واری ءُ بزّگی ھاک ءُ پلک ، دشتیاری دمگ ءِ گنجائشانی سر ءُ دیم

چہ میارجل ءِ بنجاھی ھالرسانی ءِ ھالانی رد ءَ ; اے دمگ ءِ "فرمانداری" ءِ بستار ، سال 1399 ءِ توشان ( شھریور ) ماہ ءَ بندات بوت ءُ داں انی ءَ کہ ۳ سال چہ آ زمانگ ءَ گوز ایت انگت ءَ واری ءُ بزّگی چہ اے دمگ ءِ سر ءُ چکّ ءَ زاھر ءُ پَدّر انت .

دشتیاری دمگ ءِ اسلامی شورجاہ ءِ کماش ءُ کارمستر ، یک گپ ءُ ترانے ءِ رد ءَ گوں میارجل ءِ ھالکار ءَ گوش ایت کہ اے دمگ ءِ آپی ءُ سرڈگاری سیمسرانی ایوکیں بود ءِ بستار ، آئی ءَ چہ دگہ دَمَگاں گستا ءُ ھاس کتگ . گنجیں زر ءِ ھمساھگَی ءُ پسابندن ءُ ریمدانی آپی ءُ ھاکی باڈراں ، کشت ءُ کشاری ءُ ماھیگری واک ءُ وس ، کار ءُ چلوپگانی "صنعتی" کارجاہ ءُ دگہ لھتے بود ءُ بَرَش ، اے دمگ ءَ ھاسیں اردشتے داتگ .

یک سالے بیت کہ اے ھند ءِ دمگ داری ( فرمانداری ) ، گوں سرپرست ءَ کارمرز کنگ بیت . ھلاکہ ءَ اگدہ داراں چہ اے دمگ ءَ نادلگوش انت ءُ چوشیں جاورھالے دمگ ءِ مردمان ءِ گلہ مند کتگ .

دشتیاری دمگ ءِ اسلامی شورجاہ ءِ کماش وتی درشان ءِ دگہ بھرے ءَ گوش ایت کہ ھند ءُ دمگ ءِ چہ ۱۰ مردم ، آھانی ۹ کس ، کلگ ءُ ھاریگانی جھمنند انت ، ھلک ءُ آباتیانی گِستائی ءُ تک ءُ پرکی ، راھانی دوری ءُ لھتے دگہ نگیگی اں ، واری ءُ بزگی ءِ پُلک ءَ دمگ ءِ دروشم ءِ سر ءُ چَکّ ءَ شانتگ .

اے واجہ وتی گپانی گوشگ ءَ گیش کنت ، دمگ ءِ بازیں ھلک ءُ کلگے رَوَگ ءُ آیگانی ھاتر ءَ چہ یک سنگ ءُ ڈوکی راھے ءَ ھم زبھر انت ءُ اد ءِ رھوت کنگی آسراتی انی نامے ھم پشت نہ کپتگ . چہ درستاں گنتر ، بریس ءِ شھر ءِ مردماں ، کہ ھند ءُ دمگ ءِ یک ترّ ءُ تابے شھر ءُ بندنے انت چہ بے آپی ءُ گوانکو انی دامگ ءِ پد مہ پدیں سند ءُ سیل ءَ تکانسر انت .

واجہ ایزدپناہ وتی درشان ءِ دگہ بھرے ءَ گوشت کہ پسابندن ءِ آپی باڈر کہ بلوچستان ءِ زرباری تیاب دپانی ایوکیں باڈر انت ، چہ ھند ءُ دمگ ءِ لھتے اگدہ دارانی کولہ روی ءِ کِرد اں ناسرجم انت ءُ پسابندن ءِ سیمسری شھر ءِ نندوکیں مردم ءُ مھلوک دنینگت ءَ اے باڈر ءِ راہ پِرئنگ ءِ ودار ءَ انت .

اے واجہ ءَ وتی درشان ءِ گیشتریں بھرے ءَ گوشت کہ بژنی گپے کہ نوبندیان ءِ سلامتی ءُ جاندراھی بنجاہ ءَ اے ۳ ھپتگ انت ڈکتر نیست ، لھتے چہ بھداشت ءِ لوگاں ، کوھن ءُ کدیمی انت ، بھداشت ءِ آسراتیانی نام ءُ نیمونے اوں نیست ءُ دمگ ءِ لس مردماں چہ اے جاورھال ءَ گلّہ گُزار انت / رجانک : میرجلال .