لوچ راج ءِ دوا ءُ درمانی گشت ءُ گولاں ماں مُلک ءِ اے دگہ ھلاکہ اں

چہ میارجل ءِ بنجاھی ھالانی رد ءَ ; واجہ عبدالباسط بھرامی چوش نبشتگ ; بژنی گپّے کہ ایران ءِ اسلامی باھند ءِ سوبمند بیگ ءِ ، رند چہ چنت دہ سالانی گوزگ ءَ ، بلوچ راج ءِ نادراھیں مردماں پہ وتی نادراھیانی الاج ءُ درمان کنگ ءَ انگت ءَ ڈنّی شھراں چُشکہ کرمان ، مشَد ، شیراز ، تھران ، تاں تنا کراچی ءِ درملکی شھر ءَ رُوَگ ءُ آیگ ءِ تچ ءُ تاچ انت . وھدے ھم کہ اے بارو ءَ سر ءُ سوجے کن ئے گُڑا مردم چہ دوا ءُ درمانی اوزار ءُ سامانی کَمّی ، سوھو ءُ زانتکاریں دکترانی نہ بیگ ءُ نادراھیں مردمانی ازت کنگ ءَ ماں آ شھراں سرپد بیت ، پمیشکا ، نادراھیں مردماں گوں نادراھی ءِ درد ءُ دور ءِ سَگّگ ، راھانی دور ءُ دراجی ءِ ژندی ، دوا ءُ درمان ءِ ھرچ ءُ درچانی گرانی ءُ دو سر بیگ ءَ ھور ، پدا وتی الاج ءِ سات ءُ سَپَر ءِ پُتولان ءَ دیم پہ شیراز ، مشد بگر داں کراچی ءِ درملکی شھر ءَ ماں پاکستان ءَ بند انت . پدا ما درستاں سرپد ءُ سوھویں کہ الاج ءُ درمانی گشت ءُ گول کنوکیں مردماں چہ لاپ سیری ءُ وشّی گوازینگ ءُ سیل ءُ ندارہ ءِ ھاتر ءَ اے گریبی ءُ درانڈیھی مھنت ءَ وتی سر ءَ نہ موش انت بلکیں چہ وتی بَزّگی ءَ ھاسکار پہ وتی دوا ءُ درمان ءُ الاج ءِ ھاتر ءَ ھور گوں بازیں در ءُ دور ءِ سَگَّگ ءَ اے دوریں شھرانی راھیگ بنت . نوں ھُدائیگی جست اش انت کہ اے وَڈّ ءُ گیابیں شھرانی تہ ءَ ابید چہ سوھویں دکتران ءُ الکاپیں دوا ءُ درمانی اوزار ءُ سامانی بیگ ءَ ، دگہ ، چِہ شَرّیں جاورھانے چَہ سیل ءُ ندارگی بنجاھاں ، وشیں آپ ءُ گوات ، زر ءُ ساوڑ ، کوہ ءُ جنگل یا کہ کور ءُ کیلگانے ھست کہ چہ بلوچ راج ءِ نادراھیں مردماں سال ءِ دراجی ءَ سرکیل انت ؟ نوں ما را ھژدری انت کہ اے گپچیل ءِ سر ءَ پٹّ پولے بہ کن ایں کہ پرچا اینچوک سالانی تہ ءَ پہ چوشیں دوا ءُ درمانی بُنجاھان ءِ اڈ کنگ ءَ پہ بلوچستان مردماں کاھلی بیتگ ؟ وھدے کہ ما لھتے دوا ءُ درمانی سامان ءُ اوزرانی سر ءَ چُشکہ ، " ام آر اے " ءِ نادراھی ءِ زانشتی سامان ، یا کہ " فلور سکوپی " ، " آر تی ام اس " ، " مامو گرافی " ءَ اوزاران ءِ کَچّ ءُ کساس ءَ ماں یک وڈّ ءُ گیابی شھرے ءِ تہ ءَ ( یزد ءُ کرمان ) گوں وتی درھیں ھلاکہ ءِ شھرانی دوا ءُ درمانی اوزار ءُ ساماناں بہ چکّاسیں گُڑا ھمے سرپد بہ ایں کہ ھرچ یکّے چہ اے وڈّ ءُ گیابی شھراں چُشکہ یزد ءُ کرمان ، ماں اے پڑاں چہ مئے ھلاکہ ءِ درستیں شھرانی کَچّ ءُ کساس ءَ چُنت سر دیم ءَ تر انت ، اے دگہ گپّاں بلّ ، اگاں اے سالانی دراجی ءَ مئے ھند ءُ دمگ ءِ سروک ءُ زمّہ وارانی الکاپیں اگدہ داری ءُ دل سوچی ماں دوا ءُ درمانی پڑاں بوتیں ، نیکہ اے بارو ءَ بلکیں مئے ھلاکہ ءِ درستیں نگیگی ءُ شلگرہ اں چہ راج ءِ پادانی دیم ءَ زورگ بوتگ ات . بارین ھچ کس چہ وت ءَ جُست کتگ کہ گوں بلوچ مردمانی اینچوک الاج ءُ درمانی تچ ءُ تاچاں ، وَرَگ ءُ وردن ءُ نندگ ءُ ساھارگ ءِ ھرچ ءُ درچاں کہ مئے راج ڈن چہ وتی ھلاکہ ءِ شھراں کتگ ءُ کنگ ءَ انت ، اگاں اے بُنمال ءِ ھرچ ءُ درچ ءِ بُندری کار ءُ باراں ، ماں مئے ھند ءُ دمگ ءَ بوتگ ات گڑا ما توانتگ ات کہ چنت دوا ءُ درمانی شھر ، انچوش کہ یزد ءُ کرمان ، ماں وتی ھلاکہ ءِ تہ ءَ ادّ بہ کت ایں ، چہ ھمے ھاتر ءَ انت کہ اگاں چہ سرکار ءُ دولت ءِ نیمگ ءَ ماں بلوچستان ءِ تہ ءَ کمّے گیشتر اے کار ءُ بارانی سر ءَ مارگ ءُ جھد ءُ ساہ بہ بوتیں گڑا الّم ءَ مئے جاورھال ماں اے پڑ ءَ چوش کہ انیّ ءَ نہ ات ءُ ملک ءُ راج ءِ ھستومند ءُ ھزگاریں مردماں ، وتی ھُب ءُ دلمانگی ءَ پدّر بہ کت ایں گڑا وت ھم سوبمند بوتگ ات ءُ راج ھم چہ وتی انیگیں شِلگِرَھاں آسیدگ بوت ات ءُ ھمے پیم ھاوند ءِ رزامندی ھم آھان ءَ دست کپتگ ات . مئے مول ءُ مراد اش انت کہ چہ مئے ھلاکہ ءِ شاھگانی ءُ پراھی ءُ شھرانی دوری ءُ گِستائی ءِ ھاتر ءَ ، کم چہ کمّ ما را دو چوشیں دوا ءُ درمانی شھرانی زلورت ءُ ھژدری انت . پہ ھما روچانی اوست ءُ امیت ءَ کہ ملک ءُ راج ءِ ھستومند ءُ ھزگاریں مردماں اے پڑ ءَ گام بہ زور انت ءُ انیگیں درگتاں کہ مکران تیاب ءِ دیمروی ءِ مراگشاں چہ دولت ءُ سرکار نیمگ ءَ رندگیری بیگ ءَ انت ، ما را نیکہ اوست ، بلکیں زلورت ءُ ھژدری انت کہ ۲_۳ ھاسیں نادراھجاہ پہ ھزار نادراھیں مردمانی جلّگ ءَ ، ماں اے ھند ءُ دمگاں اڈّ کنگ بہ بیت دانکہ بلوچ راج چہ نادراھیانی الاج ءِ تکانسری ءَ ماں دگہ ھلاکہ اں بہ رکّ ایت /رجانک : میرجلال