۵ مردم ، سرباز کور ءِ آپ ءُ آمال ءَ بُرت ءُ بیران بوت انت .

راسک ءِ دمگدار ءَ گُوَشت کہ ۵ مردم ، ۲ جتا جتائیں تُپاکانی کَپَگ ءَ پد ، ماں سرباز ءِ کور ءَ کہ بلوچستان ءِ زرباری دمگان انت چہ آپ ءُ آمال ءِ بَرَگ ءِ ھاتر ءَ بیران بوت انت . واجہ سلیم کدھدا ءَ درّا ئینت ; بژن انت کہ یک لوگمانے ءِ ۳ مردم کہ واش ءِ دمگ ءِ جھمنند بوتگ انت ، پیروزاباد ءِ ھند ءَ آمال ءِ تہ ءَ پَسّ ات ءُ بیران بوت انت . اے واجہ وتی گپانی رندگیری ءَ گیش کُت کہ چہ ھمے رد ءَ ماں دگہ انچوشیں تپاکے ءَ ، چکوکی کلّگ ءِ نندوکیں ۲ مردم ، پارود ءِ ھند ءَ آپ ءُ آمال ءِ تہ ءَ پَسّ ات ءُ بیران بوت انت . سرباز ءِ کور ، ھمے نام ءِ دمگ ءِ تہ ءَ یک پُر آپیں کورے انت کہ اے دمگ ءِ کوہ ءُ تیھرانی ھند ءَ سر گپتگ ءُ پیشن ءِ زیردان ءِ آپ بند ءَ رس ایت . چہ پیشن ءِ آپ بند ءَ رند ، اے کور باھو ءِ نام ءِ سر ءَ روان انت ءُ چہ گواتر ءِ ھند ءُ ھبیلی ءِ گُوَزگ ءَ رند ، مکران ءِ رز ءِ رچ ایت . اے کور ءِ دراجی ءِ کچّ ءُ کساس ۳۱۲ کیلومٹر انت کہ آئی ءِ لھتے کیلگ ءُ جُھلگانی تہ ءِ بلوچستان ءِ گُونڈ لپوزیں گانڈو ، زند گوازین ایت . کور ءِ کش ءُ گُوَر ءَ ، زیبداریں نماہ ءُ ندارگانے گندگ بنت کہ تَرّ ءُ تابی مردمانی ھدوناکی سوب انت / رجانک : میرجلال