سیستان ءُ بلوچستان ءِ مردمانی دواءُ درمانی لڈّ ءُ بوج ، ملک ءِ دگہ ھلاکہ انی نیمگ ءَ میارجل ءِ گشتان

میارجل ءِ ھالکار ، سیستان ءُ بلوچستان ءِ مردمانی دوا ءُ درمانی لڈّ ءُ بوج ءِ ھاتر ءَ دیم پہ ھمساھگیں ھلاکہ اں ، کرمان ءِ دمگ ءَ گشت ءُ گولے کتگ دانکہ اے بارو ءَ تامرھالے بہ کشّ ایت . دوا ءُ درمانی آسراتیانی کمّی ءُ ھلاکہ ءِ تہ ءَ الکاپیں نادراھجانی نہ بیگ ، مردمان ءَ پہ چوشیں لڈّ ءُ بوجاں ھُج ءُ کڈّن کتگ .

چہ میارجل ءِ بنجاھی ھالرسانی ءِ ھالانی رد ءَ ; پہ اے ھاتر ءَ کہ سیستان ءُ بلوچستان ءِ ھلاکہ ءَ ھاسکار ماں سیمسری دمگاں ، دوا ءُ درمان ءِ آسراتی ءُ سوھو ءُ زانتکاریں دکترانی کُھت ءُ کمّی انت پمیشکا مئے مردم وتی نادرھیں آزیزانی درمان کنگ ءِ ھاتر ءَ ، ھمساھگیں ھلاکہ ءُ دمگان چوشکہ شیراز ، یزد ، کرمان ءُ مشد ءِ شھراں ، لڈّ ءُ بوج ءِ کنگ ءَ ھُجّ ءُ لاچار انت .

گیش چہ اے گپ ءَ ، لڈّ ءُ بوج کنگیں مردماں بید چہ دوا ءُ درمانی ھرچ ءُ درچاں ، وتی ڈوولیں ھدارکی ھنکین ءِ ھاتر ءَ اوں زَرّی تاوان ءِ سگّگ ءَ لاچار انت / رجانک : میرجلال .