سوھو ءُ زانتکاریں ماتاں ، زانوگریں بچانی رودینوک انت

چہ میارجل بنجاھی ھالرسانی ءِ ھالانی رد ءَ ; بانک پرھناز کرد زابلی کہ دزاپ ءِ دتّگی دربرجاھے ءِ کارمستر ءُ سیستان ءُ بلوچستان ءِ درستیں لیب ءُ گوازی ان ءِ سروک ءِ جھمنند ءُ لھتے دگہ زمہ ان ءِ اگدہ دار انت ماں نند ءُ نیادے گوں میارجل ءِ ھالکار ءَ گُوَش ایت : جنینانی بستار کہ درھیں مردمانی پدریچ ءِ رودینوک ءُ رُدوم دیوک انت باز گران ءُ مَزَن انت . جنیاں ھما پیم کہ گوں یک دستے ءَ زھگانی گوانزگاں چنڈین انت ، وتی آ دگہ دست ءِ گوم ءَ دگنیا ءِ تہ ءَ بازیں دگہ کارانے اوں کن انت . یک پدریچ ءِ رودینوک ءُ رُدوم دیوک ءَ ( چاگرد ءِ تہ ءَ ) دیمروی ءِ ھژدری انت پمیشکا بید چہ دیمروی ءَ ، آ پدریچ بیگواھی ءِ آماچ بیت . اے بانک ، وتی گپان ءِ رندگیری ءَ گُوَشت کہ منی گپان ءِ دیم گوں بلوچ راج ءِ دتگان انت . شما را وتی چاگرد ءِ تہ ءَ بید چہ دیمروی ءَ دگہ ھچّ دگہ راھے نیست ، پہ وتی وانگ ءُ دربَرَگ ءَ دیم ءَ بہ جنز ات ءُ وت ءَ را بُرزیں جاہ ءُ بستار اں سر کن ات ءُ ھمے وھد ءُ درگت ءَ وتی کِرد ءُ کارپدان ءُ بلوچ راج ءِ جنینی گیرت ءُ ھیا ءَ دگنیا ءِ درستیں راج ءُ مردمان ءَ پیش بہ دار ات