پنوچ دمگ ءِ لَس مھلوک ءِ ھاتر ءَ ۵۷۷ کیلومتر ھاکی ایں راھاں / اے دمگ راھانی سیہ دون ( اسفالت ) چہ سد ءَ

واجہ پیرمحمد داوودی ، ماں نند ءُ نیادے گوں میارجل ءِ ھالکار ءَ سرپدی دات کہ; پنوچ دمگ ءِ راھاں سرجمی ءَ کساس ۷۷۶ کیلومتر انت ءُ چہ اِشاں ۵۷۷ کیلومتر ، انگت ءَ ھاک ءُ سِکی راہ انت ءُ اشتاپیں سیہ دون ءِ مھتاج .

اے واجہ گُوَشت کہ چہ پنّوچ ءُ تنک سرھدّ ءِ نیامی راھانی بنداتی ءَ کہ سال ۱۳۸۸ ، چہ تنک سرھدّ ءَ بُنگیج بوتگ . داں اَنّی ءَ پہ اے ھند ءُ دمگ ءِ راھی آسراتیاں ، کِساس۵۸ ملیارد ءِ بُنمال ماں گُوَستگیں سالانی درگت ءَ ھرچ ءُ درچ بوتگ .

پَنّوچ دمگ ءِ راھانی کارمستر ءَ گُوَشت کہ گون اے نیامی راہ ءِ سرجم بیگ ءَ ، اے گِستا منتگیں دمگ ، چہ دیر پَشت کَپتَگی ءُ بُنزولیں ملکے ءِ وڑ ءَ رَکّ ایت ءُ اے کار ءَ رند ، دیمروی ءُ بودناکی ءِ برمش ، اے مُلکانی تہ ءَ رُکش ایت . پہ اے راہ ءِ پورہ کنگ ءِ ھاتر ءَ ما را گیش چہ ۳۰۰ ملیارد تومن ءِ بُنمال ءِ زلورت انت . 

اے واجہ ءَ گیش کت کہ پنوچ ءِ آپسرانی دیمروی ءِ ایوکیں رھدر ، اے دمگ ءُ تنک سرھدّ ءِ نیامی راہ ءِ پورہ کنگ انت ءُ چَنائی ءَ رند ، اے شَمَگ ءِ راہ ، داں ۱۰۰ کیلومتر ءِ کَچّ ءَ نَزّارگ بیت ءُ لس مھلوک ءِ رَوَگ ءُ آیَگ ءُ مردمانی بیاپار ءُ زندمان ءِ آسراتی ءِ سَوَب بیت .

واجہ داوودی اے دمگ ءِ کَلّگانی نیامی راھانی سیہ دون ، ساچکاری ءُ ناسرجمی ءِ نیمون ءَ بُنمال ءِ کھت ءُ کمّی جار جت ءُ گیش کت کہ ما را پہ ۸۰۰ کیلومتر راھانی ساچگ ءُ دارَگ ءَ ، راھانی ھاسکاریں اوزار ءُ گرانیں موٹلاں زلورتاں ، چوشکہ گریڈر ءُ بولڈیزر ءُ گران باریں موٹل ، چہ اشانی ھر وڑ ءَ ایوک ءَ ھست پمیشکا ما را دمگ ءِ ھاک ءُ سِکی راھانی کَرّگ ءُ تچک کنگ ءَ ، ھر ۲/۳ ماہ ءِ سر ءَ یک رندے ءَ وس بیت .

اے واجہ ءَ پہ پنوچ دمگ ءِ راھانی گِھساچی ءُ الکاپیں دارگ ءِ ھاتر ءَ گوشت کہ چہ کمّیں ھسابے ءِ رد ءَ ، ما را ۱۰ گران جونیں کاری ءُ باری موٹلانی زلورت انت . چوناھا ما را وتی کارگس ءِ پورہ ایں ھساب ءِ رد ءَ ، بازیں امباسک ءُ ھاڑو ھم کم انت ءُ انیگیں درگت ءَ کہ چہ پنوچ دمگ ءِ راھانی کارگس ءِ راہ پِرّینگ ءُ دیم درائی ءَ ۱۰ سال گوز ایت داں انگت ءَ ما اے کارگس ءِ امباسکانی کمّی ءِ آماچ ایں .

پنوچ ءِ دمگ ءِ جھمنندیں مھلوک ، ۶۲۰۰۰ نپر انت کہ ماں ۲ شھر ءُ ۱۴۹ کلگ ءِ تہ ءَ ھنکین گپتگ انت ، 

اے دمگ ءِ ۹۴ کلگ چہ ورگی آپ ، ۸۸ کلگ چہ ھادی ءِ تھر ، ۸۳ کلگ چہ تیزیں دامگ ، ۴۲ کلگ چہ لیب ءُ گوازی ءِ سوزساچیں پٹ ءُ میداناں زبھر انت . 

میان کلگی راھانی ۵۷۷ کیلومتر ءُ پنوچ ءُ کُتیچ ءِ دوئیں شھرانی دگ ءُ کوچگان ءَ ۶۵ کیلومتر ءِ سیہ دون کاری زلورت انت

رجانک : میرجلال