستی ءُ سنگتی بے درور ءُ پہ بازیں دگہ گشندہ اں ھم یک مسال ءُ درور ءِ داب ءَ بدل بوت. بزنجو نئیکہ ایوک ءَ بلوچستان ءَ بلکیں ایران، عمان بھرین ءُ امارات ءَ اوں باز نامدار ءُ واھگدارانی واھوند ات ءُ چہ نورھان ءُ عارف ءَ پہ بلوچی زیمری مراگشانی برجم دارگ ءَ داوت ءُ ونتوکی بوت. نورھان ءِ دل تبیں گشندہ اں مرید بلیدہ ، نسرت فتح علی ءُ عابدہ پروین ءُ آئی ءِ دل دوستیں شائر ءُ لچہ کار مبارک کازی بوتگ انت. چہ شی ءَ گیش، نورھان ءِ گھتریں سنگتان رسول بکش پرید ءُ عارپ ات انت. استاد رسول بکش پرید، گشندہ ءُ بنجو ءُ ھارمونی سازانی استاز ءُ کتہ کار ات. نورھان، عارف ءُ رسول بکش پرید، ھر سہ ایں دلدوستیں سنگتی ات انت. بلوچ راج ءِ نمیرانیں گشندہ نورھان بزنجو، گیش چہ اے کار ءَ شیر ءُ لچہ اوں پر بستگ ءُ... . آئی گوں وتی دلکشیں توار ٹوھیں گشندہ ئے ات ءُ بلوچی ءِ زگرین ءُ نوکیں زیمران ءِ ھمگرنچ کنگ ءِ پڑ ءَ ٹوھیں کرد ءُ کارپدے ءِ واھوند بوتگ. نورھان ءِ توار ءُ الھان ھاس ءُ ایوکیں توارے ات ءُ ھرکس کہ گشندہ ای کنت چوشیں توار ءُ الھانے نیست. چہ اشی ءَ گیش، نورھان ءَ پہ بلوچی زبان ءُ لبزانک ءُ ربیدگ ءِ دیمروی ءَ بازیں جھدے کتگ ءُ چہ دل ءِ جھلانک ءَ بلوچ راج ءِ ھزمتکارے ات ءُ وتی واھگداران ءِ بازیں دلے نورھان ءِ ھدوک ات . چہ رنورھان ءَ بس 10 ریل ءُ نوار شنگ بوتگ، آھانی نام انت: شیرکنیں یات (خاطرات شیرین. اوست ( اعتماد) . اومیت (امید) . کندیل ءَ روک کن (چراغ ، شمع را روشن کن) . زھیرانی رازاں (رازھای دلتنگی) . مھر پہ نام انت ( عشق بہ نام است) . جتائی ( جدایی) گزان . شیرماھیں شپ (شب مھتابی / شب ماہ کامل) ءُ:آدینک (آینہ) انت. نورھان ءِ اولی نوار شیرکنیں یات ( خاطرات شیرین) ءُ گڈی نوار ھم، آدینک (آینہ) ات. چد ءُ گیش، گیشتر چہ 200 نوار چہ نوزھان ءِ وڑوڑیں مھپل ءُ مراگشاں درپ ءُ رند ءَ شنگ ءُ تالان بوت. چہ نورھان ءِ بیرانی ءِ یک روچ پیسر ءَ، آئی ءُ عارف داں آ شپ ءِ اے دگہ روچ ءِ گوربام ءَ، یک مزاگشے ماں بلوچستان ءِ کیچ دمگ ءُ مند ءَ، دیوان کرتگ ات. آئی، سال 2003 ءِ اگوست ماہ ءِ رولھی درگت ءِ ادار 6 ءَ، کیچ ءِ کوشکلات ءَ ماں بلوچستان بیران بوت . نورھان ءِ اناگتیں بیرانی، درستان ءَ اجکہ ءُ ھیران کتگ ات. داں روچ مروچی کہ گیش چہ 23 سال چہ نورھان ءِ بیرانی ءَ گوز ایت، ھچ کس ءَ باور نہ بیت کہ، نورھان دگہ مئی بلوچ راج ءِ نیام ءَ نہ انت. چہ نورھان ءَ آئی ءِ جنوزامیں لوگ بانوک ءُ دو جنک ءُ یک مردیں زھگے پشت کپتگ. نورھان ءِ بیرانی ءَ پد، آئی ءِ گھتریں سنگت آرپ بلوچ ءَ گوشت::" من وتی گُٹ ءِ توار باھینت" چہ شی ءَ گیش، عارف ھر وھد کہ سوتے وانت کہ چد ءُ پیش، ھما سوت ءَ ھدامرزی نورھان ونتگ، آئی چہ وتی سنگت ءِ مھنتاں پہ بلوچ راج ءِ دود ءُ ربیدگ ءُ زبان ءُ زیمر ءَ کش اتگ ءُ سگ لٹگ، کدر زانت ءُ یات کنت. عارف انگت ءَ وتی سنگت ءِ زھیران انت. سال 2003 ء پہ ھدامرزی نورھان بزنجو ءَ یک یات گیجیں مراگشے ماں کراچی ءِ شھر ءَ برجم دارگ بوت کہ اود ءَ بلوچ راج ءِ بازیں لبز زانت، گشندہ اں، سازگراں، لچہ کاران ءُ زبان زانتاں بھر زرتگ ات. آ مراگش ءِ تہ ءَ‌، استاز عبدالستار بلوچ کہ وت چہ ھدامرزی نورھان ءِ استادان ات، چہ نورھان ءَ ید استار ءِ برزتریں ازمکار ءِ ھساب ءَ یات کت ءُ گوشت: من ءَ بژن ءُ اپسوز انت کہ چہ ما ءُ بلوچ راج ءَ استار ءِ برزتریں ازمکارے گستا بوت. انچوش رژنا سساہ ءُ لچہ کار ءُ نمیرانیں جی آر ملا ءَ گوشتگ ات کہ نورھان ءَ گوں آئی ءِ دل تبیں توار ءُ الھان، بلوچ راج ءِ جھگیر زانگ لوت ایت. جی آر ءَ گیش کت کہ ازمگراں نمیران انت ءُ ھجبر بیران نہ بنت. ھدامرزی نورمحمد نورل، گشندہ، لچہ کار، ترز کار ءُ زیمرساچ ءُ بلوچ زیمر ءِ استاز ءُ دربرینوک ءَ گوشتگ ات، نوزھان وتی کسان ءُ کمیں امر ءِ توک ءَ ھرچی کہ توانتگ ات پہ بلوچ راج ءَ کتگ ات، درستاں روچے ناں روچے مر انت بلے نورھان ءِ اناگتیں بیرانی ءِ درد ءُ تورشتاں چہ انچوشیں ازمکارے کہ پہ بلوچ راج ءَ باز مھنت ءُرجھد کتگ ات پہ کوم ءَ سک گران ات. رند چہ نورھان ءِ بیرانی ءَ چو مارگ بوت کہ بلوچی زیمر نوکیں گشندہ ھانی یک ھُلّ ءُ چولے ءِ داب ءَ دیم پہ دیم بوت، ھر کس ءَ کہ گشندہ ای ءِ واک ءُ وس چے ھت ات یا نہ نہ ات، درھیں جھد کنگ ءَ ات انت کہ یکے دو نوار شنگ ءُ تالان بہ کن انت. زیمر ءِ شنگ ءُ شانگ کنوکیں بنجاہ ءُ شرکتاں کہ نورھان ءِ ریل ءُ نوارانی شنگ ءُ شانگ ءِ کلائیش ات لنت بازیں بے شماریں نوار ءُ ریل ءُ ڈی وی ڈی ءُ سی ڈی چہ نورھان ءِ سوتاں شنگ ءُ بہا کت ءُ ھرکتام بے کچیں نپ ءُ سیتے کٹ انت. اگاں کہ چہ نورھان ءِ بیرانی ءَ کساس 23 سال گوستگ بلے آئی ءِ دل تبیں توار ءُ الھان انگت ءَ سدانی ھزار دوسواہ ءُ ھدوک ءِ دلاں ماں دگنیا ءِ ۴ کونڈاں گوشداروک انت . ھنک سالاں 6 اگست ءِ روچ ، آئی ءِ زھمت ءُ مھنتانی ھاتر ءَ کہ بلوچ راج ءِ زبان ءُ زیمر ءِ پڑ ءَ کش اتگ، آئی ءِ ارواہ ءَ مزن لیک انت ءُ منواری در کن انت. چہ نمیرانیں نورھان بزنجو ءَ یک گالردے یاتگار منتگ کہ گوس ایت: وتی کوم ءَ گوش دار ات. وتی کوم ءَ برداشت (اوپار) کن ات. مستریں کومیت ھمیش انت. رجاندکار : پرویز سامی. نکار : میرجلال.