سَنگ ءُ شاھیم ءُ رِد ءُ پِیشرد

میارجل ءِ ھالرسانی بنجاہ ءِ ھالانی رد ءَ : مروچ چارشمبے ءِ روچ 3 نومبر 2021 ھمدپ گوں 12 آبان 1400 ھجری شمسی ءَ مگرب ءِ نماز ءَ  رند چھبار بلوچی لبزانکی گَل ءِ ھپتگی دیوان ماں بولان ءِ تْران جاہ ءَ مزنیں دریا ءِ تیاب ءِ کِرّ ءُ کنکّ ءَ گوں گَل ءِ کارمستر واجہ تارک ھسین ھوت ءِ گال ءُ گِپتاراں کہ ھدا ءِ نام آیانی  بْراہ اَت بندات ءُ آجوئیں دروشم ءَ دیم ءَ روان بوت کہ رند ءَ واجہ گلام بھار ءُ شے سید ءَ دست گپت ءُ جست ءُ پرسانے کہ سِنگ ءُ شاھیم ءُ رِد ءُ پِیشرد ءِ بارہ ءَ کنگ بوتگ اِت اَنت یک یک ءَ پسو اِش دات ءُ دیوان گوں وتی زانگ ءِ پد ءَ سر ءُ سوج اِش کت کہ آسر ءَ چہ ھاسیں مھمان  واجہ مھمد بشیر بلوچ ءَ لوٹ بیت کہ لچھے گوں وشگٹی ءَ بہ وان اِیت  کہ واجہ ءَ دیوان وشنود کُت ءُ دیم ءِ ھپتگ ءِ  بنگپ ءِ بارہ ءَ ردانک ءِ بنگپ گِچین ءُ مَیّن کنگ بوت کہ واجہ شے سید ءُ گلام بھار ءُ میرجان میر ءُ باسد شوھاز ءُ وھید بلوچ وتی زانت ءِ پد ءَ ھر تھرے توری بہ بیت ، آزمانک بہ بیت یا دل نبشتہ ، گچین بکن اَنت ءُ بہ نبیس اَنت ءُ بیار اَنت ءُ ماں دیوان ءَ بہ وان اَنت اِش ءُ آیانی کم ءُ گیشیانی  بارہ ءَ گپ کنگ بہ بیت کہ آسر آسر ءَ واجہ تارک ھسین ھوت ءَ سیدگنج ءِ بزانتبلد پہ باسد شوھاز ءَ ءُ مجید مراد ءِ وانگی "نھال" پہ گلام بھار ءُ شے سید ءُ میرجان میر ءَ داد ئِے بکش اِت اَنت کہ دیوان ءِ تہ ءَ گونڈلیں مزمل ءُ مدامی ھمراہ بابا ماسٹر رشید ءُ مھمد اسلم ھم ھوار اِت اَنت کہ ادار 15 : 19 ءَ رو ایرشتی بلوچستان ءِ وھد ءَ دیوان ءِ پَتّر پیچگ بوت  ۔