پھرہ ءِ

چہ میارجل ءِ بنجاھی ھالرسانی ءِ ھالانی رد ءَ ; پھرہ ءِ "خاتم الانبیا" نادراہ جاہ ءِ لھتے چہ دکتراں ماں یک ھَبَکّہ ایں کِردے ءَ ، نادراھیں مردمان ءَ ماں شھر ءِ نادراہ جاہ ءَ دوا ءُ درمان کن انت بلے زرّانی گِرَگ ءِ وھد ءَ آھان ءَ وتی دکتری ھاسیں کُڈل ءِ نیمگ ءَ گواجار انت ءُ دیم دے انت .

لھتے چہ شھر ءِ مردماں ماں گپ ءُ ترانے گوں میارجل ءِ ھالکار ءَ اے وڑ ءَ گپ کن انت ;

عبیداللہ ناروئی بزمان ءِ ھند ءِ مردمے گوش ایت ، پارییگیں سال ءَ سیچنے منی زھگ ءِ پاد ءَ گُتّ گپتگ ات ما پہ سیچن ءِ کَشّگ ءُ درکنگ چہ زھگ ءِ پاد ءَ ، "وحدت کلینیک" ءَ دکتر درودی ءِ کِرّ ءَ شت ایں ، اُود ءَ اے واجہ ءَ زھگ ءَ دیست ءُ یک نمدی ءُ چِٹّی ئے پہ وتی دکتری کُڈُل ءَ ماں شھر ءَ نبشت ءُ ما را پانگ کت کہ پہ سیچن ءِ کَشّگ ءَ زھگ ءَ منی دکتری کُڈل ءَ بہ بر ات ءُ یک ملیون ءِ زرّ بہ دے ات . ما گوشت کہ ما را اینچوک زرّ یست تو چو بہ کن کہ سیچن ءَ چہ منی زھگ ءِ پاد ءَ ماں سرکاری نادراہ جاہ ءَ بہ کَشّ . رند ءَ دکتر ءَ گوشت کہ نادراہ جاہ ءِ تہ ءَ من ھچ کس ءَ دوا ءُ درمان نہ کن اں ، گْڈسر ءَ ما پہ سیچن کشّگ ءَ دکتر ءِ ھاسیں کُڈُل ءِ بَرَگ ءَ ھُجّ ءُ پہ زرّ ءِ شوھازگ ءَ وام ءُ شینے ءَ کَڈّن بوت ایں . 

دگہ جاھے واحد ناروئی نامیں مردمے ماں گپ ءُ ترانے گوں میارجل ءِ ھالکار ءَ گوشت ; مئے نادراہ ءِ زھرگ ٹوہ بوتگ ات ، چہ درد ءُ تورشتانی سَوَب ءَ ما اے دگہ روچ ءِ ماھلو ۶ ادار ءَ "خاتم الانبیا" ءِ نادراہ جاہ ءَ شت ایں ، نادراہ ءِ "سونو گرافی" ءُ اے دگہ اولی کار ءُ بار ءَ ھمے دکتر درودی ءَ کت انت ، رند چہ "سونو" ءُ دگہ اُزمائشت انی چِٹّی ءِ چارگ ءَ ما را گوشت کہ "رازی کلینک" ءِ نیمگ ءَ (کہ اے دکتر ءِ ھم شور ءُ ھاسیں درمانجاھے انت) راہ دات ءُ کڈّنی کت کہ ۹ ملیون تومن "عمل" ءِ زرّ ان ءَ الّم ءَ ھمود ءَ رازی کلینک ءَ بہ دے ات ! ما ھر چینچو واہ ءُ زاریرکت کہ ما را اینچوک زر نیست ءُ ما بزّگیں مردم این ءُ مئے نادراہ ءِ ھال نگیگ انت بلے دکتر درودی ءَ ھما یکّیں دار ءِ سر ءَ داشتگ ات ءُ ایر نہ آتک . آ روج ما داں شپ ءِ ۹ می ادار ءَ ماں نادراہ جاہ ءَ مھتل ءُ تکانسر بیت ایں ! 

بژن انت کہ آ روچ مئے نالگ ءُ پریات ھچ کس ءِ گوش ان نہ کپت ءُ مئے نزاریں ھال ءَ کس نہ منّ ات .   

رند چہ پھرہ ءِ دکترانی بے کِردی ءَ ، ما مجبور بوتیں وتی نادراہ ءَ یزد ءِ دکتر ءُ نادراہ جاہ ءَ سرکت ءُ اود ءَ بے ھرچ ءُ درچے ءَ مئے نادراہ ءِ گورسی کنگ بوت 

خاتم الانبیا ءِ نادراہ جاہ ءَ آ روچ مئے وڑیں دگہ نادراھیں مردم باز ات انت . یک دگہ بزگیں نادراھے ءِ گونڈیں ٹَپّے ءِ ترُکّ چِنَگ ءَ "بخیہ" ھمے دکتر ۸ ملیون زر تماہ کتگ ات . 

نرماسیری نامیں مردمے گوشت ; پہ یک ادنائیں "عملے" ءِ ھاتر ءَ ما نادراہ جاہ ءَ تک ایں ، دکتر ءَ گوشت کہ ما نادراہ جاہ ءِ تہ ءَ ھچ کس ءَ "عمل" نہ کن ایں ، شما بایدانت کہ مئے وتی دکتری کُڈُل (مطب) ءَ بیا ات ءُ اود ءَ ۶ ملیون زرّ بہ دے ات ، پمیشکا ما لاچاری ءَ وتی نادراہ ءَ دکتر ءِ ( مطب ) ءَ بُرت ءُ پہ گونڈیں کارے ءَ واجکار ءَ ۶ ملیون زرّ دات .

ھالکـار : صالحہ دادکانی

رجانک : میر جـــــــلال