مُلک ءِ چست ءُ ایرانی تہ ءَ ، درھیں راجاں باید انت یک داب ءُ وڑے ءَ چارگ ءُ گِندَگ بہ بنت

چہ میارجل ءِ بنجاھی ھالرسانی ءِ ھالانی رد ءَ ; اے رسانکدری بنجاہ ، وتی زمہ ءُ اگدہ انی پیلو کنگ ءِ ھاتر ءَ ، بلوچستان ءِ روبیدگی ءُ راجمانی کماش ءُ جھدکارانی پجّار دیگ ءَ ، یک نند ءُ نیادے ءَ گوں واجہ مراد رئیسی ءَ ٹھینتگ کہ جھل ءِ گالردانی سر ءَ چہ شمئے چمّانی دیم ءَ گوز ایت .

میارجل ; دزبندی کناں کہ وتی پجّار ءَ بہ کن ءُ اگاں ھم لوت ئے چہ وتی چاگردی ءُ دود ءُ روبیدگی ءُ زانشتی کِردانی پژدر ءَ اوں گپ کن .

واجہ رئیسی ; من مراد رئیسی اں یک لوگ نشتگیں دربرینوکے ، کَدیمی دیپلم ءِ وانگی سیمسران ءَ ماں بِنداتی دانشسرائے ءَ در برتگ . منی دربرینوکی ءِ گوستاک ، ماں پزم کلگ ءَ کنارک ءِ ھند ءَ دربرینوک بوتگاں ، دشتیاری ءُ ، رند ءَ ماں گہ ءِ ھند ءُ دمگ ءَ ابوحنیفہ ءُ یک دگہ دربرجاھے ءِ کارمستر بوتگاں ، آموزش ءُ پرورش کارگس ءِ دربروکی بھر ءُ دگہ وھدے ھم اے کارگس ءِ ھکّ ءُ اکبالی ءُ چہ آئی ءَ رند ، خاتم الانبیا ء نامیں دربرجاھے ءِ جھگیر بوتگان ءُ لھتے دگہ زمّہ انی اگدہ زیری ھم چہ منی کار ءُ چلوپگی دور ءُ باریگانی کِرد ءُ پژدر انت . سال ۱۳۸۳ منی سرکاری چلوپگ ءِ گڈّی سال بوتگ ءُ ماں ۱۳۸۵ ءِ سال ءَ ، سوئد ( ڈنی ملکے ) ءِ اپسالا نامیں شھدربرجاھے ءِ یک زیملی کارزانتے ءِ ھساب ءَ ، ماں بلوچی زبان ءَ یک بلاھیں مراگشے ءَ بھر زرتگ ، انچوش من ءَ لھتے دگہ ڈنی ملکاں چوشکہ ھندوستان ، تازی ملکانی میان ھوری دمگانی نیمگ ءَ اوں سات ءُ سپرے بوتگ . 

میارجل ; تئے دیدانک بلوچستان ءِ چاگردی ، دود ءُ روبیدگی بستارانی بارو ءَ چے انت ؟ اے بارو ءَ کمو سرپدی بہ دئے .

واجہ رئیسی ; اے بنگپ ، پہ بلوچستان ءِ انیگیں جاورھالانی سر ءَ بند انت ءُ ھرچ مردمے اے پڑ ءَ چہ کجام نیمگ ءَ بہ چار ایت ءُ چہ ڈول ءَ پٹ ءُ پول بہ کنت . منی نَزّ ءَ ھرچ راجے ءِ دود ءُ روبیدگاں ، باید انت کہ چہ ھما راج ءِ زلورتانی چمّ ءَ گِندگ ءُ چارگ بنت . انیگیں جاورھالانی رد ءَ ، اے سرڈگار ءِ لس مھلوک ءِ زانت ، زانشت ءُ زانتکاری انی گیشی ءُ گِھتری ءُ اے ملک ءِ سوھویں بامردانی دیدانکانی کارمرزی ، ماں آھانی چاگردی ءُ دود ءُ روبیدگی ءِ پڑاں زلورت انت ، چہ اشی ءَ گیش ، بلوچستان ءِ ورناھان ءَ الم ءُ زانشتی پڑانی دربرگ ءِ منوگری ءُ وت پھریزی چہ وتی ماتی ڈیھ ءِ در کپگ ءَ ، اَلّمی انت .  

میارجل ; بلوچستان ءِ اسلی تریں چاگردی ءُ روبیدگی جیڑہ ماں انیگیں جاورھالاں چے انت ءُ اے بارو ءَ ما را چے کنگ لوٹ ایت ؟ 

واجہ رئیسی ; ورناھانی بیکاری ءُ لوگ نندی ، نشہ ای ھیلداری انی گیش بیگ ءُ آھانی مالی ءُ کار ءُ بار ءِ بستارانی سر ءَ نادلگوشی ، بلوچستان ءِ چاگرد ءُ راجمان ءِ مونجائی انت ، اے شلگرہ انی سر ءَ ما را رھدری ءُ توجیلے ءِ شوھازگ لوٹ ایت ، بلوچستان ءِ تہ ءَ ھاسکار ھما دربرتگیں ورنائیں گلّانی ھاتر ءَ کار ءُ چلوپگ ءِ درگیجگ ءُ آھان ءَ بود ءُ ردوم دیگ ، چہ گِھتریں کاران انت .

میارجل ; تئی دیدانک ءُ رھدر پہ بلوچ راج ءِ وتی اسلی ایں مول ءُ مراد ءُ واھگانی سر بیگ ءَ ماں ایران ءِ ملک ءُ سرڈگار ءَ چے انت ؟ 

واجہ رئیسی ; اے پڑ ءَ ، بلوچانی سر بیگ پہ وتی مرادانی منزل ءُ آھانی بروبریں ھکّ ءُ اکبالانی مَنّگ ءُ مارگ ماں ملک ءُ چاگرد ءِ تہ ءَ . یکے چہ بنَکّی ایں بنگپان انت ءُ ملک ءِ درھیں راجان ءَ یکّیں ھساب ءِ سر ءَ چارگ ھم ، یک زلورتے انت .

میارجل ; بلوچ راج ءِ زانتکار ءُ سوھویں بامردانی زمّہ ءُ اُگدہ ماں مُلک ءِ انیگیں جاورھالاں چے انت ؟ 

واجہ رئیسی ; مئے راج ءِ زانتکار ءُ سرپدیں گِھمرد اں ، بلوچستان ءِ اسلی ایں مڈّی ءُ مَتاہ انت انت ءُ آھانی واک ءُ وسانی شوھازگ ءُ پدّر کنگ اے پڑ ءِ زلورت انت .

میارجل ; رسانکدرانی زمہ پہ بلوچستان ءِ دیمروی ءُ بودناکی ءَ چے انت ، وتی لیکہ ءَ اے بارو ءَ بہ گُوَش .

واجہ رئیسی ; ما را بلوچستان ءِ دود ءُ روبیدگ ءُ چاگردی جھدانی پیلو کنگ ءُ اے وس ءُ واکانی رُدوم دیگ یک زلوری ایں زمہ ئے انت .

میارجل ; اے گپ ءُ تران ءِ گڈّ سری درگتاں ، اگاں ترا ، نا گوشتگیں گپے ھست بہ گوش .

واجہ رئیسی ; جی اناں ، منتوار .

رجانک : میرجلال