مبارک کازی بلوچ نامداریں لچہ کار ءُ شائر ءِ زند ءَ چمشانکے

گوادر ءِ کوھن ءُ کدیمی بندن ءُ آئی ءِ آتراپ ءِ شھر ءُ دمگاں مدام بلوچی زبان ءُ ادب ءِ بنزہ بوتگ ءُ راجدپتر ءِ گوھداری ءَ ھر کتام وتی نوبت ءُ باریگ ءِ سر ءَ آتکگ ءُ وس ءِ کچ ءَ بلوچ راج ءِ زبان ءُ زرد ءِ سر ءَ وتی شائری کِرد ءِ ٹپّ ءُ نشانے اشتگ ءُ باریگ ءِ گُڈّگ ءَ رند شتگ انت .

انیگیں دور ءَ اوں اے سرڈگار وتی دامن ءَ بازیں شائر ءُ لچہ کارانے رودینتگ کہ نوں پربندگ ءُ لکگ ءُ نبسگ ءَ انت ، ھرکس داں روچے کہ آ برزیں ساھب ءَ اجازت بہ دنت ، بلے آ کس کہ دگہ آئی ءِ زند ءِ روچاں کُٹّ ات ءُ دروھگ بوت آ مبارک کازی انت .

مبارک کازی (پیداک ۲۴ دسامبر ۱۹۵۶) ھما زبردستیں شائر ات کہ مردم چہ آئی ءِ شیر ءُ لچہ انے درستیں گیش ءُ گیوار ءَ گِسر مان ایت . آئی ءِ دستونک چاربندی ، ٹوہ ءُ گونڈ چوشکہ پسنی ءِ زر ءُ تیاب ءَ تچک ءُ چہ مانا ءَ دوریں جھلانک ءِ وڑ ءَ ناگند . ھر کس وتی دل ءِ تب ءَ سرپد بوت کنت .

مبارک ءَ مھری لچہ انی پربندگ ءَ گوں ، شراب ءَ ھم کوھنیں مھرے بوتگ . لھتے گوش انت کہ داں بے ساری ءِ سیمسر اں شراب وارتگ ءُ چوشیں وھداں آئی ءِ پربندان ءَ نوکیں دگہ مانائے .

مبارک کازی ءِ ھب گوں راج ءُ راجدوستی ، گوں بلوچ ءُ بلوچستان ءَ چہ دل ءِ جھلانک ات ءُ اے راہ ءَ بازیں سکّی ئے سگّ ات ءُ تاواں دیست بلے ھچبر چہ وتی مول ءُ مراد دست کش نہ بوت .

شراب ءِ ھب ءِ ھاتر ءَ لھتے گوش انت مبارک ءَ گوں نیکراھی ءَ کمو دگہ گوری بوتگ بلے من کہ چہ آئی ءِ ابابت ءُ نماز ءَ بازیں اکس ءُ تامرے دیتگ ءُ چارتگ کہ وتی ھاوند ءِ بارگاہ ءَ بزّگی ءَ دست بستگ ءُ پیٹوک ساھینتگ اے گپّ ءِ منوگر نہ اں کہ آ گوں نیکراھی ءَ کونجی داشتگ . 

ھدامرزی ءَ گوں مھیمی ءُ سات ءُ سپر ءُ سیاد گندی باز ھب ات ءُ آھر سر ءَ ھم ماں سپر ءَ اے کورئیں دگیا ءَ یلو کت (۱۶سپتامبر۲۰۲۳)

مبارک وتی روگ ءِ روچ ءَ زند ءِ تہ ءِ دیستگ ات ءُ پہ چوشی روچاں چہ پیش ءَ باز پربند بستگ ات .

بلّے مرتان ءُ شت اںمن ، بلے من جزم گُشاں

شھر ءِ دیوال ءِ سر ءَ گال منی پشت کپ انت

کازی روچے من باں دگنیا ءِ نگاھاں اندیم

بلے راجدپتر ءِ اھوال منی پشت کپ انت .